Lo mɛtɛ, anto nangaka monga anto walanga wɔladi, losembwe ndo anto w’ɛlɔlɔ. Ko lande na kele tena efula tekɔ lo mɛna awui wa ngala, awui wa wɛngiya, ndo awui w’esehe? Nsango y’awui wa kɔlɔ yekɔ ahole tshɛ. Onde ekɔ onto ɔmɔtshi lasala la wolo dia anto nsala awui wa kɔlɔ?—Adia 1 Joani 5:19.

Onde Nzambi akatonge anto dia salaka awui wa kɔlɔ? Ndooko, Jehowa Nzambi akatonge anto l’efanelo kande dia mbokoya ngandji kande. (Etatelu 1:27; Jobo 34:10) Ndo nto, Nzambi akasha anto nɛmɔ lo mbasha lotshungɔ la nsɔna kɛnɛ kele ɔlɔlɔ kana kɛnɛ kele kɔlɔ. Etena kakasɔnɛ ambutshi aso wa ntondo dia nsala kɔlɔ, vɔ wakatone ɛnyɛlɔ ka Nzambi ndo wakakome anto wele keema kokele. Takahowɔ eongelo ka nsala pɛkato oma le wɔ.—Adia Euhwelu k’Elembe 32:4, 5.

Nzambi nangaka dia sho nshika tanga la ntondo k’awui wa kɔlɔ wakatahowɔ. (Tukedi 27:11) Diakɔ diele, nde tetshaka woho wakokaso mbewɔ dia nsala kɔlɔ ndo woho wa ntana ɔngɛnɔngɛnɔ wa mɛtɛ. L’etena kɛnɛ, hatokoke mbokoya ngandji kaki Nzambi lo yoho ya kokele.—Adia Osambu 32:8.

Kaanga mbele awui wa kɔlɔ wekɔ lo taleke mpama nshi nyɛ, Nzambi ekɔ lo mbatshika l’etena kɛmɔtshi l’oyango w’anto tshɛ mɛna etombelo wa kɔlɔ wele l’awui asɔ. (2 Petero 3:7-9) Keema edja, nkɛtɛ kayanga ndola l’anto wele l’ɔngɛnɔngɛnɔ wakitanyiya Nzambi.—Adia Osambu 37:9-11.