Ntondotondo, tokeketshame la dui dia mɛtɛ nɛ: Nzambi ekɔ lo mɛna asui wele lo andja ɔnɛ ɛlɔ kɛnɛ ndo nde ayanga nsala dui dimɔtshi lo kɛnɛ kendana l’asui asɔ. (Osambu 72:13, 14) Lo Ɔtɛkɛta ande Bible, Nzambi ekɔ lo ndaka dia ‘wanɛ wasoyama wayokondja momuya.’ Etena kakɔna? “Etena kayɛnama Nkumadiɔndjɔ Yeso oma l’olongo la andjelo ande wa wolo . . . etena kayondɔsɔmbɔya wanɛ waheye Nzambi ndo wanɛ wahakitanyiya lokumu l’ɔlɔlɔ lendana la Nkumɛso Yeso.” (2 Tɛsalɔnika 1:7, 8) Wɛnamelo wa Yeso ɔsɔ wayosalema lo nshi yayaye lo kɛnɛ kelɛ Bible ɔnɛ “ta dia lushi la woke la Nzambi Kanga-Wolo-Tshɛ,” ta sɔ mbeyamaka nto oko Aramangɛdɔna.—Ɛnyɛlɔ 16:14, 16.

Lo ta diayaye sɔ, Nzambi ayokamba aha l’anto, koko l’Ɔnande Yeso Kristo kaamɛ la ditongami dikina dia lo nyuma diele la wolo dia ndɔsha anto wa kɔlɔ. Alembe wa l’olongo wayokomiya ɔhɛnyɔhɛnyɔ tshɛ.—Isaya 11:4; Ɛnyɛlɔ 19:11-16.

Polo ɛlɔ kɛnɛ, kanyi ya Nzambi lo dikambo dia ta yatatshikitana. Nde ekɔ lo ntetemala mbɔsa ta oko yoho ya dimɛna ya nkomiya ɔhɛnyɔhɛnyɔ ndo awui wa kɔlɔ. Koko oko wakidiɔ mɛtɛ lo ɔkɔndɔ w’otondo, paka Nzambi ndamɛ mbele la lotshungɔ la nshikikɛ etena kahomba ta ndɔma ndo onto lahomba dilɔsha. Oko wakatɛnyi, Nzambi amboshilaka nshikikɛ dia ta diayɔlɔma dia nkomiya awui wa kɔlɔ  ndo nsɔmbɔya lo wahɔ wa wanɛ wahɛnyahɛnyama ayonga ta dia lo nshi yayaye ndo ta sɔ diayɔlɔshama oma le Ɔnande, Yeso Kristo. Kɛsɔ mɛnyaka dia ata walɔma ɛlɔ kɛnɛ hawetawɔma le Nzambi, oyadi l’ɔtɛ w’ɔkɔkɔ akɔna w’oshika wakokawɔ ndɔsha.

Tɔshi ɛnyɛlɔ kɛnɛ: Ohɔsa dia ana ahende w’apami wambotatɛ ndɔ etena kele papa kawɔ bu laawɔ. Vɔ wambotokotshika ndɔ ndo wambelɛ papa kawɔ lo telefɔnɛ. Ɔna ɔmɔtshi ambota dia okina mbakatate la ta, etena kele okina ekɔ lo mbuta dia wakoosale awui wa kɔlɔ. Vɔ akɔ ahende wambelɛ papa kawɔ, onto l’onto ekɔ lo nongamɛ dia nde ayowɛkama lo owanu awɔ. Koko, l’ɔkɔngɔ wa nde mbahokamɛ vɔ akɔ ahende, shɛwɔ ambowatɛ dia vɔ mpembola ta ndo mbokonga dia nde ndjodja wɔladi etena kayondokalola la ngelo. L’etena kɛmɔtshi ana akɔ ahende wambokonga. Koko, keema edja vɔ wambotatɛ ndɔ nto. Etena kambokalola papa la ngelo, nde hangɛnyingɛnyi kɛnɛ kakasadi ana akɔ ahende ndo ambowasha dilanya vɔ tshɛ nɛ dia vɔ hawookitanyiyisha.

Ɛlɔ kɛnɛ, wedja walɔshana mbelɛka Nzambi mbala efula dia mbaasukɛ. Koko Nzambi hete ndooko wedi lo ata walɔma ɛlɔ kɛnɛ. Ndo lo Ɔtɛkɛta ande Bible, nde mbutaka hwe ate: “Tanyokaloyake kɔlɔ lo kɔlɔ” ndo ɔnɛ “tanyɔsɔmbɔyake.” (Rɔmɔ 12:17, 19) Laadiko dia laasɔ, nde akeyanya dia anto pombaka ‘kongaka la solo dia lotutsha tshɛ le nde’ dia nde nsala kɛnɛ kayondosala lo Aramangɛdɔna. (Osambu 37:7) Etena katona wedja dia nkonga Nzambi ko wekɔ lo ndjasha dia ndɔ ata, nde mbɔsaka ata asɔ oko etsha wa lotamanya w’awui wa ngala wawosha lonyangu. Ɔnkɔnɛ, lo ta dia Aramangɛdɔna, Nzambi ayɛnya kɛlɛ kande ndo ayokomiya ewanu w’anto mbala ɔtɔi lo pondjo lo ‘nkomiya ata lo nkɛtɛ k’otondo.’ (Osambu 46:9; Isaya 34:2) Lo mɛtɛ, Aramangɛdɔna ayonga ta diayokomiya ata tshɛ.

Ekomelo k’ata tshɛ ekɔ ɔtshɔkɔ ɔmɔtshi l’atei w’ɛtshɔkɔ efula wa Diolelo diaki Nzambi. Yeso akatɛkɛta dia lowandji lɔsɔ lo dɔmbɛlɔ dieyama nɛ: “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.” (Mateo 6:10) Diolelo diaki Nzambi honya paka ata ato, koko diɔ diayonya ndo kiɔkɔ ya ta, mbuta ate awui wa kɔlɔ. * (Osambu 37:9, 10, 14, 15) Diakɔ diele keema dui dia diambo lo woho wele ambeki waki Yeso wekɔ lo nkongɛ l’asolo walomɔlomɔ ɛtshɔkɔ wa Diolelo diaki Nzambi.—2 Petero 3:13.

Ko edja ka ngande kahombaso nkonga dia Diolelo diaki Nzambi nkomiya asui tshɛ, ɔhɛnyɔhɛnyɔ ndo awui wa kɔlɔ? Ekotshamelo ka prɔfɛsiya ya lo Bible mɛnyaka dia tekɔ lo nsɛna lo “nshi y’ekomelo” ka dikongɛ nɛ di’akambo. (2 Timɔte 3:1-5) * Keema edja, Diolelo diaki Nzambi diayanga nkomiya nshi y’ekomelo nyɛ lo ta dia Aramangɛdɔna.

Oko wakatadiɛnyi, wanɛ wayovɔ lo ta di’ekomelo sɔ ekɔ wanɛ watona dia ‘nkitanyiya lokumu l’ɔlɔlɔ lendana la Nkumɛso Yeso.’ (2 Tɛsalɔnika 1:8) Koko, ohɔ dia Nzambi hangɛnangɛna nyɔi k’onto tshɛ, oyadi onto la kɔlɔ. (Ezekiyele 33:11) Lam’ele “nde halange di’onto ɔmɔtshi ndanyema,” lo ta di’ekomelo, nde nangaka dia lokumu l’ɔlɔlɔ lendana la Nkumɛso Yeso ‘sambishama lo nkɛtɛ k’otondo oko ɔmɛnyi le anto wa lo wedja tshɛ’ la ntondo k’ekomelo ndja. (2 Petero 3:8, 9; Mateo 24:14; 1 Timɔte 2:3, 4) Lo mɛtɛ, lo tshimbo y’olimu wa l’andja w’otondo w’esambishelo w’Ɛmɛnyi wa Jehowa, anto ɛlɔ kɛnɛ wekɔ la diaaso dia mbeya Nzambi, dia nkitanyiya lokumu l’ɔlɔlɔ lendana la Yeso ndo nsɛna dia mɛna lushi layokomɛ awui w’ata tshɛ.