Wondelo w’esato wasala dia efundelo mɛnama dimɛna
Ngande wanda amundji aso wa foto esato wetɛ ekanda aso amɛna ndo walembetshiya kɛnɛ kofundami? Dia nembetshiya wanya walɔmbama, tɔsɛdingole woho wakakongɛma ndo wakandama foto kele lo lohoso la Réveillez-vous! wa Ngɔndɔ ka divwa 2015. *
Ɔlɔngɔswɛlɔ. L’ɔkɔngɔ wa mbadia sawo diata ɔnɛ: “Kanyi yele la wɛdimo lo dikambo dia falanga,” wanɛ wakamba lo Departɛma dia osangelo w’asango wele la Patterson, New York, lɛnɛ ele tshina dia Kalasa y’Ɛmɛnyi wa Jehowa, wakasange asango dia nembetshiya kɛnɛ kofundami. Oma laasɔ, vɔ wakɛnya ase Kɔmite k’ofundelo ka lo Olui-walɔmbɔla esato akɔ, ko vɔ wakasɔnɛ yoho yahomba foto yakɔ mundama.
Asango amɔtshi wa lo lohoso wakasɛdingɔma oma le Kɔmite k’ofundelo
Dihole. Lo dihole dia vɔ munda foto lo otondo wa bankɛ, olui w’amundji wa foto wakakambe la dɛfu dimɔtshi dia lo tshina dia Kalasa y’Ɛmɛnyi wa Jehowa ko vɔ nsala oko bankɛ. *
Akɛnyi. Wanɛ tshɛ wakasɔnama wekɔ Ɛmɛnyi wa Jehowa ndo wakasale tshɛ dia mfɔna la kiliya ya lo bankɛ ya l’osomba ɔmɔtshi wele l’anto efula. Alapɔlɔ wa kɛnɛ kasalema namemaka diaha ndeka nkamba la shambo yakɔ yaamɛ tena efula lo ekanda aso.
Dihomɔ. Departɛma diendana la asango wakakambe la falanga y’oma lo wodja okina dia mɛnama oko bankɛ ka lo wodja okina aha lo États-Unis. Olui w’amundji wa foto wakakambe la dihomɔ diahombama dia mɛnama oko bankɛ ka mɛtɛ. Craig, omundji ɔmɔtshi wa foto mbutaka ate: “Ndooko ɛngɔ kakohamɛ.”
Ɔlɔtɔ ndo ɔlɔngɔswɛlɔ. Dia mbanda foto ya lo bankɛ, akɛnyi wakaye la ahɔndɔ awɔ vɔamɛ. Koko lam’ele ekɔ ɛngɔ kayotshikala edja kana lo ndjela kɛnɛ kalangawɔ ntondja, Departɛma diendana la asango mbeyaka nyanga ndo nsomba ahɔndɔ wahombama. Anɔngɔswanyi kitaka akɛnyi dikitakita dia mbaɔtɔnganyiya la la etena, dikambo diasalema, kana kiongamu yalɔmbama lo foto. Craig mbutaka ate: “Lam’ele foto ya nshi nyɛ yotondja ɛngɔ tshɛ dimɛna efula, sho pombaka nkongɛ ɛngɔ tshɛ woho wahombatɔ monga. Kaanga kiɔmɔkɔmɔ ya tshitshɛ koka ndanya foto k’otondo.”
Wondelo wa foto. Amundji wa foto wakayashikikɛ dia osase wa lo luudu la bankɛ wekɔ osase wa la yanyi. Lo wondelo wa foto tshɛ, amundji wa foto pombaka ndjashikikɛ dia osase wekɔ dimɛna (osase wa yanyi, wɛɛdi, kana osase w’atala), dia vɔ mbɔtɔnɛka la osase watanema lo dihole diakɔ, ndo dia vɔ mbasungana la kɛnɛ kasalema. Craig mbutaka ate: “Otshikitanyi la vidɛo, tekɔ paka la osato ɔtɔi wahombaso nshikikɛ ɛnamelo kawɔ, ɔnkɔnɛ osase wekɔ ohomba efula.”
Ɔlɔngɔswɛlɔ wa foto. L’ɔkɔngɔ, anɔngɔsɔdi wa foto wakakilɔngɔsɔla yoho yele ambadi wayoka washo awɔ le anto wele lo foto, koko aha lo dihole diakɔsama falanga. Kaanga mbele kadrɛma ya lokuke la ya adidishi yaki beela, anɔngɔsɔdi wakayikonya ɛlɛsɛlɛsɛ, dia mbɔtɔnganyiya la dangi diakaleke mɛnama laawɔ.
Laadiko wa foto yandama la Patterson, filialɛ ya l’andja w’otondo, lo ahole w’otshikitanyi, ɛnyɛlɔ oko la Australie, Brésil, Canada, Allemagne, Japon, Corée, Malawi, Mexique, ndo Afrique du Sud, wekɔ l’elui w’amundji wa foto wakokawɔ nɔmba dia minda foto ya mbidja lo ekanda aso. Departɛma diendana la asango dia la Patterson kotshaka foto oko 2 500 ngɔndɔ tshɛ. Efula ka l’atei ayɔ yekɔ lo tondjama lo Tshoto y’Etangelo ndo Réveillez-vous!, periodikɛ yakatondjama kɔpi ndekana miliyɔ 115 lo ɔnɔnyi 2015. Sho kokombolɛka yaayo dia ndjembola Bɛtɛlɛ ka la Patterson, New York, kana lo Bɛtɛlɛ yaso nkina ya l’andja w’otondo dia ndjeya akambo efula.
Woshelo wa periodikɛ l’esambishelo
^ od. 2 Foto efula mbɔsamaka dia mbidja lo lohoso ndo vɔ ndjokambaka la yɔ l’ɔkɔngɔ. Koko efula ka nyɛ yandama kotshamaka lɛnɛ ombama esato ndo vɔ ndjokambaka la yɔ l’ɔkɔngɔ lo asawo akina.
^ od. 4 Naka foto kɛmɔtshi kayondama lo shinga mɔtshi ya l’osomba ɔmɔtshi, tena efula Departɛma diendana la asango pombaka nkondja lotshungɔ oma le aseka lɛɛta, nshikikɛ lofulo l’anto wayonga lɔkɔ, woke woke wa diangɔ diayokamba la wɔ ndo woho w’esase wayokambema dia munda foto kakɔ.