Ohɔsa dia wɛ ekɔ lo tembola wodja wahayeye mbala ka ntondo. Wɛ ambohomana l’anto, mbekelo, diangɔ dia ndɛ ndo falanga yele wɛ heye. Mbokɛmaka dia, ondo wɛ mbeyaka ntshimba wɔɔngɔ.

Wɛ koka ndjaoka woho akɔ waamɛ etena kadiayɛ Bible mbala ka ntondo. Wɛ tanemaka lo andja w’edjedja wakoka mɛnama oko oyoyo le yɛ. Lɔkɔ wɛ ambohomana l’anto wetawɔ ase Filistiya, ambohomana la mbekelo yahayeye yele oko ‘mbatshatsha ahɔndɔ,’ kana ambeya dikambo dia mma dielɛwɔ mana ndo dia falanga y’ekenga. (Etumbelu 16:31; Jashua 13:2; 2 Samuele 3:31; Luka 15:9) Awui asɔ tshɛ koka kodja l’okandokando. Oko wediɔ lo kɛnɛ kendana la membola wodja wahayeye, shi wɛ ayɔngɛnangɛna nkondja ekimanyielo oma le onto ɔmɔtshi lakoka kolembetshiya akambo dimɛna?

Ntatɛ oma ko etena kakatatɛ efundelo w’ekila fundama lo ntambe ka 16 ntondo ka Yeso mbotɔ, anto wakalongola ekimanyielo dia vɔ nshihodia Bible. Ɛnyɛlɔ, Mɔsɛ ɔnɔmbɔdi wa ntondo wa wodja w’Isariyɛlɛ, ‘akatatɛ nembetshiya’ anto kɛnɛ kakafundama.—Euhwelu k’Elembe 1:5.

Embetsha w’Afundelo waki l’akoka wakatetemala monga polo ndo ɛnɔnyi kinunu l’ɔkɔngɔ. Lo 455 ntondo ka Yeso mbotɔ, olui a woke w’ase Juda mbidja ndo ana w’akɛnda efula wakatshumana kaamɛ lo dihole dia lo sɛkɛ l’osomba wa Jɛrusalɛma. Embetsha wa Bible waki lɛkɔ ‘wakadia awui w’oma lo dibuku diakɔ la dui dia wolo.’ Koko vɔ kookomɛ laasɔ ato. ‘Vɔ wakakimanyiya anto dia nshihodia kɛnɛ kakadiemaka.’—Nehemiya 8:1-8.

Ɛnɔnyi nkama tshanu l’ɔkɔngɔ, Yeso Kristo akayoyasha lo olimu akɔ waamɛ. Lo mɛtɛ, nde mbaki onto la ntondo l’atei w’anto lakeyama oko ombetsha. (Joani 13:13) Nde aketshaka elui a weke w’anto ndo onto l’onto. Lo diaaso dimɔtshi, nde akatɛkɛta la olui a woke w’anto lo mbasha Dako dia lo dikona ndo “elui w’anto wakambe efula lo yoho yande ya mbetsha.” (Mateo 5:1, 2; 7:28) Lo eleko kamɔnga akatshi ka lo 33 l’ɔkɔngɔ wa Yeso mbotɔ, Yeso akatɛkɛta l’ambeki ande ahende etena kakawatakɛndakɛndaka lo mboka k’otsha lo ngelo kakasukana la Jɛrusalɛma, ko nde ‘akaalembetshiya Afundelo dimɛna.’—Luka 24:13-15, 27, 32.

Ambeki wa Yeso vɔ lawɔ waki embetsha w’Ɔtɛkɛta wa Nzambi. Lo diaaso dimɔtshi, ɔlɛnga ɔmɔtshi w’ose Etiyɔpiya akadiaka etenyi kɛmɔtshi k’Afundelo. Ombeki wakawelɛka Filipɛ akasukana lalende ko akawombola ate: “Onde wɛ mɛtɛ ekɔ lo nshihodia kɛnɛ katayadia?” Ose Etiyɔpiya akookadimola ate: “Ngande mɛtɛ wayomoshihodia naka onto hambetshisha?” Oma laasɔ Filipɛ akoolembetshiya kitshimudi ya kɛnɛ kakandadiaka.—Etsha 8:27-35.

L’ɛnyɛlɔ k’embetsha wa Bible wa lo nshi yakete, Ɛmɛnyi wa Jehowa ɛlɔ kɛnɛ wekɔ lo ndjasha l’olimu wa ndakanya anto Bible lo wedja 239 l’andja w’otondo. (Mateo 28:19, 20) Lomingu la lomingu, vɔ kimanyiyaka anto ndekana miliyɔ divwa dia vɔ nshihodia Bible. Efula ka ambeki asɔ wekɔ anto wele bu Akristo. Wekelo ɛsɔ salemaka ofele ndo kokaka salema laka onto kana dihole dikina diayowokana. Anto amɔtshi ngɛnangɛnaka mbeka lo telefɔnɛ kana lo vidɛo lo nkamba la ɔrdinatɛrɛ kana la telefɔnɛ ka l’anya.

Lam’alangayɛ ɛnana l’Ɔmɛnyi wa Jehowa ɔmɔtshi dia wɛ mbeya awui akina wendana la woho wakokayɛ nkondja wahɔ oma lo ekongelo kɛsɔ. Wɛ ayoshola dia Bible bu dibuku dia wolo nshihodia, koko tɔ kekɔ “ohomba dia mbetsha, dia mingola, dia mbidja akambo l’ɔnɔngɔ ndo dia mpokola lo losembwe,” kele wɛ “onge l’akoka tshɛ ndo la kɛnɛ tshɛ kahombama dia nsala olimu w’ɔlɔlɔ tshɛ.”—2 Timɔte 3:16, 17.