ASAWO WƆTƆNƐ L’ƆTƐ A DUI WA LO LOHOSO | LƆSƐNƆ L’ƆKƆNGƆ WA NYƆI—ONDE KOKA MONGA?
Kakɔna keta l’ɔkɔngɔ wa nyɔi?
“Lakafɔnyaka dia etena kavɔ onto nde kokaka tshɔ l’ahole asato: L’olongo, l’ifɛrnɔ kana lo pirgatɔriyo. Lakeyaka dia dimi komonga onto ɔlɔlɔ dia ntshɔ l’olongo kana onto la kɔlɔ efula dia ntshɔ l’ifɛrnɔ. Dimi koshihodiaka shikaa kɛnɛ kelɛwɔ pirgatɔriyo. Ndooko dihole diakamɛnyi diatɛkɛta Bible dia dikambo sɔ. Aki tsho kɛnɛ kakataka anto.”—Lionel.
“Wakambetsha di’anto tshɛ tshɔka l’olongo etena kavɔwɔ, koko dimi komonga l’eshikikelo lo dui sɔ. Lakafɔnyaka dia nyɔi mbele ekomelo ka shimu, mbuta ate ndooko elongamelo kele la wanɛ wambovɔ.”—Fernando.
Onde wɛ atayambolaka ɔnɛ: ‘Kakɔna keta mɛtɛ l’ɔkɔngɔ wa nyɔi? Onde wakiso wa ngandji wakavu wekɔ lo nsowa dihole dimɔtshi? Onde tayowaɛna nto? Lande na kakokaso monga l’eshikikelo?’ Lam’alangayɛ, ɛsɔ tɔsɛdingole kɛnɛ ketsha mɛtɛ Afundelo. Ntondotondo, ɛsɔ tɔsɛdingole kɛnɛ kata Bible lo dikambo dia nyɔi. Oma laasɔ, tayoyɔsɛdingola elongamelo kasha Ɔtɛkɛta wa Nzambi, mbuta ate Bible.
Ngande wonga anto wavɔ?
OKADIMWELO WASHA BIBLE: ‘Wanɛ wasɛna mbeyaka dia vɔ wayovɔ, koko wanɛ wambovɔ haweye ndooko dikambo, ndo vɔ ndooko la difuto, nɛ dia eohwelo kawɔ tshɛ kambohamɛ. Kɛnɛ tshɛ kɛna lonya layɛ dia nsala, salatɔ la wolo ayɛ tshɛ, nɛ dia ndooko olimu kana kanyi kana ewo kana lomba lele lo diombo lɛnɛ atayatshu.’ *—Undaki 9:5, 10.
Diombo, ekɔ tsho dihole dia ntshɔ anto etena kavɔwɔ. Diombo ekɔ dihole dia didjidji lɛnɛ aheye onto ndooko dui kana lɛnɛ ahakambema olimu. Ngande wakɔsaka Jɔbɔ pami ka kɔlamelo diombo? Nde akashisha diangɔ diande tshɛ ndo anande lushi ɔtɔi, oma laasɔ nde akade atshutshu demba di’otondo. Nde akalɔmbɛ Nzambi ate: ‘Otoyombishɛ lo diombo lee [“lo ifɛrnɔ” lo ndjela Bible k’aseka Mupɛ ka Douay], otoyombishɛ.’ (Jobo 1:13-19; 2:7; 14:13) Mbokɛmaka hwe dia Jɔbɔ kɔmbɔsa diombo oko ifɛrnɔ wa dja, kana dihole diakakoke asui ande nyomotoleka. Koko nde akɔsaka diombo oko dihole dia momuya.
Ekɔ yoho kina ya mbeya woho wonga anto wavɔ. Sho koka nsɛdingola ɛkɔndɔ wa l’Afundelo wendana l’anto enanɛi wakolɔ oma lo nyɔi.—Enda kiombo yele l’ɔtɛ a dui ɔnɛ: “ Eolwelo k’anto enanɛi watɛkɛtama lo Bible.”
Ndooko kaanga onto ɔtɔi l’atei w’anto enanɛi wakolɔ oma lo nyɔi lakate dia nde aki lo dihole di’ɔngɛnɔngɛnɔ kana di’asui. Otondonga anto wakolɔ wakeye dihole diakawatshu etena kakawavu, onde totowotɛ anto kɛnɛ keta lɛkɔ? Kana totowokifunda lo Bible lo wahɔ w’anto tshɛ? Lo Afundelo, ndooko dihole diakɔndɔma dikambo sɔ. Anto enanɛi asɔ kombita ndooko dui lo kɛnɛ kendana la kɛnɛ keta l’ɔkɔngɔ wa nyɔi. Lande na? Nɛ dia vɔ kombeyaka ndooko dui lam’ele waki oko anto woladi djɔ ya baku. Lo tena dimɔtshi, Bible kambaka la djɔ dia nembetshiya nyɔi. Ɛnyɛlɔ, Davidɛ ndo Stɛfano akanga wa kɔlamelo ‘wakalale djɔ lo nyɔi.’—Etsha 7:60; 13:36.
Ko naa elongamelo kele laso lo dikambo di’anto wambovɔ? Onde vɔ koka memɔ oma lo djɔ shɔ?
^ od. 7 Lo ndjela Bible—Ekadimwelo k’andja w’oyoyo, tshɛkɛta “diombo” nembetshiyaka “Sheɔlɛ” lo Hɛbɛru ndo “Hadɛsɛ” lo Grɛkɛ. Dikadimwelo dimɔtshi dia Bible kambaka la tshɛkɛta “ifɛrnɔ,” koko kanyi y’ɔnɛ anto wambovɔ tosoyamaka lo dja hatumbi oma lo Afundelo.
Enda ndo lo...
TSHOTO Y'ETANGELO
Onde mɛtɛ Yeso akolola anto?
Kakɔna kɛnya woho wakololaka Yeso anto lo dikambo di’alaka ande wa lo nshi yayaye?
