ASAWO WƆTƆNƐ L’ƆTƐ A DUI WA LO LOHOSO | ONDE NDOOKO WAHƆ WAKONDJASO LO NƆMBA?
Dɔmbɛlɔ—Kɛnɛ kakokadiɔ kosalɛ
La ntondo ka wɛ nsala dui tshɛ, ondo wɛ toyambolaka ɔnɛ: ‘Wahɔ akɔna wayomokondja lo dui nɛ?’ Onde ekɔ dui dia lokaki dia mboka dimbola sɔ lo kɛnɛ kendana la dɔmbɛlɔ? Aha mbala tshɛ mongadiɔ ngasɔ. Sho mɛtɛ tolangaka mbeya kana ekɔ wahɔ ɔmɔtshi lo dui sɔ. Kaanga Jɔbɔ laaki onto ɔlɔlɔ akayambola mbala kɛmɔtshi ɔnɛ: ‘Naka dimi mbolelɛ, onde nde ayonkadimola?’—Jobo 9:16.
Lo asawo wetshi, takasɛdingola tolembetelo tɛnya dia dɔmbɛlɔ bu tsho mbekelo kɛmɔtshi ka l’ɔtɛmwɛlɔ kana yoho mɔtshi y’esakelo ka lo yimba. Nzambi ka mɛtɛ pokamɛka alɔmbɛlɔ. Naka sho nɔmba lo yoho ya dimɛna ndo dia awui w’amɛna, nde ayodja yimba. Lo mɛtɛ, nde tɔlɔmbaka dia sho ndjasukanya la nde. (Jakɔba 4:8) Ko kakɔna kakokaso nongamɛ naka dɔmbɛlɔ diaya dui dimɔtshi dia lo lɔsɛnɔ laso? Ɛsɔ tende ɛlɔlɔ ɛmɔtshi.
Wɔladi wa lo yimba.
Etena kahomanayɛ l’ekakatanu ndo l’ehemba lo lɔsɛnɔ layɛ, onde wɛ ndjakiyanyaka otamanya? Bible tokeketshaka dia sho ‘ntetemala la nɔmba’ lo tena dia ngasɔ ndo ‘mbitɛ Nzambi ehomba aso lo dɔmbɛlɔ.’ (1 Tɛsalɔnika 5:17; Filipɛ 4:6) Bible toshikikɛka dia naka sho nɔmba Nzambi, kete “wɔladi wa Nzambi woleki tokanyi tshɛ wayolama etema [aso] la timba [taso].” (Filipɛ 4:7) Sho koka nkondja wɔladi lo mbitɛ Shɛso lele l’olongo ekiyanu aso. Lo mɛtɛ, nde tokeketshaka dia sho nsala kɛnɛ kata Osambu 55:22 ɔnɛ: ‘Okitsha wotsho ayɛ le Jehowa, ko nde ayokosukɛ.’
‘Okitsha wotsho ayɛ le Jehowa, ko nde ayokosukɛ.’—Osambu 55:22
Anto efula wa l’andja ɔnɛ wambokondjaka wɔladi ɔsɔ. Hee Ran, ladjasɛ la Corée du Sud mbutaka ate: “Kaanga mbemi l’ekakatanu efula wa wolo, etena tshɛ kalɔmbami dimi kondjaka ekeketshelo ndo dimi
ndjaokaka dia lekɔ la wolo wa mbikikɛ.” Cecilia, lele la Philippines mbutaka ate: “Oko wemi ombutshi wa womoto, dimi ndjakiyanyaka efula dikambo dia anami wa wamato ndo mama kami lele aya bu la akoka wa mbeyami ɛlɔ kɛnɛ. Koko l’ɔtɛ wa dɔmbɛlɔ, lekɔ la akoka waha monga l’ekiyanu efula lo lɔsɛnɔ lami la lushi la lushi. Dimi mbeyaka dia Jehowa ayokimanyiya dia dimi mbaatondoya.”Esambelo ndo ekeketshelo lo tena di’ehemba.
Onde wɛ ekɔ lo pomana la lonyangu efula, ondo kaanga ekakatanu wa lo lɔsɛnɔ ndo mpokoso? Nɔmba “Nzambi k’esambelo tshɛ” koka kokimanyiya lo yɛdikɔ y’efula. Bible mbutaka dia nde ‘tosambaka lo asui aso tshɛ.’ (2 Kɔrɛtɔ 1:3, 4) Ɛnyɛlɔ, lo diaaso dimɔtshi etena kakakɔmɔ Yeso efula, nde “akake adwe ndo akatatɛ nɔmba.” Etombelo akɔna waki la dui sɔ? “Ondjelo ɔmɔtshi w’oma l’olongo akɛnama le nde ndo akookeketsha.” (Luka 22:41, 43) Nɛhɛmiya pami ka kɔlamelo, akasowe oma le anto wa kɔlɔ wakasalaka la wolo dia mboshimba diaha nde nsala olimu waki Nzambi. Nde akalɔmbɛ ate: ‘Wonya ɔnɛ, lambokɔlɔmba dia wɛ nkeketsha anya ami.’ Awui wakayelana oma laasɔ mɛnyaka dia Nzambi mɛtɛ akookimanyiya dia nde minya wɔma ndo nde monga la etombelo w’ɛlɔlɔ lo olimu ande. (Nehemiya 6:9-16) Reginald, ladjasɛ la Ghana mbutaka lo kɛnɛ kendana la dɔmbɛlɔ ate: “Etena kalɔmbami, djekoleko lo tena diemi l’ekakatanu wamboleka, dimi mongaka la nsaki ka mbuta awui ami le onto ɔmɔtshi lele la akoka wa kimanyiyami ndo wa mbishami eshikikelo ɔnɛ ndooko ɔkɔkɔ wa ndjakiyanya.” Lo mɛtɛ, Nzambi koka tosamba etena kɔɔlɔmbaso.
Lomba l’oma le Nzambi.
Tɛdikɔ tɔmɔtshi tɔsaso koka monga la shɛngiya ya pondjo le so ndo le wanɛ wokaso ngandji. Ko ngande wakokaso mbɔsa tɛdikɔ ta lomba? Bible mbutaka ɔnɛ: “Naka onto ɔmɔtshi l’atei anyu ekɔ l’ohomba wa lomba [djekoleko etena kalɔshanande l’ehemba], nde atetemale nɔmba Nzambi, ko nde ayowoshalɔ, nɛ dia la lokaho tshɛ nde mbishaka anto tshɛ aha la mbahangwɛ.” (Jakɔba 1:5) Naka sho nɔmba lomba, Nzambi koka nkamba la nyuma kande k’ekila dia tɔlɔmbɔla dia sho mbɔsa tɛdikɔ ta lomba. Sho koka nɔmba lo yoho ya shikaa nyuma k’ekila nɛ dia Yeso toshikikɛka dia ‘Shɛso lele l’olongo ayoleka mbisha nyuma k’ekila le wanɛ wɔɔlɔmbatɔ.’—Luka 11:13.
“Lakalɔmbɛ Jehowa l’etete dia nkondja ɛlɔmbwɛlɔ dia mbɔsa yɛdikɔ ya dimɛna.”—Kwabena, Ghana
Kaanga Yeso aki l’ohomba wa nɔmba She dia nkondja ekimanyielo dia mbɔsa tɛdikɔ t’ohomba. Bible totɛka dia etena kakandalange nsɔna apami 12 wakahombe ndjokamba oko apɔstɔlɔ ande, nde “akalɔmbɛ Nzambi otsho w’otondo.”—Luka 6:12.
L’ɛnyɛlɔ ka Yeso, anto efula wakakondja ekeketshelo etena kakawɛnyi woho wakakadimola Nzambi alɔmbɛlɔ awɔ dia mbasha ekimanyielo dia mbɔsa tɛdikɔ ta lomba. Regina, ladjasɛ la Philippines mbutaka dia nde akahomana l’ekakatanu wotshikitanyi, ɛnyɛlɔ oko, ndjasɛnya ndaamɛ ndo sɛnya nkumbo kande l’ɔkɔngɔ wa nyɔi k’omɛnde, akashisha olimu ndo akahomana l’ekakatanu dia mbodia ana. Kakɔna kakokimanyiya dia mbɔsa tɛdikɔ ta lomba? Nde mbutaka ate: “Lakendɛka lo ekimanyielo ka Jehowa lo tshimbo ya dɔmbɛlɔ.” Kwabena, ladjasɛ la Ghana mbutaka lande na kakandalɔmbɛ Nzambi ekimanyielo: “Lakashisha olimu ami wa wokelo wakawafutaka dimɛna.” Lo kɛnɛ kendana la woho wakandakanaka yimba lo kɛnɛ kakandahombe nsala, nde mbutaka ate: “Lakalɔmbɛ Jehowa l’etete dia nkondja ɛlɔmbwɛlɔ dia mbɔsa yɛdikɔ ya dimɛna.” Nde kotshaka ate: “Lakoke mɛtɛ dia Jehowa akakimanyiya dia dimi nkondja olimu wakimanyiya dia dimi nkotsha ehomba ami wa lo nyuma ndo wa lo demba.” Wɛ lawɔ koka nkondja ɛlɔmbwɛlɔ kaki Nzambi lo nɔmba lo kɛnɛ kendana la akambo wakoka monga la shɛngiya lo diɔtɔnganelo diasayɛ la nde.
Tambɔtɛkɛta paka dia awui angana ato wakoka dɔmbɛlɔ kosalɛ. (Dia nkondja bɛnyɛlɔ efula, enda kiombo yele l’ɔtɛ a dui ɔnɛ: “ Ɛlɔlɔ waya oma lo dɔmbɛlɔ.”) Koko dia wɛ nkondja ɛlɔlɔ ɛsɔ, wɛ pombaka ntondo mbeya Nzambi ndo lolango lande. Naka wɛ nangaka dui sɔ, kete sho kokeketshaka dia wɛ mimbola Ɛmɛnyi wa Jehowa dia vɔ kokimanyiya dia wɛ mbeka Bible. * Dui sɔ koka monga nna diayɛ dia ntondo dia wɛ ndeka ndjasukanya la ‘Ɔnɛ latokaka dɔmbɛlɔ.’—Osambu 65:2.
^ od. 14 Dia mbeya awui akina, ɛnana la Ɛmɛnyi wa Jehowa wa lo ngelo kanyu kana tshɔka lo sitɛ kaso k’Ɛtɛrnɛtɛ ka www.pr418.com.