Ndekana kilɔmɛtrɛ 10 000 mangana la Philippines, lɛnɛ adjasɛ wanɛ watɛkɛta Tagalog, nunu di’Ɛmɛnyi wa Jehowa watɛkɛta ɔtɛkɛta wa Tagalog wakasangana la Rɔmɔ, Italie, lo losanganya la rɛjɔ la mamba Ngɔndɔ k’esambele 24-26, 2015.

Lo ndjela wɛdikelo ɔmɔtshi, ase Philipine ndekana 850 000 mbidjasɛ nshi nyɛ la Erɔpɛ. Etombelo wambonga la dui sɔ ele, tshumanelo oko 60 ndo elui w’ɛmɛnyi wa Jehowa salaka nsanganya lo ɔtɛkɛta wa Tagalog lo Erɔpɛ ndo sambishaka ase Philipines lo tshunda diawɔ.

Koko lo losanganya la rɛjɔ la la Rɔmɔ, tshumanelo ndo elui ɛsɔ tshɛ wakasangana mbala ka ntondo lo losanganya la nshi shato lo ɔtɛkɛta awɔ wa lootɔ. Anto 3 239 wakɔtɔ waki l’ɔlɔ w’efula dia mpokamɛ ɔnangɛso Mark Sanderson, ose Olui-walɔmbɔla w’Ɛmɛnyi wa Jehowa, ɔnɛ lakakambe ntondo la Philipine etena kakandashaka sawo di’ekomelo dia lushi tshɛ.

Naa otshikitanu wele lam’asa onto mbɔtɔ losanganya la rɛjɔ lo ɔtɛkɛta ande wa lootɔ la mbɔtɔ lo ɔtɛkɛta okina weyande? Eva mama kɛmɔtshi kodia ana ndamɛ mbutaka ate: “Dimi mbokaka Angɛlɛ yema tshitshɛ, koko diɛsɛ la losanganya lɔnɛ la rɛjɔ la lo Tagalog, wetshelo wa lo Bible wambosembɔ tɔɔ lo otema ami.” Dia momba dikuta dia minda lɔkɛndɔ oma la Ɛspanyɛ otsha la Italie, nde la anande ahende wakɔshi yɛdikɔ yaha ndɛka woho watowɔlɛka lomingu tshɛ, koko wayosalaka dui sɔ mbala ɔtɔi keto lo ngɔndɔ. Eva mbutaka ate: “Aki ohomba ndjahombia mɛtɛ, nɛ dia lo losanganya lɔnɛ dimi lamboyoka awui tshɛ!”

Jasmin ladjasɛ la Alɛmanyɛ akalɔmbɛ dikimɔ lo olimu dia nde tɔtɔ lo losanganya la rɛjɔ. Nde mbutaka ate: “Yema tshitshɛ la ntondo ka dimi monɛ, wakayombitɛ ɔnɛ haahombe monɛ nɛ dia olimu wa nkamba wekɔ efula. Dimi lakatshikala ki, lakalɔmbɛ Jehowa ko lakatshu le owandji ami w’olimu. Takakongɛ olimu woho wakoka dimi ntshɔ dia tɔtɔ lo losanganya la rɛjɔ! Aki dui dia dimɛna efula dia monga la diaaso dia monga kaamɛ la anangɛso l’akadiyɛso akina w’oma la Philipines waki lo Erɔpɛ w’otondo.”

Lo mɛtɛ, ase Philipines efula wa lo Erɔpɛ mongaka l’olengolengo aha tsho wa ngelo kawɔ koko ndo wa angɛnyi awɔ wakonɔ lo bɛtshi dikina dia lo Erɔpɛ. Losanganya la rɛjɔ lɔsɔ lakakimanyiya angɛnyi asɔ dia vɔ mɛnana nto oko onto l’ɔnango la lo nyuma. (Mateo 12:48-50) Fabrice mbutaka ate: “Mɛna anto weyami akalodia otema ami la ɔngɛnɔngɛnɔ w’efula!” L’ekomelo ka losanganya, kadiyɛso kɛmɔtshi akate ate: “Ɔnɛ mɛtɛ losanganya la woke la lo nkumbo!”