ASAWO WƆTƆNƐ L’ƆTƐ A DUI WA LO LOHOSO | LƆSƐNƆ L’ƆKƆNGƆ WA NYƆI—ONDE KOKA MONGA?
Onde elongamelo kɛmɔtshi kekɔ lo dikambo dia wanɛ wavɔ?
Onde wanɛ wavɔ koka nsɛna nto?
OKADIMWELO WASHA BIBLE: “Etena kekɔ lo ndjaye kele wanɛ tshɛ wele lo waombo wohɔma wayoka dui [dia Yeso] ko wayotomba.”—Joani 5:28, 29.
Yeso akatewoyisha kɛnɛ kayosalema lo nshi yayaye l’ɛlɔmbwɛlɔ ka Diolelo diande ɔnɛ waombo wayotshikala hwe. Fernando lakatatɛkɛtshi dikambo diande lo sawo dietshi mbutaka ate: “Mbala kami ka ntondo kakamadia Joani 5:28, 29, lakaambe efula. Dui sɔ diakambisha elongamelo ka mɛtɛ ndo lakatatɛ kongɛɛ nshi yayaye l’asolo walɔmɔlomɔ.”
Lo nshi yakete, Jɔbɔ laki pami ka kɔlamelo akakongɛɛka dia l’ɔkɔngɔ wa nyɔi kande Nzambi ayowolola. Jɔbɔ akambola ɔnɛ: ‘Naka onto ambovɔ, onde nde koka nsɛna nto?’ Oma laasɔ nde akakadimola l’eshikikelo tshɛ ɔnɛ: ‘Dimi layokongaka nshi tshɛ y’olimu wakambami la wolo [nshi yemi lo diombo] polo lam’ayoya ekimanyielo kami. Wɛ ayelɛ, ko dimi layokokadimola.’—Jobo 14:14, 15.
Eolwelo kaki Lazaro toshaka elongamelo lo kɛnɛ kendana la nshi yayaye
Eolwelo komonga dui di’oyoyo le Maata ya kadiyɔ aki Lazaro. L’ɔkɔngɔ wa nyɔi ka Lazaro, Yeso akatɛ Maata ɔnɛ: “Ɔnanyɔ ayolɔ.” Maata akookadimola ate: “Dimi mbeyaka dia nde ayolɔ lo eolwelo ka lushi l’ekomelo.” Oma laasɔ, Yeso akawotɛ ate: “Dimi lekɔ eolwelo la lɔsɛnɔ. Onto tshɛ longa la mbetawɔ le mi, oyadi kaanga nde kovɔka, nde ayoyala la lɔsɛnɔ nto.” (Joani 11:23-25) Oma laasɔ, Yeso akolola Lazaro aha la ntshimbatshimba. Ɔkɔndɔ washa ɔngɛnɔngɛnɔ ɔsɔ tɛnyaka akambo wayosalema lo nshi yayaye. Ohokanyiya yema dia eolwelo ka ngasɔ ko kambosalema l’andja w’otondo.
Onde anto amɔtshi wayolɔ dia ntshɔ l’olongo?
OKADIMWELO WASHA BIBLE: Ɔtɛkɛta waki Nzambi mɛnyaka dia eolwelo kaki Yeso ntshikitana la eolwelo k’anto akina enanɛi wakɔndwama lo Bible. Anto enanɛi asɔ wakolɔ dia nsɛna lanɛ la nkɛtɛ. Koko lo dikambo dia eolwelo ka Yeso, Bible mbutaka ɔnɛ: “Yeso Kristo . . . ekɔ lo lonya l’omi la Nzambi, nɛ dia nde akatshu l’olongo.” (1 Petero 3:21, 22) Onde paka Yeso oto mbakahombe mbolɔ dia ntshɔ l’olongo? Ntondo ka nde nkalola otsha l’olongo, Yeso akatɛ apɔstɔlɔ ande ɔnɛ: “Naka dimi ntshɔ ndo tonyɔlɔngɔsɔlɛ dihole, dimi layokalola ndo layoyonyolongola dia ndo nyu ndjala lɛnɛ ayomoyala.”—Joani 14:3.
Ɛnyɛlɔ 14:1, 3) Ko kakɔna kayotosalaka ambeki waki Yeso wa kɔlamelo asɔ l’olongo na?
Kristo akakalola l’olongo ndo akatɔlɔngɔsɔla okomelo w’ambeki ande amɔtshi. Lofulo l’anto wayolɔma otsha l’olongo lekɔ 144000. (Vɔ wayonga l’elimu efula wa nsala. Afundelo totɛka ɔnɛ: “Wanɛ wolɔ lo eolwelo ka ntondo wekɔ ekila ndo wekɔ la diɛsɛ, nɛ dia nyɔi ka hende bu la wolo le wɔ. Vɔ wayoyala ɛlɔmbɛdi waki Nzambi ndo waki Kristo, ndo vɔ wayolɛ kaamɛ la nde oko nkumi ya dikanga l’edja k’ɛnɔnyi kinunu.” (Ɛnyɛlɔ 20:6) Wanɛ wayolɔ dia ntshɔ l’olongo wayotoolɛ anto wa la nkɛtɛ oko nkumi ya dikanga ndo ɛlɔmbɛdi kaamɛ la Kristo.
Waa na wayolɔ l’ɔkɔngɔ wa wanɛ wayolɔ otsha l’olongo?
OKADIMWELO WASHA BIBLE: Afundelo wakafundama l’ɛlɔmbwɛlɔ ka nyuma k’ekila wekɔ la ɛtɛkɛta w’oma lo sawo diakasha ɔpɔstɔlɔ Pɔɔlɔ: “Dimi lekɔ l’elongamelo le Nzambi oko wele anto anɛ la elongamelo dia eolwelo k’anto w’ɛlɔlɔ ndo k’anto wa kɔlɔ kayoyala.”—Etsha 24:15.
Ɔtɛkɛta wa Nzambi toshikikɛka dia miliyara y’anto wakavu wayɔsɛna nto
Waa na wayonga l’olui w’anto welɛ Pɔɔlɔ ɔnɛ “anto w’ɛlɔlɔ”? Tɔsɛdingole ɛnyɛlɔ kɛmɔtshi. Wakatɛ Danyɛlɛ laki pami ka kɔlamelo oya l’ekomelo ka lɔsɛnɔ lande ɔnɛ: “Ne dia we ayumuya ndu ayemala lu dihuli diaye lu ekumelu ka nshi.” (Danyele 12:13) Lende ayemɔ Danyɛlɛ oma lo djɔ ya nyɔi? ‘Anto w’ɛlɔlɔ wayokita nkɛtɛ, ndo wayodjasɛka lɔkɔ pondjo.’ (Osambu 37:29) Ndo Yeso akatatshi ɔnɛ: “Ɔngɛnɔngɛnɔ le akanga wa memakana, nɛ dia vɔ wayokita nkɛtɛ.” (Mateo 5:5) Danyɛlɛ ndo apami la wamato akina wa kɔlamelo wayolɔ dia nsɛna nto la nkɛtɛ pondjo pondjo.
Ko waa na wayonga l’olui w’anto welɛ Pɔɔlɔ ɔnɛ “anto wa kɔlɔ”? Vɔ wekɔ miliyara y’anto wakasɛnaka ko wakavu, efula kawɔ kokondja diaaso dia mbeka ndo nkamba l’akambo wa mɛtɛ wa lo Bible. L’ɔkɔngɔ wa vɔ mbolɔ, wayonga l’akoka wa mbeya ndo monga la lowando le Jehowa * la Yeso. (Joani 17:3) Wanɛ tshɛ wasɔna dia kambɛ Nzambi wayonga la diɛsɛ dia nsɛna oko Jehowa ndaamɛ mbuta ate pondjo pondjo.
Wanɛ tshɛ wasɔna dia kambɛ Nzambi wayonga la diɛsɛ dia nsɛna pondjo pondjo wele l’alemba w’amɛna ndo l’ɔngɛnɔngɛnɔ wa kokele
Ngande wayonga lɔsɛnɔ la la nkɛtɛ?
OKADIMWELO WASHA BIBLE: Nzambi “ayokitola asɔyi tshɛ oma lo washo awɔ, ndo nyɔi hatoyala nto, delo hadiotoyala nto, kaanga ndjawi kaanga kandji hatoyala nto.” (Ɛnyɛlɔ 21:4) “Vo wayuhika mvudu, wayudjaseka loko; wayune dikambo di’elua, wayolekaka elua w’uma loko.”—Isaya 65:21.
Ohokanyiya etena kayoyonga la lɔsɛnɔ la ngasɔ kaamɛ la wakiyɛ wa ngandji wakolɔma. Koko dimbola diambɔma diɔ nɛ: Ngande wakokayɛ monga l’eshikikelo dia eolwelo kayonga?
^ od. 15 Jehowa ekɔ lokombo laki Nzambi latanema lo Bible.