Lakodiama l’ɔtɛmwɛlɔ w’ase Mupɛ. Nkumbo kaki kakadjasɛka la Rochester, osomba ɔmɔtshi wa la New York. Lam’akimi l’ɛnɔnyi enanɛi, ambutshi ami wakakakitɔna. L’atei wa lomingu, lakadjasɛka la mama, ɔnɛ lakadjasɛka lo mvudu mɔtshi yahangiyawɔ anto, koko lo wikɛndɛ, lakatshɔka le papa lakadjasɛka lo kartiye kɛmɔtshi k’ase ɔngɔnyi. Etena kakamɛnaka woho wakadisowɛka mama dia mbodia anande asamalo, dimi lakatatɛ mɛna dɔ dia nkoma ɔngɔnyi dia nsukɛ nkkumbo kami.

 Oko wakandalangaka dia dimi ntondoya lo lɔsɛnɔ, papa akatshu la mi dia dimi tembola kalasa mɔtshi ya lokumu yendana l’awui w’ɔtɛlɛ. Dui sɔ diakangɛnyangɛnya efula. Lakafundja lokombo lo kalasa shɔ, lele l’eshikikelo dia Nzambi mambokadimola l’alɔmbɛlɔ ami dia dimi nkoma ɔngɔnyi ndo l’ɔngɛnɔngɛnɔ. L’edja k’ɛnɔnyi etanu, lakeke awui wendana la woho wa nɔmbɔla elimu wa l’ɔtɛlɛ, menda tshungɔ yele l’amundji w’okanda ndo awui wa falanga wa lo kɔpanyi, ko k’etena kakɔ kaamɛ lakamba lo ɔtɛlɛ-kazino wa la Las Vegas, osomba weyama efula la Nevada.

 Lam’akimi l’ɛnɔnyi 22, laki ɔhɛna waki onto lakahɔna l’owandji w’ɔtɛlɛ. Wakambɔsaka oko ose ɔngɔnyi, mbuta ate onto lambotondoya lo lɔsɛnɔ. Mbala efula, lakalɛka mbo ya ndɛ yoleki oshinga wolo ndo wanu woleki oshinga wolo. Lo kɔpanyi, anto amɔtshi wakalangaka mbuta ɔnɛ: “Ka washo lo ɛngɔ kakɛndjakɛndja andja ɔnɛ, mbuta ate falanga.” Lo kanyi yawɔ, falanga mbaki sheke y’ɔngɛnɔngɛnɔ.

 Olimu ami aki wa nkotsha kɛnɛ kakalɔmbaka akanga w’ɛngɔnyi efula wakayaka ndjɔkɛnya la Las Vegas. Kaanga mbakiwɔ ɛngɔnyi efula, vɔ wakɛnamaka dia vɔ bu l’ɔngɛnɔngɛnɔ. Oma lɔkɔ, lo yɛdikɔ yakamatalekaka nkondja falanga, mbakamatalekaka monga la lonyangu. Ndo lakayambolaka dia kana ekɔ mɛtɛ ɔlɔlɔ ntetemala monga la lɔsɛnɔ. Yoho yami ya lɔsɛnɔ yakambishaka okiyanu efula, diakɔ diakamambola Nzambi nte: “Lende akokami ntana ɔngɛnɔngɛnɔ wa mɛtɛ.”

 L’etena kɛsɔ, akadiyɛmi amɔtshi ahende wanɛ wakakaome Ɛmɛnyi wa Jehowa wakadjasɛ la Las Vegas. Dimi kombetawɔka ekanda wakawambishaka, koko laketawɔka mbadia Bible kami kaamɛ la wɔ. Lo Bible kami, ɛtɛkɛta wa Yeso wakafundama l’alɛta wa beela. Lam’ele laketawɔka kɛnɛ tshɛ kakate Yeso, akadiyɛmi wakaleka nkamba la ɛtɛkɛta ande. Ladiaka nto Bible dimɛ.

 Awui efula wakamadiaka wakamambiyaka. Ɛnyɛlɔ, Yeso akate ate: “Etena kalɔmbanyu, tanyokalolɛke tshanana kɛnɛ kakanyatshi oko watosalaka apanganu, wafɔnya ɔnɛ wayowaoka l’ɔtɛ w’efula kawɔ k’awui.” (Mateo 6:7, The New American Bible [NAB]). Koko, ɔlɔmbɛdi ɔmɔtshi akambisha ekishi kɛmɔtshih ka Yeso ndo akambutɛ dia naka dimi nɔmbaka ekishi kɛsɔ lo kalolɛ mbala dikumi disambɛ dia “Shɛso,” ndo mbuta mbala dikumi “Emwe Mariya,” Nzambi ayombisha falanga tshɛ yemi l’ohomba. Ko naka dimi kalolɛ ɛtɛkɛta akɔ waamɛ mbala ko mbala, shi kete laasɔ losala kɛnɛ katona divɛsa? Lakadia nto ɛtɛkɛta wa Yeso wata ɔnɛ: “Tanyetake ndooko onto la la nkɛtɛ ɔnɛ Shɛso, nɛ dia nyekɔ la Shɛnyu ɔtɔi lele l’olongo.” (Mateo 23:9, NAB) Ɔnkɔnɛ, lakayambola nte: “Lande na kele sho aseka Mupɛ mbelɛka ɛlɔmbɔdi aso ɔnɛ waa ‘Mɔpɛrɛ,’ mbuta ate wa ‘Shɛso’?”

 Paka lanɛ wakamayadiaka dibuku dia lo Bible dia Jakɔba mbakamayɛnaka dia dimi pombaka ntshikitanya ɛsɔnwɛlɔ ami wa lo lɔsɛnɔ. Lo tshapita 4, Jakɔba akafunde ate: “Onde hanyeye dia monga ɔngɛnyi w’andja ɔnɛ, nembetshiyaka monga otunyi wa Nzambi? Ɔnkɔnɛ, onto lalanga monga ɔngɛnyi w’andja ɔnɛ amboyaetɛ otunyi wa Nzambi.” (Jakɔba 4:4, NAB) Divɛsa dia 17 diakaleke munandami. Diɔ mbutaka ɔnɛ: “Nɛ dia onto leya nsala kɛnɛ kele ɔlɔlɔ ko nde hakisale, nde ambosala pɛkato.” Ɔnkɔnɛ, dimi lakelɛ akadiyɛmi dia mbatɛ ɔnɛ dimi layanga mimɔ oma lo kɔpanyi ka kazino, nɛ dia ekɔ awui amɔtshi wasalema lɛkɔ wahamayetawɔ, ɛnyɛlɔ oko tɔkɛnyɔ ta falanga ndo awui wa lokaki.

 Lakalangaka monga la diɔtɔnganelo dia dimɛna efula la Nzambi, ndo l’ambutshi ami la analengo l’akadiyɛmi. Oma lɔkɔ, lakɔshi yɛdikɔ ya mbetɛ lɔsɛnɔ lami ɔsɛlɛngɛ dia dimi monga l’akoka wa mbetshaka wenya efula kaamɛ la wɔ. Koko etshikitanu ɛsɔ komonga wɔdu. Ɛnyɛlɔ, wakandakiya elimu wa falanga efula paka lo kɔpanyi k’awui wa tɔkɛnyɔ. Falanga yakamahombe nkondja aki ya difuto diami ndodia l’asato. Koko l’ɔkɔngɔ wa dimi nɔmba lo dikambo sɔ, lakate dia handjokoka nsɛna yoho ya lɔsɛnɔ la ngasɔ. Lakatshike olimu ami, lakayodjasɛ lo garajɛ kaki mama ko lakatonge djimulimu mɔtshi ya plastifiyɛka akatshi w’ase rɛstora wɛnyawɔ diangɔ diakatema.

 Kaanga mbakakimanyiya Bible dia mbeya awui wahombami mbetsha lo dihole dia ntondo, polo l’etena kɛsɔ ko talatshu lo nsanganya y’Ɛmɛnyi wa Jehowa. Ɛmɛnyi wa Jehowa wakamimbola kɛnɛ kakamanyangɛka Ɛmɛnyi wa Jehowa. Lakaakadimola nte: “Ekɔ nɛ dia Nzambi kanyu Jehowa kakitolaka waa nkumbo. Etena kaamɛ kakokami monga kaamɛ l’ase nkumbo ele lushi la fɛtɛ ka Nɔɛlɛ ndo fɛtɛ nkina, koko nyu hanyosale waa fɛtɛ.” Kadiyɛmi kɛmɔtshi l’atei awɔ akatatɛ ndela ndo akamimbola ate: “Ko nshi nkina ya l’ɔnɔnyi, lende atshɔyɛ? Sho kokongaka mbala tshɛ ka kolongola lawakaso. Koko wɛ paka lo ntena dia fɛtɛ shɔ to!” Ɛtɛkɛta ande wakananda otema ami, ko lakatatɛ ndela kaamɛ la nde.

 Lam’akamoke di’Ɛmɛnyi wa Jehowa nangaka nkumbo yawɔ, ndo lo menda woho wakamayakesaka, lakɔshi yɛdikɔ lo losanganya lawɔ lɔmɔtshi lo Mbalasa ka Diolelo. Lakatɛnana la Kevin, ombetsha wa Bible wa manamana ndo nde mbakambetsha Bible.

 Kevin la wadɛnde wekɔ la lɔsɛnɔ l’ɔsɛlɛngɛ ndo lele la wɛdimo diakɔ diewɔ l’etena k’efula dia nkimanyiya anto dia nshihodia Bible. Yema ya dikuta diakawakondjaka akakimanyiyaka dia ntshɔ l’Afrikɛ ndo l’Amérique centrale dia tosha lonya lo wokelo wa waa Bɛtɛlɛ. Vɔ wekɔ atshukanyi wele l’ɔngɛnɔngɛnɔ efula ndo wokana ngandji efula. Vɔ waki la yoho ya lɔsɛnɔ yakamakombolaka.

 Kevin akamɛnya vidɛo yɛnya ɔngɛnɔngɛnɔ waya oma l’olimu wa misiɔnɛrɛ, ko lakɔshi yɛdikɔ ya nkoma misiɔnɛrɛ lushi lɔmɔtshi. Lo 1995, l’ɔkɔngɔ wa ngɔndɔ shamalo wa wekelo wa tshɔtɔpɔngɛ, dimi lakabatizama oko Ɔmɛnyi wa Jehowa. Lo dihole dia nɔmba Nzambi dia nde mbishami ɔngɔnyi, dimi lakɔlɔmbɛ nte: “Tombetɛke wola.” (Tokedi 30:8)

 Ɛlɔ kɛnɛ, laya mɛtɛ ɔngɔnyi. Aha ɔngɛnyi wa l’emunyi, koko wa lo nyuma. Lakahomana la Nuria, wadɛmi la ngandji ɔnɛ lo wodja wa Honduras. Wakatotome oko waa misiɔnɛrɛ lo wodja wa Panama, oma laasɔ ko la Mexique. Bible kekɔ la shadiya ya mbuta ɔnɛ: “Ɔtshɔkɔ wa Jehowa mbangɔnya onto, ndo nde hakotsha kandji laadiko diawɔ”! (Tokedi 10:22)