TƆNDƆ DIA LO BIBLE: ‘Nyotetemale dimanyiyana l’otema ɔtɔi lam’asanyu oko wakanyodimanyiya Jehowa l’otema ɔtɔi, nyu lawɔ pombaka dimanyiya asekanyu.’—Kɔlɔsayi 3:13.

Kakɔna kalembetshiya tɔndɔ sɔ? Lo Bible, pɛkato mbɛdikamaka la dibasa ndo dimanyiya mbɛdikamaka l’ofutelo wa dibasa. (Luka 11:4) Dibuku dimɔtshi mbutaka dia lo Afundelo tshɛkɛta ya lo Grɛkɛ yokadimɔmi ɔnɛ “dimanyiya” nembetshiyaka “mbetawɔ [dia] ntshika dibasa, aha la futsha.” Ɔnkɔnɛ, etena kasɔnaso dia dimanyiyɛ onto ɔmɔtshi lotosale kɔlɔ, sho tshikaka aha la nongamɛ ɛngɔ kɛmɔtshi oma le nde. Nsaki kaso ka dimanyiya halembetshiya dia sho mbetawɔka lɔkɛwɔ la kɔlɔ kana sho mɔnyɔlaka kɔlɔ kotosalewɔ. Koko, sho mbɔsaka yɛdikɔ ya minya kumbɛkumbɛ kaanga kele sho koka monga l’ɔkɔkɔ w’oshika wa monga “la dikambo dia nyangɛ” onto.

Onde tɔndɔ nɛ diekekɔ ohomba nshi nyɛ? Oko weso anto wele kema kokele, sho tshɛ salaka pɛkato. (Rɔmɔ 3:23) Ɔnkɔnɛ, tayonga akanga wa lomba etena kayotodimanyiyɛka anto akina, nɛ dia kema edja kana l’ɔkɔngɔ tayonga l’ohomba w’anto akina todimanyiyɛ. Laadiko wa laasɔ, etena kasɔnaso dia dimanyiya, sho kondjaka wahɔ. Lo ngande?

Etena katshikalaso la kɛlɛ ndo tokumbɛkumbɛ aha la dimanyiyana, shoamɛ ndjasalɛka kɔlɔ. Tokanyi ta kɔlɔ ta ngasɔ koka ndanya ɔngɛnɔngɛnɔ aso, toshimba dia sho nsɛna dimɛna ndo tokonya ɔkɛyi. Tɔ koka tela nto hemɔ ya wolo. Alapɔlɔ w’oma lo Journal of the American College of Cardiology, oma le dɔkɔtɛlɛ Yoichi Chida ndo Andrew Steptoe prɔfɛsɛrɛ ka psychologie, mbutaka ɔnɛ: “Eyangelo wa nshi nyɛ mɛnyaka dia paa ka wolo mongaka le onto lele la kɛlɛ, tokumbɛkumbɛ ndo hemɔ ka l’asolo.”

Lo wedi okina, tende wahɔ waya lo dimanyiya. Etena kadimanyiyaso anto akina l’otema ɔtɔi, sho namaka kaamɛ ndo wɔladi, lo nsala ngasɔ sho kokɛka diɔtɔnganelo diasaso l’anto. Kɛnɛ koleki tshɛ ele, sho mbokoyaka Nzambi ɔnɛ la dimanyiya l’otema ɔtɔi atshi wa pɛkato wayatshumoya ndo lalongamɛ dia sho nsala woho akɔ waamɛ.—Makɔ 11:25; Ɛfɛsɔ 4:32; 5:1.