ASAWO WƆTƆNƐ L’ƆTƐ A DUI WA LO LOHOSO | ONDE NDOOKO WAHƆ WAKONDJASO LO NƆMBA?
Onde ekɔ onto ɔmɔtshi lahokamɛ?
Anto amɔtshi mbutaka dia dɔmbɛlɔ eko tsho wetshelo a wenya nɛ dia ndooko onto lahokamɛ. Akina wamboohembaka nɔmba koko vɔ kookondja ekadimwelo. Onto ɔmɔtshi lahetawɔ ɔnɛ Nzambi ekɔ akasha kanyi lo ndjela woho wa fɔnyande wele Nzambi ndo akalɔmbɛ ate: “Ombisha tsho yema ya lumu.” Koko nde akate ate Nzambi “akatshikala tsho ki.”
Koko, Bible toshikikɛka dia Nzambi ekɔ ndo nde pokamɛka alɔmbɛlɔ. Bible kekɔ l’ɛtɛkɛta wakawatɛ anto amɔtshi ambeta ɛnɔnyi efula ɔnɛ: ‘Nzambi ayokooka kɛtshi etena kayondokooka wɛ alela dia nyanga ekimayielo; nde ayokokadimola kam’ayondoka.’ (Isaya 30:19) Divɛsa dikina dia lo Bible mbutaka ɔnɛ: ‘Koko dɔmbɛlɔ dia anto w’ɛlɔlɔ mbɔngɛnyangɛnyaka.’—Tukedi 15:8.
Yeso akalɔmbɛ She, ko nde “akoke alɔmbɛlɔ ande.”—Hɛbɛru 5:7
Bible kɔndɔlaka nto bɛnyɛlɔ dia anto wele alɔmbɛlɔ awɔ wakokɛma. Divɛsa dimɔtshi mbutaka dia Yeso akasale “ɛsɛngɔsɛngɔ w’oma k’ɛse otema . . . le Ɔnɛ laki la akoka wa mboshimbɛ” ndo “Nzambi akoke alɔmbɛlɔ ande.” (Hɛbɛru 5:7) Bɛnyɛlɔ dikina koka tanema lo Danyele 9:21 ndo 2 Ekondo 7:1.
Ko lande na kafɔnya anto amɔtshi dia alɔmbɛlɔ awɔ hawokɛma? Dia alɔmbɛlɔ aso mbokɛma, sho pombaka nɔmba paka Nzambi ka lo Bible mbuta ate Jehowa, * koko aha nzambi kekina kana watshɛso. Ndo nto, Nzambi tɔlɔmbaka dia sho mbɔlɔmba lo ndjela kɛnɛ “kɔtɔnɛ la lolango lande,” mbuta ate, awui wetawɔnde. Nzambi toshikikɛka dia naka sho nɔmba lo yoho shɔ “nde ayotokɛ.” (1 Joani 5:14) Diakɔ diele, dia alɔmbɛlɔ aso mbokɛma, tekɔ l’ohomba wa mbeya Nzambi ka lo Bible ndo mbeka lolango lande.
Anto efula mbetawɔka dia dɔmbɛlɔ bu tsho mbekelo ka l’ɔtɛmwɛlɔ koko ɔnɛ Nzambi ekɔ lo mpokamɛ alɔmbɛlɔ ndo ekɔ lo mbakadimola. Isaac ladjasɛ la Kenya, mbutaka ate: “Lakalɔmbɛ dia nkondja ekimanyielo dia nshihodia Bible. Yema tshitshɛ l’ɔkɔngɔ, onto ɔmɔtshi akasukana la mi ndo akambisha ekimanyielo kakimi la tɔ ohomba.” La Philippines, Hilda akalange ntshika ɔnwɛlɔ wa mfɔka. Nde akɔshi tɛdikɔ mbala efula dia ntshika ɔnwɛlɔ wa mfɔka koko nde akatetemalaka la nnɔ, l’ɔkɔngɔ diko, omɛnde akayowotɛka ate: “Lande na kahayalɔmbɛ Nzambi dia nde kokimanyiya?” Nde akakambe l’alako ndo nde mbutaka ate: “Dimi lakaambe woho wakakimanyiya Nzambi. Dimi lakatatɛ nshisha nsaki kami ka nnɔ mfɔka. Dimi lakayotshika nnɔ mfɔka.”
Onde Nzambi ndjashaka dia kokimanyiya lo ekiyanu ayɛ hita wɔtɔnɛ la lolango lande?
^ od. 6 Jehowa ekɔ lokombo laki Nzambi latanema lo Bible.
