ASAWO WƆTƆNƐ L’ƆTƐ A DUI WA LO LOHOSO | WOHO WA NDƆSHANA LA EKIYANU
Ekiyanu wendana la nkumbo
Janet mbutaka ate: “Yema tshitshɛ l’ɔkɔngɔ wa papa mvɔ, omɛmi akambitɛ dia nde ambɛna womoto okina. Kombeta edja, aha la mbewoya kana ndaka nde akalɔngɛ diangɔ diande tshɛ ndo akatshike dimi l’anaso ahende.” Janet akakondja olimu, koko difuto diande kombokimanyiyaka dia nde nkotsha ehomba w’ase nkumbo kande. Ndo nde akahomana l’ekiyanu ekina laadiko dia okiyanu wendana l’ekondjelo. Janet mbutaka ate: “Okiyanu wa wolo wendana l’ɛkɛndɛ w’eyoyo tshɛ wakamahombe mɛmba dimɛ wakatshindjaka wɔɔngɔ. Lakayaokaka dia takamakoke nkimanyiya anami lo yoho y’efula oko wasala ambutshi akina. Ndo kaanga kakianɛ, dimi ndjakiyanyaka lo woho wambɔsa anto akina dimi l’anami. Onde vɔ ndjambolaka dia kana dimi lakasale kɛnɛ tshɛ kakamahombe nsala dia kokɛ diwala diami?”
Janet
Dɔmbɛlɔ kimanyiyaka Janet dia nde mbahemɛ nsaki yande ndo nkeketsha diɔtɔnganelo diasande la Nzambi. Nde mbutaka ate: “Otsho mongaka paa efula, etena katongaka ɛngɔ tshɛ ki, koko dimi lakatetemalaka ndjakiyanya. Dɔmbɛlɔ ndo wadielo wa Bible kimanyiyakami dia ndala djɔ. Divɛsa dialekami ngɛnangɛna ko Filipɛ 4:6, 7 diata ɔnɛ: ‘Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu.’ Laketshaka etsho efula lo nsala dɔmbɛlɔ ndo lakayaoke dia wɔladi wa Jehowa wakakeketsha.”
Ɛtɛkɛta waki Yeso w’ekeketshelo wendana la dɔmbɛlɔ wakandate lo Dako diande dia lo dikona mendanaka la weho tshɛ w’ekiyanu: “Shɛnyu mbeyaka kɛnɛ kenyu l’ohomba kaanga la ntondo ka nyu mbɔlɔmba.” (Mateo 6:8) Ndo tekɔ l’ohomba wa mbɔlɔmba. Dɔmbɛlɔ ekɔ dui dioleki ohomba diatokimanyiya dia ‘ndjasukanya la Nzambi.’ Etombelo akɔna wakoka monga la dui sɔ? “Nde ayoyasukanya” la so.—Jakɔba 4:8.
Lo mɛtɛ, dɔmbɛlɔ hatokimanyiya tsho dia sho ndjaoka dimɛna nɛ dia tambota ekiyanu aso. Jehowa ‘Ɔnɛ latokaka dɔmbɛlɔ’ nde lawɔ kimanyiyaka wanɛ Osambu 65:2) Diakɔ diele, Yeso akɛnya ambeki ande “ohomba wa nɔmbaka nshi tshɛ, aha la mpekɔ.” (Luka 18:1) Sho pombaka ntetemala nɔmba Nzambi ɛlɔmbwɛlɔ ndo ekimanyielo kande tele l’eshikikelo dia nde ayotofuta lo mbetawɔ kaso. Sho hatokoke mbidja taamu pondjo lo nsaki kana dikoka diele la nde dia nsala dui sɔ. Lanɛ, ‘ntetemala la nɔmba’ mɛnyaka dia tekɔ la mbetawɔ ka mɛtɛ.—1 Tɛsalɔnika 5:17.
tshɛ wooyanga lo mbetawɔ. (KƐNƐ KALEMBETSHIYA MƐTƐ MONGA LA MBETAWƆ
Ko mbetawɔ kɛdikɛdi naa? Mbetawɔ mendanaka la ‘mbeya’ Nzambi oko onto la mɛtɛ. (Joani 17:3) Sho salaka dui sɔ ntondo lo mbeya tokanyi taki Nzambi oma lo Bible. Sho mbekaka dia nde mɛnaka ɔmɔmɔ la l’atei aso ndo nde nangaka tokimanyiya. Koko, mbetawɔ ka mɛtɛ hakomɛ tsho lo mbeya dui dimɔtshi diendana la Nzambi. Koko tɔ nembetshiyaka nto monga la lɔngɛnyi l’oshika lele la dilɛmiɛlɔ kaamɛ la nde. Oko watongaka lɔngɛnyi la lam’asa anto, hatokoke nsɔnga lɔngɛnyi lɔsɔ lushi ɔtɔi. Mbetawɔ kaso “kayotetemala mpama” edja tshɛ kayotekaka awui wendana la nde, kayotosalaka “kɛnɛ kawɔngɛnyangɛnya” ndo kayotɛnaka ekimanyielo kande. (2 Kɔrɛtɔ 10:15; Joani 8:29) Mbetawɔ ka ngasɔ kakakimanyiya Janet dia nde ndɔshana la ekiyanu.
Janet mbutaka ate: “Kɛnɛ mɛtɛ kakakimanyiya dia nkeketsha mbetawɔ kami ele, woho wakamɛnyi ekimanyielo ka Jehowa l’oseka dui tshɛ. Tena efula takahomanaka l’awui wa wɛngiya wakɛnamaka dia aki wolo mbikikɛ. Lakalɔmbaka efula ndo Jehowa akatetemala taatɛ mboka nɛ dia taakamakoke pondjo dimɛ nsala dui sɔ. Etena kawoshami losaka, dui sɔ mboholakami woho wakandakimanyiya lo yoho y’efula. Nde tetemalaka tokimanyiya, ndo mbala efula lo wonya wahombama. Ndo nde akambisha angɛnyi w’eshika wele apami ndo wamato w’Akristo. Vɔ wookongaka nshi tshɛ nsuke dia kimanyiyami ndo wekɔ bɛnyɛlɔ di’eshika le anami.” *
“Dimi mbeyaka lande na kata Jehowa lo Malaki 2:16 ɔnɛ: ‘Dimi petshaka odiakelo wa diwala.’ Le olonganyi wele bu l’onongo mongaka dikambo dioleki paa efula. Ɛnɔnyi efula wambeta ntatɛ lam’akatshike omɛmi, ndo lo tena dimɔtshi dimi toyaokaka ompoko ndo oko onto laha bu la nɛmɔ. Etena kohɔmi, dimi salaka la wolo dia nkimanyiya onto okina, ndo dui sɔ kimanyiyakami dimi lawɔ.” Lo nkamba la dako dia lo Bible diata diaha ndjaakakitola l’anto akina, Janet akalɔshana l’ekiyanu ande. *— Tukedi 18:1.
Nzambi ekɔ ‘She ana wa tshike ndo okokedi wa wadi waki edo.’—Osambu 68:5
Janet mbutaka ate: “Osukɔ ami woleki woke ndjaka lo mbeya ɔnɛ Nzambi ekɔ ‘She ana wa tshike ndo okokedi wa wadi waki edo.’ Nde hatokalɛki pondjo oko wakatokalɛ omɛmi.” (Osambu 68:5) Janet mbeyaka dia Nzambi hakoke tohemba pondjo “l’akambo wa kɔlɔ.” Koko nde toshaka “la lokaho tshɛ” lomba ndo “wolo woleki wɔnɛ wokongaka l’onto” dia tokimanyiya dia ntondoya ekiyanu aso.—Jakɔba 1:5, 13; 2 Kɔrɛtɔ 4:7.
Ko laasɔ, kakɔna kayotota naka tekɔ l’ekiyanu nɛ dia lɔsɛnɔ laso laya lo waale?
^ od. 10 Dia mbeya awui akina lo kɛnɛ kendana la ndɔshana la ekiyanu, enda sawo diele l’ɔtɛ a dui ɔnɛ: “Onde wɛ ekɔ lo kokɛ lɔsɛnɔ layɛ?” lo Falase diele lo Réveillez-vous ! wa Ngɔndɔ k’esambele 2015 ndo wɛ koka ditana l’Ɛtɛrnɛtɛ lo www.pr418.com.