Lam’asa 1999 la 2015, Ɛmɛnyi wa Jehowa wakake Mbalasa ya Diolelo ndekana 5 000 l’Amérique central * ndo la Mexique. Ndo dia nongola Ɛmɛnyi wa Jehowa ndekana miliyɔ ɔtɔi ndo anto akina waya lo nsanganya yaso lo wedja ɛsɔ, ndekana Mbalasa ya Diolelo nkina 700 yekɔ ohomba.

Lo nshi yakete, anangɛso wa lo wedja waki l’okakatanu dia mbika ahole w’ɔtɛmwɛlɔ. Ɛnyɛlɔ, la Mɛxique, Ɛmɛnyi wa Jehowa efula wakasalaka nsanganya lo nkumbo y’anangɛso. Lande na? Ɔkɔkɔ ɔmɔtshi ekɔ nɛ dia l’edja k’ɛnɔnyi efula emboledi wakadjanga dia ɔtɛmwɛlɔ hakoke ndjasombɛ dihole dia mbika ɔtɛmwɛlɔ. Koko lo ɛnɔnyi wa 1990, ɔlɛmbɛ ɔsɔ wakatshikitanyema ndo Ɛmɛnyi wa Jehowa wakatatɛ mbika Mbalasa ya Diolelo. Koko dia mbika mbalasa ɔtɔi, akawaɔsɛka ngɔndɔ efula.

Wodelo wakahame efula oma lo 1999, etena kakatatɛ kengama elui w’ambiki wa Mbalasa ya Diolelo lo wedja wele bu l’ekondjelo k’efula, oko la Mexique ndo lo wedja esambele wa l’Amérique central. Ntatɛ oma lo 2010, filialɛ ka la Mexique kakendaka olimu wakakambemaka l’ɛtshi ka nkɛtɛ kɛsɔ.

Wanɛ wakamba lo wokelo pomanaka l’ekakatanu etena kakawɔ l’ahole wanganyi etale la esomba wa weke. Ɛnyɛlɔ la Panama, wanɛ wakamba lo wokelo wakahombe mbɔsa wato ndo munda lɔkɛnda la wenya esato wa tango dia ntshɔ lo dihole diakawɔ mbalasa. La Chiapas, la Mexique, ekipɛ kɛmɔtshi k’ambiki wakahombe nkamba la aviyɔ wa tshitshɛ dia mɛmba diangɔ otsha lo dihole diakawahombe mbika mbalasa dianganyi etale l’osomba wa woke.

Ndooko Ɔmɛnyi wakafɔnyaka dia mbalasa k’oyoyo kayokama l’ɛtshi kawɔ ka nkɛtɛ. Ɛnyɛlɔ, pami kɛmɔtshi k’oma lo Honduras akate dia la ntondo k’Ɛmɛnyi wa Jehowa mbika Mbalasa ka Diolelo lo ɛtshi kawɔ ka nkɛtɛ, anto wakakambaka l’ɛtshi kɛnɛ ka nkɛtɛ dia nsalaka akambo wa mindo l’otsho. Nde akanyangaka efula dia mɛna akambo asɔ. Etena kakandoke di’Ɛmɛnyi wa Jehowa wakalangaka mbika Mbalasa ka Diolelo lo Ɛtshi kakɔ ka nkɛtɛ, nde aki la Diambo lo mbuta ate: “Ande ɔtshɔkɔ lɛɛ!”

Lo ahole efula, anto mambiyamaka efula lo woho wayasha wanɛ waka Mabalasa yakɔ. Pami kɛmɔtshi k’oma la Guatemala akate ate: “Lo dioho diaso, wamato kambaka paka elimu wa lo nkuku eto. Koko, wamato anɛ wekɔ lo nsala elimu akɔ waamɛ wasala apami. Lekɔ la diambo dia mɛna wamato wasɔhanya ditshu la mbɔkɔ dia nsala atafadi ndo waka dihele. Ɔnɛ ekɔ dui diaheyama nembetshiya!” Wamato amɔtshi wakayɔsaka yɛdikɔ ya nsombɛka wanɛ waka diangɔ dia ndɛ ndo kunyi.

Anto efula nto mandolaka woho wakama Mbalasa yaso ya Diolelo. Lo wodja wa Nicaragua, manyi mɔtshi ya lo awui wa wokelo akatɛ anto wa lo ngelo kakɔ dia Mbalasa ka Diolelo, mboleki luudu lakakama la diangɔ di’oleki oshinga wolo lo ngelo kawɔ. Diakɔ diele nde akate dia nɛ dia lɔ ndeka mvudu tshɛ ya lo ngelo woke!

Mɛtɛ, Ɛmɛnyi wa Jehowa wekɔ la eshikikelo dia wekɔ l’ahole w’amɛna dikambo di’ɔtɛmwɛlɔ. Vɔ wakɛnyi nto dia ambeki wa Bible wakayongaka l’ohetoheto wa mbɔtɔka lo nsanganya lo Mbalasa ka Diolelo. Ase etshumanelo kɛmɔtshi ka la Mexique wakasha lonya lo wokelo wa Mbalasa kɛmɔtshi ka Diolelo wakɛnya lowando lawɔ lo mbuta ɔnɛ: “Tekɔ lo mbisha Jehowa losaka lo diɛsɛ diaki la so dia mbika Mbalasa ka Diolelo katombola ndo kalɛmiya lokombo lande.”