ASAWO WƆTƆNƐ L’ƆTƐ A DUI WA LO LOHOSO | ONDE NDOOKO WAHƆ WAKONDJASO LO NƆMBA?
Lande na kalɔmba anto?
“Laaki la nsaki k’efula ka nkɛnya owale l’oyango wa nkondja falanga. Lakalɔmbaka dia nkondja ɔngɔnyi. Dikambo sɔ kosalema pondjo.”—Samuel, * Kenya.
“La kalasa sho tshɛ takahombaka mbuta alɔmbɛlɔ wakatakimɛ l’ɔtɛ wanɛ wakawatetsha.”—Teresa, Philippines.
“Dimi nɔmbaka etena kahomanami l’ekakatanu. Dimi nɔmbaka dia edimanyielo ka pɛkato yami ndo dia monga Okristo w’oshika.”—Magdalene, Ghana.
Kɛnɛ kakate Samuel, Teresa, ndo Magdalene mɛnyaka dia anto nɔmbaka l’ɔtɛ w’ɛkɔkɔ efula ndo ɛkɔkɔ ɛmɔtshi wekɔ w’eshika ndeka ekina. Anto amɔtshi nɔmbaka l’otema ɔtɔi ndo alɔmbɛlɔ w’anto akina salemaka aha la nsaki. Koko, oyadi kaanga vɔ wekɔ lo nɔmba dia nkotsha lo ɛgzamɛ la kalasa, kana wekɔ lo nɔmba dia ekipɛ kawɔ mbidja otshumba lo mponde, dia nkondja ɛlɔmbwɛlɔ kaki Nzambi lo lɔsɛnɔ lawɔ la lo nkumbo, kana l’ɔtɛ w’ɛkɔkɔ ekina tshɛ, miliyɔ nkama y’anto wekɔ l’ohomba wa nɔmba. Ndo nto, eyangelo mɛnyaka dia kaanga anto amɔtshi wahayasha l’ɔtɛmwɛlɔ nɔmbaka mbala la mbala.
Onde wɛ nɔmbaka? Ko naka ngasɔ, kakɔna kalɔmbayɛ? Oyadi wɛ ekɔ la mbekelo ka nɔmbaka kana bu, wɛ koka ndjambola ɔnɛ: ‘Onde mɛtɛ ndooko wahɔ wakondjaso lo nɔmba? Onde ekɔ onto ɔmɔtshi lahokamɛ alɔmbɛlɔ?’ Ofundji ɔmɔtshi akɛnya dia dɔmbɛlɔ ekɔ tsho “yoho mɔtshi y’esakelo . . . ekɔ oko onto latɛkɛta la lose lalongande.” Ewandji ɛmɔtshi w’aseka enganga wekɔ la kanyi yakɔ yaamɛ, vɔ mbelɛka dɔmbɛlɔ oko “woho okina w’esakelo.” Onde anto amɔtshi nɔmbaka tsho oko mbekelo, ko kana vɔ kondjaka wahɔ l’ɔtɛ wa dui sɔ?
Lo wedi okina, Bible totɛka awui efula wendana la dɔmbɛlɔ oleki tsho yoho mɔtshi y’esakelo. Tɔ totɛka dia onto ɔmɔtshi mɛtɛ ekɔ lo mpokamɛ alɔmbɛlɔ wasalema lo yoho ya dimɛna ndo lo akambo w’amɛna. Onde dui sɔ diekɔ mɛtɛ? Ɛsɔ toshikikɛ dui sɔ.
^ od. 3 Nkombo mɔtshi yakatshikitanyema.
