ASAWO WƆTƆNƐ L’ƆTƐ A DUI WA LO LOHOSO
Ngande wɔsa Nzambi awui w’ata?
Ngande wakokayɛ nkadimola lo dimbola sɔ? Anto efula fɔnyaka dia Nzambi mbetawɔka ata. Vɔ mbutaka ɔnɛ nde akadjangɛ atɛmɔdi ande amɔtshi wa lo nshi yakete dia vɔ ndjasha lo awui w’ata; ndo Bible shikikɛka dikambo sɔ. Koko, anto akina mbutaka dia Yeso Ɔna Nzambi aketsha ambeki ande dia vɔ nanga atunyi awɔ. (Mateo 5:43, 44) Diakɔ diele, vɔ fɔnyaka dia lo wedi ɔmɔtshi kanyi ya Nzambi lo dikambo dia awui w’ata ambotshikitana ndo ɛlɔ kɛnɛ nde hayolanga awui w’ata.
Kakɔna kafɔnyayɛ? Onde Nzambi mbetawɔka awui w’ata? Naka ngasɔ, lo lɛkɛ lakɔna lɛkamande lo ewanu watomba ɛlɔ kɛnɛ? Tana ekadimwelo lo ambola asɔ koka monga la shɛngiya lo woho wɔsayɛ awui w’ata. Ɛnyɛlɔ, naka wɛ mbeya dia Nzambi hakomɛ tsho lo mbetawɔ awui w’ata, koko sukɛka lɛkɛ lasukɛyɛ lo ta dimɔtshi, kete ondo aha la taamu wɛ ayoka ɔlɔ lo kɛnɛ kendana la lɛkɛ lasukɛyɛ ele l’eshikikelo ɔnɛ lɔ layodja otshumba. Lo wedi okina, ngande wayoyoyaoka naka wɛ mbeya dia Nzambi ekɔ lo sukɛ lɛkɛ lokina? Ondo wɛ ayonyomokana yimba lo lɛkɛ lakokayɛ nsukɛ.
Ekɔ dui dimɔtshi dioleki ohomba diahombayɛ mbeya. Mbeya woho wɔsa Nzambi awui w’ata koka monga la shɛngiya lo woho wɔsayɛ Nzambi. Naka wɛ ekɔ l’atei wa miliyɔ y’anto wakasowe efula oma lo ata w’ana w’anto, kete aha la taamu wɛ ekɔ l’ohomba wa nkondja okadimwelo lo dimbola di’ɔnɛ, Oko wafɔnya anto amɔtshi, onde Nzambi ekɔ onto lele lo kiɔkɔ y’ata letawɔ kana lakeketsha asui waya oma lo ata, ko kana nde tshikaka ndo bu lo kiɔkɔ ya awui w’ata wasoya anto?
Wɛ koka mamba dia mbeya dia okadimwelo washa Bible ntshikitana etale la tokanyi tɔsɔ. Laadiko dia laasɔ, ntatɛ oma ko nshi yakete polo ndo nshi nyɛ, kanyi yaki Nzambi lo dikambo dia awui w’ata yekɔ woho akɔ waamɛ. Ɛsɔ tɔsɛdingole kɛnɛ kata Bible lo woho wakɔsaka Nzambi awui w’ata lo nshi yakete, lo ntambe ka ntondo ndo etena kaki Yeso la nkɛtɛ. Kɛsɔ ayotokimanyiya dia sho mbeya woho wɔsa Nzambi ta ɛlɔ kɛnɛ ndo kana ta diayonga l’atei w’akambo w’anto lo nshi yayaye.