ASAWO WƆTƆNƐ L’ƆTƐ A DUI WA LO LOHOSO | AMBAHEMI WA MFALASA ANƐI—SHƐNGIYA YELE LA WAHEMELO AWƆ LE YƐ
Woho wendanayɛ la ambahemi wa mfalasa anɛi
Woho wendanayɛ la ambahemi wa mfalasa anɛi Vɔ wekɔ lo ndjaye la wolo tshɛ, sabɔ ya nyama yekɔ lo ndjadje londjo oko dikungola dia mvula. Mfalasa nyɛi ya wolo ndo ambahemi ayɔ ekɔ dui dimɔtshi dia diambo efula, diakɔ diele dui sɔ koka mɛnama oko diɔ bu oma lo Bible. Mfalasa ka ntondo kekɔ wɛma, ɔnɛ lokiahemi ekɔ la lotombo ndo nde oma la nongola dɛmbɔ dia nkoso oko nkumekanga. L’ɔkɔngɔ ande, mfalasa kekina ka beela oko dja kekɔ lo ndjaye ndo ɔnɛ lokiahemi ambonya wɔladi oma lo nkɛtɛ k’otondo. Oma laasɔ ko mfalasa ka sato, tɔ kekɔ odima oko woho watongaka la midi k’otsho, tɔ kekɔ lo ndjɛmbɛ ombahemi wokime kilɔ kele la losango la kɔlɔ lahomba mbewoyama lo kɛnɛ kendana l’ohombelo wa diangɔ dia ndɛ. Mfalasa ka nɛi k’ɛkɛsɛkɛsɛ kekɔ wɔndju, tɔ kekɔ lo mɛnya oyelo wa hemɔ ndo waale ekina wakonya lo nyɔi ndo Nyɔi twamɛ mbahemi laadiko atɔ. Ndo Diombo, mbuta ate odimu a pɛngando diekɔ lo ndjasukana ndo diekɔ lo ndjamane anto oshiki.—Ɛnyɛlɔ 6:1-8.
“Lakandama la wɔma mbala ka ntondo kakamadia dikambo dia ambahemi wa mfalasa anɛi. Lakoke dia Lushi l’Elombwelo lekɔ lo ndjasukana ndo lam’ele dimi komonga suke, lakɛnyi dia haloshimbamɛ.”—Crystal.
“Lakayasha efula lo dikambo dia ambahemi anɛi wotshikitanyi wakahema lo mfalasa yaki la dangi diotshikitanyi. Etena kakameye kitshimudi ya ɛnɛlɔ kɛsɔ, lakashihodia kɛnɛ kalanga awui asɔ mbuta.”—Ed.
Onde wɛ koka nshihodia woho wakayaoke Crystal lo dikambo di’ambahemi wa mfalasa anɛi wa lo dibuku di’Ɛnyɛlɔ? Kana onde wɛ ndjaokaka woho wakayaoke Ed? Oyadi woho tshɛ wayaokayɛ, ɔkɔndɔ wa diambo ɔsɔ wa wahemelo w’ambahemi wa mfalasa anɛi ekɔ l’atei w’awui waleka mbeyama wele lo dibuku di’ekomelo dia lo Bible, mbuta ate lo Ɛnyɛlɔ. Onde wɛ mbeyaka dia wɛmɛ koka nkondja wahɔ naka wɛ nshihodia ɛnɛlɔ kɛsɔ? Ko ngande wakoka dui sɔ salema? Nzambi ndakaka dia wɛ koka monga l’ɔngɛnɔngɛnɔ wa mɛtɛ lo mbadiaka, mbekaka ndo lo sɛnaka lo ndjela awui wakafundama lo dibuku dia prɔfɛsiya sɔ.—Ɛnyɛlɔ 1:1-3.
Kaanga mbele anto amɔtshi wekɔ lo mboka wɔma wa ɛnɛlɔ ka ambahemi wa mfalasa anɛi, eya dia dui sɔ kofundama dia nkotsha wɔma. Koko, miliyɔ y’anto wambɛna dia ɛnɛlɔ kɛsɔ keketshaka mbetawɔ kawɔ ndo mbashaka elongamelo ka nshi yayaye y’amɛna. Kɛsɔ koka monga la wahɔ akɔ waamɛ ndo le yɛ. Lam’alangɛ adia asawo wayela.