Mpota kakahomɔ onto lakakɛnyaka la mi kaki wolo woho wakimi kɔfɔnyaka. Lakɔkɔmɔla ɔfɛkɛ l’ɔhɛmbɛ aha la dimi mbeya. Oko wakamayɛndja onongo, lakayambola dia kana dimi pombaka ntetemala la tɔkɛnyɔ t’ata. Lande na kele mungaka kakamasale kɛsɔ kakakonya dia vɔ kɛnyɔ y’ata yakamalangaka efula ndo nyamomokɛnya ɛnɔnyi efula tshɔdia? La ntondo ka dimi ndjɔkɔndwɛ awui akina, lakayanga tokonyɔkɔndwɛ kɛnɛ kakayokonya dia nkɛnya tɔkɛnyɔ t’ata.

 Lakole lo nkumbo ka wɔladi kakayashaka l’ɔtɛmwɛlɔ w’aseka Mupɛ. Takadjasɛ suke la Buffalo, osomba ɔmɔtshi wa la New York, l’États-Unis. Lakɔtɔ lo kalasa y’aseka Mupɛ ndo laki ɔna lakawangɛnangɛnaka. Ambutshi ami wakalangaka dia dimi la kadiyɛso ntondoya lo lɔsɛnɔ. Laasɔ vɔ wakalange dia dimi ndjakimɔ lo kɛnyɔ mɔtshi yayomosalaka l’ɔkɔngɔ wa kalasa kana dia dimi kambaka lo tena dimɔtshi, aha la dimi mbohɛ dia dimi pombaka monga la pwɛ y’amɛna lo kalasa. Kɛsɔ kakakonya oma ko dikɛnda diami dia dimi mbeya ndjaekiya.

 Lam’akimi l’ɛnɔnyi 17, lakatatɛ mbeka tɔkɛnyɔ t’ata. L’edja k’ɛnɔnyi efula, lakekaka tɔkɛnyɔ tɔsɔ wenya 3 lo lushi ndo nshi 6 lo lomingu. Laketshaka nto wenya efula lomingu tshɛ dia mboholaka lo yimba wa tɛknikɛ ndo toho takɛnya tɔkɛnyɔ takɔ ndo lakendaka tovidɛo dia mbeya woho wa ndjalowanya. Lakekaka nkɛnya tɔkɛnyɔ takɔ washo lodiha, kaanga etena kakamakambaka la dihomɔ. Lakakokaka mpembola abaya kana mbola atafadi mbala ɔtɔi la lonya. Dimi mbaki pidi ndo lakakondja wa kupɛ efula. Lakayɔngɛnangɛnaka tɔkɛnyɔ tɔsɔ efula.

 Lakakome polo lanɛ akamɛnaka dia lambotondoya. Lakalongola dipɔlɔmi dia l’inivɛrsite la pwɛ efula. Wakambɔshi l’olimu lo kɔpanyi kɛmɔtshi oko ɛjɛniyɛrɛ l’awui wa waa ɔrdinatɛrɛ ndo laki la wahɔ efula lo kɔpanyi kɛsɔ. Nd onto, laki la luudu lami ndo laki la la ɔna womoto lakalanganaka la mi. Lɔsɛnɔ lami laki dimɛna efula lo ɛnamelo kami keto, nɛ dia dimi kombeyaka lande na keso la lɔsɛnɔ ndo dui sɔ diakatshindjaka wɔɔngɔ.

 Dia ntana ekadimwelo lo ambola ami, lakatatɛ ntshɔ mbala hiende lo lomingu l’ɔtɛmwɛlɔ ami ndo lakalɔmbaka Nzambi dia nde mbishami ɛlɔmbwɛlɔ. Ko lushi lɔmɔtshi, ɔkɛtshanyelo wa lam’asami l’ɔngɛnyi ami ɔmɔtshi wakatshikitanya lɔsɛnɔ lami. Dimi lakawombola nte: “Onde lushi lɔmɔtshi wɛ amboyambolaka lande na keso lanɛ la nkɛtɛ? Nɛ dia ekakatanu ndo awui wa wɛngiya wambolola tɔɔ!” Nde akambutɛ dia nde akayaoke ambola akɔ waamɛ ndo ɔnɛ nde ambokondjaka ekadimwelo w’eshika oma lo Bible. Nde akambisha dibuku: Wɛ koka nsɛna pondjo pondjo la nkɛtɛ. Nde akanembetshiya dia nde akekaka Bible l’Ɛmɛnyi wa Jehowa. Lakengenga dia nongola dibuku sɔ nɛ dia lakafɔnyaka dia bu dimɛna mbadia dibuku di’ase ɔtɛmwɛlɔ okina. Koko lakalomɔlomɔka efula dia nkondja ekadimwelo lo ambola ami ko lakakombola dia mbeya dia kana wetshelo w’Ɛmɛnyi wa Jehowa waki mɛtɛ.

 Lakambe dia mbishola kɛnɛ ketsha Bible mɛtɛ. Lakele dia l’etatelo, Nzambi akalɔngɔsɔla di’anto sɛnaka pondjo pondjo lo paradiso ka la nkɛtɛ ndo ɔnɛ sangwelo sɔ diatatshikitana. (Etatelo 1:28) Lakatshikala onyɔ hwe dia mbishola lokombo la Nzambi, Jehowa lo Bible kami hita, ekadimwelo kaki nkumekanga Jacques, ndo dia nshihodia ɔnɛ dia lokombo lɔsɔ mbakalɔmbaka Yeso lo dɔmbɛlɔ dia “Shɛso.” (Osambo 83:18; Mateo 6:9) Nd onto, lakayoshihodiaka l’ekomelo lande na katshike Nzambi asui lo tshanda mɔtshi. Tshɛ kakamasholaka kaki ohomba efula. Laki l’ɔngɛnɔngɛnɔ waheyama mbuta!

 Hambohɛki pondjo woho wakamayaoke etena kakamatatɛ mbɔtɔ lo nsanganya y’Ɛmɛnyi wa Jehowa. Anto tshɛ waki ɔlɔlɔ ndo wakamimbolaka lokombo lami. Lo losanganya la ntondo lakamɔtɔ, sawo dia lo sɛkɛ aki sawo dia laande diakalembetshiya woho walɔmbɛlɔ woka Nzambi. Oko wakamalɔmbaka Nzambi dia nde kimanyiyami, ɔtɛ a dui ɔsɔ wakakotola yambalo yami. L’ɔkɔngɔ diko, lakayɔtɔka lo Eohwelo ka nyɔi ka Yeso. Lo nsanganya shɔ tshɛ, lakambe dia mɛna dia kaanga ana wakayelaka wadielo w’avɛsa lo Bible yawɔ. L’etatelo, dimi kombeyaka woho wayangawɔ avɛsa lo Bible, koko Ɛmɛnyi wa Jehowa wakambetsha woho wa nsala dui sɔ.

 Lo yɛdikɔ yakamalekaka mbɔtɔ lo nsanganya mbakamalekaka ngɛnangɛna wetshelo w’Ɛmɛnyi wa Jehowa ndo lakangɛnangɛnaka nɛmɔ diawɔ. Lo losanganya tshɛ, lakekaka awui efula ndo lakakeketshamaka efula.

 Kɛnɛ kakamɛnaka le Ɛmɛnyi wa Jehowa kakatshikitana la kɛnɛ kaki la mbekelo ka mɛna l’ɔtɛmwɛlɔ ami. Lakɛnyi di’Ɛmɛnyi wa Jehowa wekɔ anto wata mɛtɛ, wele kaamɛ ndo wasala tshɛ dia ngɛnyangɛnya Nzambi. Ngandji kokanawɔ kambombetawoya dia vɔ mbele mɛtɛ Akristo wa mɛtɛ.​—Joani 13:35.

 Lo yɛdikɔ yakamatalekaka mbeka, mbakamatalekaka nsala etshikitanu dia nsɛna lo yoho yɔtɔnɛ l’atɔndɔ wa lo Bible. Kaanga mbakidiɔ ngasɔ, lakafɔnyaka dia hatshikaki tɔkɛnyɔ t’ata takamangɛnangɛnaka efula ndo shɛmanedi. Lakasawola dikambo sɔ l’Ɔmɛnyi wa Jehowa wakambetshaka Bible, koko nde akashikikɛ ate: “Tetemala tsho la mbeka Bible ndo dimi mbeyaka dia wɛ ayɔsa yɛdikɔ ya dimɛna.” Kɛsɔ mbakimi mɛtɛ l’ohomba wa mboka. Lo yɛdikɔ yakamatalekaka mbeka, mbakamatalekaka nkombola ngɛnyangɛnya Jehowa.

 Koko, lushi lakamahomuya aha l’okonda ɔnɛ lakakɛnyaka lami oko wakamakɔndɔdi l’etatelo, nkum’otema kami kakamɛndja onongo. Oma l’ɔkɔngɔ w’aksida ɔsɔ, lakayambola dimɛna dia kana dimi kokaka monga ombeki wa Kristo ko l’etena kakɔ kaamɛ latetemala la tɔkɛnyɔ t’ata. Lakakanyiya Isaya 2:3, 4, divɛsa diata dia wanɛ wayela atɔndɔ wa Jehowa hawoteka ata nto. Nd onto, Yeso aketsha ambeki ande diaha ndjakimɔ l’awui wa ngala, oyadi wambasalɛ awui la dɛngiya tshɛ. (Mateo 26:52) L’ɔtɛ wa dikambo mbakamatshike kɛnyɔ yakamalangaka efula shɔ.

 Oma laasɔ, lakakambe la dako dia lo Bible nɛ: “Oyaketembole lo ndjadjɛ oyango wa mamema Nzambi.” (1 Timɔte 4:7) Wenya tshɛ wakametshaka lo tɔkɛnyɔ t’ata ndo wolo tshɛ wakakambaka la mi lo tɔkɛnyɔ tɔsɔ, mbomokamba lawɔ lo diɔtɔnganelo diasami la Nzambi ndo l’olimu wokambɛmi. Lam’ele womoto lakalanganaka lami kombetawɔ kɛnɛ kakamekaka, laasɔ takahembola diɔtɔnganelo diaso. Ngɔndɔ ka ntondo 24, 1987, lakabatizama oko Ɔmɛnyi wa Jehowa ndo lakakome osambisha wa lo tena tshɛ ndo lekɔ l’olimu wa lo tena tshɛ polo ndo ɛlɔ. Mbuta ate lekɔ lo mbetsha etenyi ka woke ka wenya dia mbetsha Bible ofele. L’etena kɛmɔtshi, lakakambe lo tena lo Mbalasa ka l’États-Unis, New York k’Ɛmɛnyi wa Jehowa kalɔmbɔla olimu wa l’andja w’otondo.

 Etena kɛnɛ kamomeya akambo wa mɛtɛ wendana la Nzambi, laya la kɛnɛ kakimi komonga la tɔ lo lɔsɛnɔ. Handjoka diele oko lɔsɛnɔ lami lekɔ anyanya. Laya l’oyango w’oshika lo lɔsɛnɔ, lekɔ l’elongamelo k’oshika ndo lekɔ l’ɔngɛnɔngɛnɔ w’efula. Dimi sotshasotshaka demba la mbala, koko dui sɔ diaya bu ɛngɔ koleki ohomba le mi. Kɛnɛ koleki ohomba le mi ele kambɛ Jehowa.

 Etena kakamakɛnyaka tɔkɛnyɔ t’ata, dimi lakambalɛka wonya tshɛ, mbuta ate laki wonya tshɛ suke dia ndjakokɛ naka onto olanga ndɔshami. Ɛlɔ kɛnɛ, laya wonya tshɛ suke dia nsala dui dikina, dui diakɔ ko salɛ wonyami onto kɛnɛ kele ɔlɔlɔ. Bible ambokimanyiya dia nkoma onto lele la lokaho l’efula ndo omi l’ɔlɔlɔ efula le wadɛmi l’olangala efula, Brenda.

 Lakalangaka tɔkɛnyɔ t’ata. Koko lakayɔhɛnyaka tɔkɛnyɔ t’ata la dui dimɔtshi dia dimɛna efula. Oko wadita Bible: “Nɛ dia osutshesutshelo wa demba keema la wahɔ efula, koko omamemelo le Nzambi ekɔ la wahɔ lo akambo tshɛ, nɛ dia vɔ wekɔ la daka dia lɔsɛnɔ la kakianɛ ndo lɔsɛnɔ la lo nshi yayaye.”​—1 Timɔte 4:8.