ASAWO WƆTƆNƐ L’ƆTƐ A DUI WA LO LOHOSO | WOHO WA NDƆSHANA LA EKIYANU
Ekiyanu wekɔ ahole tshɛ
“Lakatshu dia tosomba diangɔ dia ndɛ, koko lakatotanaka paka biskwiti eto ndo wakadɛ oshinga mbala 10 000 ndeka oshinga wokosombamaka! La wedi a pindju, dimi kototana ndooko ɛngɔ ka ndɛ lo waa makashinyi tshɛ.”—Paul, Zimbabwe.
“Omɛmi akambidjashiya ko akambutɛ ate layanga nyotshika. Ngande wakamakoke mbikikɛ okakatanu ɔsɔ? Kakɔna kayokomɛ anami?”—Janet, États-Unis.
“Etena kakamoke losiba la sirène (mbuta ate losiba latowodaka dia mbewola anto dikambo dia mpokoso kɛmɔtshi), lakalawɔ dia dimi toyashɛ ndo toshama lo nkɛtɛ lam’ele waa rɔkɛtɛ wakatondɔtondɔka. Wenya efula l’ɔkɔngɔ wa laasɔ, anya ami wakatetemala nsaka lokomba.”—Alona, Israël.
Tekɔ lo nsɛna lo ntena di’ekiyanu, “tena dia paa dia wolo mbikikɛ.” (2 Timɔte 3:1) Anto efula wekɔ lo diɛnɛ l’ekiyanu wendana l’ekondjelo, ohandjwelo wa nkumbo, ata, hemɔ ya wolo yakonya lo nyɔi ndo mpokoso y’oma lo diangɔ diakatongama kana y’oma lo diangɔ diakasalema oma le ana w’anto. Laadiko dia laasɔ, tekɔ l’ekiyanu efula wahomana laso shoamɛ ndo sho toyambolaka ɔnɛ: ‘Onde ohamelo wele lo demba diami ayoyokoma lo kansɛrɛ lushi lɔmɔtshi?’ ‘Lo andja wa ngande wayoyola ekana ami?’
Aha ekiyanu tshɛ mbele kɔlɔ. Lo tena dimɔtshi sho tongaka la yema y’okiyanu la ntondo ka ɛgzamɛ, ka dui dimɔtshi kana la ntondo ka ɛkɔnya watowɔkɔnyaka wanɛ wayanga olimu. Ndo nto, monga la wɔma wa waale ɔmɔtshi tokimanyiyaka dia mbewɔ mpokoso. Koko ekiyanu wamboleka kana waha pe mbelaka waale. Atete edja kele wekelo ɛmɔtshi wakɛnya dia epalanga ndekana 68000 wakate dia kaanga ekiyanu wa totshitshɛ konyaka onto lo nyɔi k’osondjo. Diakɔ diele, Yeso aki l’ɔkɔkɔ w’oshika wa mimbola ɔnɛ: “Onto akɔna l’atei anyu ayokoka ntaloya otale wa lɔsɛnɔ lande kaanga yema tshitshɛ oma lo woho wayakiyanyande?” Lo mɛtɛ, ekiyanu hawokoke ntaloya lɔsɛnɔ l’onto kaanga ɔtɔi. Diakɔ diele, Yeso akalake ate: “Nyotshike ndjakiyanya.” (Mateo 6:25, 27) Ko ngande wakoka dui sɔ salema?
Okadimwelo wa dimbola sɔ nemanɛka la monga la lomba l’oshika, mbetawɔ ka mɛtɛ le Nzambi ndo monga l’elongamelo ka mɛtɛ lo nshi yayaye. Oyadi ɛlɔ kɛnɛ sho bu l’ekakatanu wa wolo, teye dia sho koka mpomana la wɔ lo nshi yayaye. Ɔnkɔnɛ, nyɛsɔ tende woho wele nkamba l’awui anɛ akakimayiya Paul, Janet, ndo Alona dia ndɔshana l’ekiyanu.
