ASAWO WƆTƆNƐ L’ƆTƐ A DUI WA LO LOHOSO | LƆSƐNƆ L’ƆKƆNGƆ WA NYƆI—ONDE KOKA MONGA?
Elongamelo lo dikambo dia wanɛ wavɔ
Onde ekɔ kɔlɔ nkanyiya dia wanɛ wavɔ wayɔsɛna nto? Ɔpɔstɔlɔ Pɔɔlɔ kokanyiya dia dui sɔ diekɔ kɔlɔ. Nde akafunde l’ɛlɔmbwɛlɔ ka nyuma k’ekila ate: “Ko naka paka lɔsɛnɔ lɔnɛ loto mbalongamɛso le Kristo, kete sho mboleki anto akina tshɛ kandji. Koko lam’ele mɛtɛ Kristo akolɔ oma lo nyɔi, nde ekɔ ɔlɔnga wa wanɛ woladi djɔ lo nyɔi.” (1 Kɔrɛtɔ 15:19, 20) Pɔɔlɔ akɔsaka eolwelo oko dui dia mɛtɛ. Kɛnɛ kakoshikikɛka dui sɔ ko eolwelo ka Yeso ndamɛ. * (Etsha 17:31) Diakɔ diele Pɔɔlɔ akelɛ Yeso ɔnɛ “ɔlɔnga,” mbuta ate Yeso mbaki onto la ntondo lakolɔ otsha lo lɔsɛnɔ la pondjo. Naka Yeso mbaki onto la ntondo, kete laasɔ mbokɛmaka dia anto akina pombaka monga.
Jɔbɔ akatɛ Nzambi ate: ‘Wɛ ayolomɔlomɔ dikambo dia olimu w’anya ayɛ.’—Jobo 14:14, 15
Ekɔ ɔkɔkɔ okina wakokayɛ monga l’eshikikelo lo elongamelo ka eolwelo. Jehowa ekɔ Nzambi ka mɛtɛ. ‘Nzambi kahakoke mbuta kashi.’ (Tito 1:2) Jehowa atataka kashi ndooko lushi ɔtɔi ndo nde hataki kashi pondjo. Onde nde koka ndaka eolwelo, mɛnya dia nde koka mbolola anto ko oma laasɔ nde ndjotshikitanya kɛnɛ kakandalake? Ɔsɔ ekɔ dui diahasalemaki pondjo.
Lande na kakakongɛ Jehowa dia eolwelo monga lo nshi yayaye? L’ɔtɛ wa ngandji kande. Jɔbɔ akambola ate: ‘Naka onto ambovɔ, onde nde koka nsɛna nto?’ ‘Wɛ ayelɛ, ko dimi layokokadimola. Wɛ ayolomɔlomɔ dikambo dia olimu w’anya ayɛ.’ (Jobo 14:14, 15) Jɔbɔ aki l’eshikikelo ɔnɛ, she ka ngandji ka l’olongo ayɔngɛnangɛna dia mboolola. Onde Nzambi ambotshikitana? ‘Dimi kele Jehowa; dimi haatshikitana.’ (Malaki 3:6) Polo ɛlɔ, Nzambi ekɔ lo nomɔlomɔ dia mbolola wanɛ wakavu wele l’alemba w’amɛna ndo l’ɔngɛnɔngɛnɔ. Kɛsɔ mbakombola ombutshi wa ngandji tshɛ l’ɔkɔngɔ wa nde mvusha ɔnande. Koko otshikitanu ele, Nzambi ekɔ la wolo wa nsala kɛnɛ kakombolande.—Osambu 135:6.
Nyɔi ekɔ dui diasha paa efula l’asolo, koko Nzambi ayanga kinya lo pondjo
Jehowa ayosha Ɔnande wolo wa mbela ɔngɛnɔngɛnɔ w’efula le wanɛ wakavusha wakiwɔ wa ngandji. Ko ngande wayaoka Yeso lo kɛnɛ kendana la eolwelo? La ntondo ka nde mbolola Lazaro, Yeso akɛnyi lɔkɔnyɔ laki la akadiyɔ waki Lazaro ndo angɛnyi ande, ndo Yeso “akalele.” (Joani 11:35) Lo diaaso dikina, Yeso akahomana la wadi aki odo la la Nayina lakavusha tshɔi yande y’ɔna pami. Yeso “akawoke kɛtshi ndo akawotɛ ate: ‘Takolela.’” Aha la ntshimbatshimba, nde akolola ɔnakɔ la pami. (Luka 7:13) Ɔnkɔnɛ, Yeso mongaka la lɔkɔnyɔ l’efula lo dikambo dia asui ndo nyɔi. Yeso ayonga l’ɔngɛnɔngɛnɔ efula etena kayondosha anto diaaso dia monga l’ɔngɛnɔngɛnɔ lo dihole dia lɔkɔnyɔ.
Onde wɛ ambovushaka? Ondo wɛ akayaoke dia nyɔi ekɔ dui diahakoke kandɔma. Koko dui sɔ koka kandɔma, mbuta ate Nzambi ayolola anto lo tshimbo y’Ɔnande. Ohɔ dia Nzambi nangaka dia wɛ mɛna dui sɔ. Nde nangaka dia wɛ monga laawɔ dia kumbatanɛ la wakiyɛ wa ngandji wakavu. Ohokanyiya woho wayoyonga la lɔsɛnɔ la pondjo la lo nshi yayaye aha la onto ɔmɔtshi mvɔ!
Lionel lakatatɛkɛtshi dia nde mbutaka ate: “L’edjedja ka wonya, lakayekaka akambo wendana la eolwelo. Mbala ka ntondo, aki wolo mbetawɔ ndo dimi kondjaɛkɛ le onto lakambitɛ kɛnɛ kendana la dui sɔ. Lakayange lo Bible ko lakashola dia aki mɛtɛ. Dimi koka kongɛɛ l’asolo walomɔlomɔ dia ndjɛnana la tshɛmi ka pami.”
Onde wɛ nangaka mbeya akambo akina? Ɛmɛnyi wa Jehowa wayɔngɛnangɛna kɛɛnya lo Bible kayɛ lande na kewɔ l’eshikikelo dia eolwelo ka nshi yayaye kayonga. *
^ od. 3 Dia monga l’eshikikelo dia Yeso akolɔ, enda dibuku La Bible : Parole de Dieu ou des hommes ? lɛkɛ 78-86, diakatondjama oma le Ɛmɛnyi wa Jehowa.
^ od. 9 Lam’alangayɛ, enda tshapita 7 ya dibuku Bible etshatɔ mɛtɛ? diakatondjama oma le Ɛmɛnyi wa Jehowa.
