Onde wɛ atayambolaka dia kana ndooko kakoka monga lo lɔsɛnɔ laadiko wa nkɛnya, nkamba olimu, tshukana, mbodia nkumbo ndo ntshunda osombe? (Jobo 14:1, 2) Bible mɛnyaka dia kaanga anto waki la lomba l’efula wakayambolaka ngasɔ.—Adia Undaki 2:11.

Onde lɔsɛnɔ lekɔ l’oyango ɔmɔtshi? Ntondotondo, sho pombaka ndjambola ɔnɛ: Ngande wakatatɛ lɔsɛnɔ? L’ɔkɔngɔ wa vɔ nsɛdingola woho wakatongama wɔɔngɔ ndo diangɔ dikina dia lo demba diaso lo yoho ya diambo, anto efula wakate dia ekɔ Otungi ɔmɔtshi wele la lomba wakatotonge. (Adia Osambu 139:14.) Naka ngasɔ, kete nde akatotonge l’oyango ɔmɔtshi. Mbeka oyango akɔ koka tokimanyiya dia sho monga l’oyango lo lɔsɛnɔ laso.

Nzambi akatshɔkɔla atshukanyi wa ntondo ndo akawasha ɔkɛndɛ wa nɛmɔ efula. Oyango ande aki dia vɔ ndodia nkɛtɛ, kietɛ paradiso ndo nsɛna pondjo pondjo.—Adia Etatelu 1:28, 31.

Sangwelo diaki Nzambi diamboyotshimbatshimba dia kotshama l’ɔtɛ wakatɔmbɔkwɛ anto lowandji lande. Koko, Nzambi kotokasha ndo nde kotshikitanya sangwelo diande lo dikambo diaso ndo dia nkɛtɛ. Bible toshikikɛka dia Nzambi akasale dia shimbɛɛ anto w’ɛlɔlɔ ndo sangwelo diande diendana la nkɛtɛ diayokotshama. Ɔnkɔnɛ, Nzambi nangaka dia wɛ nsɛna lɔsɛnɔ la woho wakandalange lɔ monga. (Adia Osambu 37:29.) Oma lo Bible, eka woho wakokayɛ nkondja wahɔ oma lo sangwelo diaki Nzambi.