Onde ekɔ tsho eokelo ka tshitshɛ kele bu kɔlɔ efula?
Yana ya yimato mɔtshi ambɛna edinga watomba oma l’ɔlɔnda wa l’izinɛ ndo wambotshumana ko wambosala oko wange. Nde ambota mbala kakɔ ɔtɔi ate oyango wele la izinɛ ele wa salaka wange. Yema ya eokelo ka kɔlɔ ka ngasɔ konga la ana koka mbɔsama oko dui dia shɛkɛsɛkɛ. Koko, eokelo ka kɔlɔ ka woke koka monga la shɛngiya lo nsɛnɔ yaso. Ɛnyɛlɔ, naka onto hadisha dimɛna awui wɛnya woho wa nkamba la okanga ɔmɔtshi, kete dui sɔ koka monga la etombelo wa kɔlɔ.
Eokelo ka kɔlɔ kendana la awui wa lo nyuma koka monga la etombelo woleki tshɛ kɔlɔ. Ɛnyɛlɔ, anto amɔtshi waki la eokelo ka kɔlɔ kendana la wetshelo waki Yeso. (Joani 6:48-68) Lo dihole dia nyomeka awui akina, vɔ wakatone kɛnɛ tshɛ kaketshaka Yeso. Ande woho wakawashisha lee!
Onde wɛ mbadiaka Bible dia nkondja ɛlɔmbwɛlɔ? Kɛsɔ mbalɔmbamaso dia salaka. Onde ekɔ waale dia wɛ koka monga la eokelo ka kɔlɔ lo kɛnɛ kadiayɛ? Dui sɔ diambokomɛka anto efula. Tɔsɛdingole bɛnyɛlɔ sato dieyama dia eokelo ka kɔlɔ.
-
Anto amɔtshi wekɔ la eokelo ka kɔlɔ lo woho watɔlɔmba Bible dia sho mboka “Nzambi ka mɛtɛ wɔma.” Vɔ fɔnyaka dia sho nɔmbamaka dia mboka Nzambi wɔma wa kɔlɔ. (Ondaki 12:13) Koko Nzambi halange di’anto wɔtɛmɔla mbooka wɔma wa ngasɔ. Nde mbutaka ate: “Tokake wɔma, nɛ dia dimi lekɔ kaamɛ la yɛ. Toyakiyanyake, nɛ dia dimi kele Nzambi kayɛ. Dimi layokokeketsha, eelo, dimi layokokimanyiya.” (Isaya 41:10) Lo tshena pe, mboka Nzambi wɔma nembetshiyaka monga la diambo ndo la dilɛmiɛlɔ d’efula otsha le nde.
-
Onde okama wa nkɛtɛ wayolongola la dja?
Anto amɔtshi wekɔ la eokelo ka kɔlɔ ka ɛtɛkɛta wakasambiyama wata ɔnɛ: “Dikambo tshɛ diekɔ la etena kadiɔ, . . . etena ka mbotɔ la etena ka mvɔ.” Vɔ mbutaka ɔnɛ Nzambi akakongɛ etena shikaa kayovɔka onto l’onto. (Ondaki 3:1, 2) Koko kɛnɛ kele mɛtɛ ele, avɛsa anɛ wekɔ lo ntɛkɛta di’akambo weta lo lɔsɛnɔ ndo vɔ mbutaka dia nyɔi ekɔ dui diatokomɛ sho tshɛ. Ndo nto, Ɔtɛkɛta wa Nzambi mbetshaka dia tɛdikɔ taso koka monga la shɛngiya lo otale wa lɔsɛnɔ laso. Ɛnyɛlɔ, Bible mbutaka ɔnɛ: “Wɔma wa Jehowa taloyaka lɔsɛnɔ.” (Tokedi 10:27; Osambo 90:10; Isaya 55:3) Lo ngande? Ɛnyɛlɔ, naka sho nɛmiyaka Ɔtɛkɛta wa Nzambi, kete dui sɔ diayototshutshuya dia sho mbewɔ awui wakoka ndanya yonge yaso, wele oko wodjwelo wa wanu ndo awui wa mindo.—1 Kɔrɛtɔ 6:9, 10.
-
Anto amɔtshi mbɔsaka dia ekɔ lo yoho ya mɛtɛ mɛtɛ mbata Bible dia olongo la nkɛtɛ ‘wambolamema dia tshumbama la dja’ ndo vɔ mbutaka dia Nzambi ayolanya okama wa nkɛtɛ ɔnɛ. (2 Petero 3:7) Koko Nzambi ndakaka dia nde hetawɔki pondjo dia okama a nkɛtɛ ɔnɛ ndanyema. Nzambi “akashikikɛ nkɛtɛ lo atshina ayɔ; yɔ hayomɔki oma lo dihole diayɔ pondjo pondjo.” (Osambo 104:5; Isaya 45:18) Ɔnkɔnɛ, dikongɛ di’akambo dia l’andja ɔnɛ wa kɔlɔ mbayolanyema lo pondjo watekana oko la dja koko aha nkɛtɛ ya mɛtɛ mɛtɛ. Lo kɛnɛ kendana la olongo, etena kakambawɔ la tshɛkɛta shɔ lo yoho ya mɛtɛ mɛtɛ, yɔ koka mendana la olongo, loowa loludi la tɔɔtɔ kana edjaselo ka Nzambi. L’atei wa diangɔ sɔ, ndooko ɛngɔ kɛmɔtshi kayolanyema.
LANDE NA KELE LO TENA DIMƆTSHI ANTO HAWOSHIHODIA BIBLE?
Oko wakokayɛ mɛna oma lo bɛnyɛlɔ sɔ, mbala efula anto mongaka la eokelo ka kɔlɔ k’avɛsa wadiawɔ lo Bible. Ko lande na ketawɔ Nzambi dui sɔ salema? Anto amɔtshi koka monga la ekanelo kɛnɛ: ‘Naka Nzambi ekɔ la lomba l’efula ndo mbeyaka akambo tshɛ, kete nde otokoka tosha dibuku diakafundama hwe hwe diakoka onto tshɛ nshihodia aha l’okakatanu. Ko lande na kakinde kosala dikambo sɔ?’ Tɔsɛdingole ɛkɔkɔ esato wɛnya lande na kele mbala efula anto amɔtshi mongaka la eokelo ka kɔlɔ ka Bible.
-
Luka 10:21) Bible kakafundama lo yoho yele paka wanɛ wele l’ekanelo k’ɔlɔlɔ mbakoka nshihodia losango lele lɔkɔ. Anto wele la yimba y’otako, mbuta ate wanɛ tshɛ wɔsa dia wekɔ “akanga wa tomba ndo ambeyi wa mukanda” mongaka la eokelo ka kɔlɔ ka Bible. Koko anto wadia Bible la yimba ya “ana w’akɛnda,” mbuta ate la okitshakitsha ndo wele la nsaki ka mbeka, kondjaka difuto lo monga la eokelo ka dimɛna efula ka losango laki Nzambi. Ande woho wakafunde Nzambi Bible la lomba lee!
Bible kakafundama dia tɔ shihodiama oma le anto wele la okitshakitsha ndo walanga mbeka. Yeso akatɛ She ate: “Papa, wɛ Owandji w’olongo la nkɛtɛ, lambokotombola lo sɛkɛ, nɛ dia wɛ akashɛ akanga wa tomba ndo ambeyi wa mukanda awui anɛ, ko ambowashola le ana w’akɛnda.” ( -
Bible kakafundama dikambo di’anto wele l’ohomba w’ekimanyielo kaki Nzambi l’otema ɔtɔi dia kishihodia. Yeso akɛnya di’anto wayonga l’ohomba w’ekimanyielo dia nshihodia dimɛna kɛnɛ kakandetsha. Ngande wakawakoke kikondja? Yeso akalembetshiya ɔnɛ: “Okimanyedi, nyuma k’ekila kayotoma Papa lo lokombo lami, kayonyetsha akambo tshɛ.” (Joani 14:26) Ɔnkɔnɛ, Nzambi kimɔka nyuma kande k’ekila, mbuta ate wolo ande wakamba olimu dia nkimanyiya anto dia vɔ nshihodia kɛnɛ kadiawɔ lo Bible. Lam’ele Nzambi minyaka nyuma kande k’ekila oma le anto wahayaɛkɛ le nde dia nyanga ekimanyielo, diakɔ diele mbala efula vɔ mongaka la eokelo ka kɔlɔ ka Bible. Ndo nto, nyuma k’ekila tshutshuyaka Akristo wele la ewo, dia vɔ nkimanyiya wanɛ walanga monga la eokelo ka dimɛna ka Bible.—Etsha 8:26-35.
-
Anto koka ndjoshihodia avɛsa amɔtshi wa lo Bible paka lo etena kasungana. Ɛnyɛlɔ, wakatɛ omvutshi Danyɛlɛ dia nde mfunda losango lendana la nshi yayaye. Ondjelo akawotɛ ate: “Danyɛlɛ, lama ɛtɛkɛta ɛnɛ sheke ndo diha dibuku nɛ polo lo etena k’ekomelo.” L’edja k’ɛnɔnyi nkama, anto efula wakadiaka dibuku dia Danyɛlɛ koko vɔ kokoka dishihodia dimɛna. Lo mɛtɛ, kaanga Danyɛlɛ ndamɛ koshihodiaka awui amɔtshi wakandafunde. L’okitshakitsha tshɛ nde akafunde ate: “Dimi lakoke, koko dimi kokoka nshihodia.” L’edjedja ka wonya, anto wakahombe ndjoshihodia dimɛna prɔfɛsiya ka Nzambi kakafunde Danyɛlɛ, koko paka lo etena kɛmɔtshi ka l’ɔkɔndɔ kakasɔnɛ Nzambi. Ondjelo akalembetshiya ɔnɛ: “Danyɛlɛ le, tshɔka, nɛ dia ɛtɛkɛta ɛnɛ pombaka namema sheke ndo ndjihama polo l’etena k’ekomelo.” Onto akɔna ayoshihodia losango la Nzambi? “Ndooko kanga kɔlɔ layoshihodia; koko wanɛ wele la shɛnɔdi wayoshihodia.” (Danyɛlɛ 12:4, 8-10) Ɔnkɔnɛ, Nzambi mbishaka kitshimudi y’avɛsa amɔtshi wa lo Bible paka l’etena kasungana.
Onde ambokomɛka Ɛmɛnyi wa Jehowa etena kɛmɔtshi dia monga la eokelo ka kɔlɔ ka Bible? Eelo. Koko lam’akakoke etena ka Nzambi mbetɛ akambo hwe hwe, Ɛmɛnyi wa Jehowa wakatshikitanya eokelo kawɔ. Vɔ waketawɔ dia vɔ mbokoyaka apɔstɔlɔ wa Kristo, wanɛ wele la okitshakitsha tshɛ wakatshikitanya ekanelo kawɔ ka yimba etena kakawangɔma oma le Yeso.—Etsha 1:6, 7.
Ekanelo ka yimba ka kɔlɔ ka yana ya yimato lo kɛnɛ kendana la oma lɛnɛ aya wange koka monga tsho yema ya eokelo ka kɔlɔ. Koko, kɛnɛ ketsha Bible kekɔ ohomba efula le yɛ. Losango la lo Bible lekɔ ohomba efula le onto tshɛ lasala la wolo dia nshihodia lo ndamɛ kɛnɛ kadiande. Ɔnkɔnɛ, yanga ekimanyielo dia nshihodia kɛnɛ kadiayɛ. Yanga wanɛ weka Bible la yimba y’okitshakitsha, anto wayaɛkɛ lo nyuma k’ekila kaki Nzambi dia nshihodia Bible, anto wele l’eshikikelo dia tekɔ lo nsɛna lo etena ka l’ɔkɔndɔ w’ana w’anto kalanga Nzambi dia sho nshihodia Bible lo yoho yahatasalemaka ndooko lushi. Tengengake dia nsawola la Ɛmɛnyi wa Jehowa kana mbadia eyangelo awɔ wa la yambalo tshɛ watanema lo sitɛ k’Ɛtɛrnɛtɛ ka jw.org. Bible ndakaka ɔnɛ: “Naka wɛ mbelɛ dia nyanga yimba . . . , wɛ ayotana ewo ka Nzambi.”—Tokedi 2:3-5.