L’ɛnyɛlɔ ka wedja efula, wodja w’Australie wekɔ l’esombe efula. Esombe ɛmɔtshi wa l’atei awɔ monɔka otsha lo mvudu yalamawɔ esombe, nɛ dia lɛkɔ mbatanema anto waakimanyiya dimɛna lo yoonge yawɔ ya demba ndo dia ehomba awɔ wa lushi la lushi.

Koko kaanga mbediɔ ngasɔ, esombe ɛsɔ wekɔ l’ohomba w’ekimanyielo k’efula lo dihole dia ekimanyielo ka lo demba keto. Vɔ mbeyaka ndjaoka l’ɔlɛmbɛlɔ, ompoko kana ndjaoka oko anto w’anyanya. Ɛmɛnyi wa Jehowa tshɔka lo mvudu hiende ya lo Portland, osomba ɔmɔtshi wa lo Victoria, lo wodja w’Australie dia tosha esombe wadjasɛ lɛkɔ elongamelo ndo esambelo lomingu tshɛ.

Ɛmɛnyi wa Jehowa wa lo wodja akɔ sanganaka la djui mɔtshi y’esombe wadjasɛ lɛkɔ ndo vɔ kɛtshanyaka la wɔ atɔndɔ w’oma lo Bible, ɛnyɛlɔ oko awui wakete lo lɔsɛnɔ la Yeso. Jason mbutaka ate: “Sho mbadiaka l’esombe divɛsa dimɔtshi di’oma lo Bible, oma laasɔ ko sho kɛtshanya la wɔ kaamɛ.” Lam’ele esombe efula wa l’atei awɔ wekɔ lo diɛnɛ la ekakatanu wa yoonge ya demba, Ɛmɛnyi wa Jehowa salaka la wolo tshɛ dia nyomowasha elongamelo lo mbakeketsha la daka diaki Nzambi dia minya hemɔ ndo nyɔi.

Tony, Ɔmɛnyi wa Jehowa ɔmɔtshi wa lɛkɔ, mbutaka ate: “Takatatɛka mbowaembola l’edja ka minitɛ akumi asato, koko esombe akɔ wakalangaka nyomoleka nsawola la wɔ wenya efula. Wonya ɔnɛ, tosawola la wɔ l’edja ka wonya a ntango w’otondo, kaanga mbakataka ɔmɔtshi la l’atei awɔ dia sho nsawola nto wenya ehende wa ntango!” Lam’ele esombe ɛmɔtshi l’atei awɔ wekɔ totshungu, bu l’akoka kana akoka wa nkimɛ ema kɛmɔtshi, Ɛmɛnyi wa Jehowa mbakimanyiyaka etena kewɔ lo nsawola la wɔ ndo dui sɔ mbakimanyiyaka dia vɔ nyomoleka ndjasha lo sawo diawɔ.

Etena kasawolawɔ la wɔ, Ɛmɛnyi wa Jehowa membaka kaamɛ la wɔ esambo ɛmɔtshi wa ntombola Nzambi ndo mbala efula vɔ nyomolekaka nyanga dia memba nto. Osombe ɔmɔtshi welɛwɔ John, * mbutaka ate: “Sho nangaka mishiki watelanyu. Vɔ tokimanyiyaka dia sho mbeya ndo nɛmiya Nzambi.” Osombe ɔmɔtshi wele tshungu welɛwɔ Judith, akakimɛ ɛtɛkɛta wa l’esambo wakandalekaka nanga tshɛ!

Ɛmɛnyi wa Jehowa ndjashaka efula dikambo wahɔ w’esombe ɛsɔ tshɛ. Ɔnangɛso ɔmɔtshi lakayakimɔ la lolango lelɛwɔ Brian mbutaka ate, naka esombe ɛsɔ hawoyaoke dimɛna, Ɛmɛnyi wa Jehowa mbɔtɔka polo lo toshambrɛ tawɔ dia towaenda. “Sho sawolaka la wɔ dia mbeya woho wayaokawɔ. Mbala mɔtshi sho kalolaka lushi lokina dia ndjeya woho wakemwe wanɛ wele la hemɔ.”

Esombe efula nangaka wembwelo ɛsɔ. Ɛnyɛlɔ Peter, lɔtɔ mbala efula lo ɔkɛtshanyelo ɔsɔ lomingu tshɛ, mbutaka ate: “Halotshimbatshimba dia mbɔtɔ lɛkɔ.” Judith mbutɛka wanɛ waakokɛ ate: “Ɛlɔ ekɔ lushi la sato! Lam’alanganyu nyɔnɔngɔsɔlɛ dia dimi ntshɔ teka Bible l’olui. Halange nkoma l’ɔkɔngɔ!”

Esombe ɛsɔ ngɛnangɛnaka efula kɛnɛ kekawɔ, ndo vɔ ndjaokaka suke suke la Nzambi oleki woho wakawayaokaka ntondo. L’ɔkɔngɔ wa vɔ nkɛtshanya wetshelo ɔmɔtshi waki Yeso, Robert mbutaka ɔnɛ: “Dimi talokaka divɛsa dia lo Bible sɔ. Wonya ɔnɛ kamomodioka!” Lo wedi ande, David lakayɛnaka ohomba wa nɔmba mbutaka ate: “l’ekimanyielo ka dɔmbɛlɔ kamomoyonga la diɔtɔnganelo dia dimɛna la Nzambi ndo nde aya onto la mɛtɛ lo washo ami.”

Esombe ɛsɔ mongaka l’ɔngɛnɔngɛnɔ efula dia mbeka awui wendana la elongamelo kasha Bible ka lo nshi yayaye. Osombe ɔmɔtshi wa womoto welɛwɔ Lynette mandolaka Ɛmɛnyi wa Jehowa ɔnɛ: “Losaka efula lo woho watelanyu esambelo ka ngasɔ k’oma lo Bible. Osombe okina mbutaka ate: “Ekɔ paka Nzambi mbanyotoma le so!”

Margaret ekɔ lo ngɛnangɛna waaso wa ngasɔ efula ndo wonya ɔnɛ nde ekɔ lo mbɔtɔ lo nsanganya y’Ɛmɛnyi wa Jehowa yasalema lo Mbalasa ka Diolelo ka lo ngelo kawɔ. Nɔmbamaka dia nde mbidja welo efula kaanga mbende bu la yoonge ya demba ya dimɛna ndo ekakatanu wele la nde wa nkɛndakɛnda. Nde akatɛ Ɛmɛnyi wa Jehowa ate: “Nyamboyotokimanyiya sho tshɛ la dui dimɔtshi di’ohomba dia lo lɔsɛnɔ.”

Anto waalama vɔ la wɔ nto wekɔ lo ngɛnangɛna wembwelo w’Ɛmɛnyi wa Jehowa. Ɔmɛnyi wa Jehowa ɔmɔtshi welɛwɔ Anna, mbutaka ate: “Wanɛ waalama keketshaka esombe walamawɔ dia vɔ ndja lo ɔkɛtshanyelo nɛ dia vɔ mɛnaka dia esombe ɛsɔ mongaka l’ɔngɛnɔngɛnɔ efula l’ɔkɔngɔ wa vɔ nkalola oma l’ɔkɛtshanyelo.” Brian, lakatatɛkɛtshi diande la ntondo kotshaka ate: “Anto waalama asɔ wekɔ la lɔngɛnyi la dimɛna ndo vɔ kambaka kaamɛ. Vɔ salaka la wolo tshɛ dia mbowaela ekimanyielo kawɔ.”

Ewotɔ wa wanɛ wele esombe asɔ ngɛnangɛnaka efula etena kɛnawɔ ewotɔ awɔ w’esombe wangɛnangɛna ɔkɛtshanyelo ɔsɔ. Ɔna womoto laki osombe ɔmɔtshi wa womoto mandolaka Ɛmɛnyi wa Jehowa ate: “Ɔnɛ ekɔ dui dimɔtshi dia diambo efula diasalɛnyu mama kami.”