L’ɔkɔngɔ wa mvula ya weke ndɔ lo nɔrdɛ k’Italie otsha l’ekomelo ka Ngɔndɔ ka dikumi l’ɔtɔi ka lo 2016, ngelo mɔtshi ya lo sidɛ k’osomba wa Moncalieri yakalole l’ashi. L’ahole wele ashi wakadɛ ashi suke la mɛtɛlɛ k’otondo, jurnalɛ mɔtshi yakafunde ɔnɛ: “Ashi wakɔtwɛ anto tshɛ ndo ɛngɔ tshɛ.” Aha la ntshimbatshimba, ewandji wa lo ngelo wakasɛkɔla anto suke 1 500 otsha l’ahole akina diɛsɛ l’elui w’Ɛmɛnyi wa Jehowa wakaye ndjosha ekimanyielo ndo ndooko onto lakashisha lɔsɛnɔ. Koko, nkumbo efula yakashisha diangɔ diawɔ efula.

Elui w’Ɛmɛnyi wa Jehowa wa lo ngelo wakatshu tosha ekimanyielo kama wakatombe mpokoso. Vɔ wakakimanyielo nkumbo yakanandema lo mbatondjɛ lɔtɛkɛ la mindo oma lo mvudu yawɔ ndo lo mbakokɛ diangɔ diawɔ. Olui ɔmɔtshi wakaye la dihomɔ diawɔ ndo l’abaya w’amɛna, koko wa bariyɛlɛ yaki lo mboka. Koko ewandji wa lo ngelo kɛsɔ wakawaetsha l’oyango wa vɔ tokimanyiya nkumbo kaki l’ohomba w’ekimanyielo. Ɛmɛnyi wa Jehowa wakayakimɔ la lolango asɔ wakakimanyiya asekawɔ Ɛmɛnyi ndo asukanyi awɔ wanɛ waki ase ɛtɛmwɛlɔ ekina.

Ɛnyɛlɔ, luudu la kɔpanyi kɛmɔtshi ka wa telefɔnɛ lakalole tɔɔ l’ashi. Lam’akashidiya olui ɔmɔtshi w’akimanyedi la ntondja ashi oma lo luudu lɔsɔ, olui ɔmɔtshi wa woke w’Ɛmɛnyi wa Jehowa wakakimanyiya Ɔmɛnyi ɔmɔtshi w’osekawɔ la nkumbo kande la mbatondjɛ mindo oma lo luudu lawɔ. Oma laasɔ, vɔ wakakimanyiya nto anto akina wa lo luudu lɔsɔ. Vɔ wakasale ɔnɔngɔ, ndo l’ɔkɔngɔ wa wenya engana eto, vɔ wakatondja mindo tshɛ oma lo mvudu shɔ. Onto tshɛ akandola ekimanyielo kawɔ lo yɛdikɔ y’efula. Ose ngelo ɔmɔtshi lakawelɛka Viviana , akatshu le wadi aki Antonio, ko akawotɛ l’asɔyi lo washo ate: “Lam’alangɛ, otoshe ananyɔ losaka. Nyu mɛtɛ ntshikitana l’anto akina”

Lo ngelo kɛmɔtshi kakahandjɔ vwa la elola, anto wakɛnyi elui w’Ɛmɛnyi wa Jehowa wakimanyiya anto wakahomɔ mpokoso. Ase ngelo amɔtshi wakanandema la kɛnɛ kakawɛnyi kɛsɔ, ko wakayakimɔ la lolango ndo vɔ dia mbisha Ɛmɛnyi ɛsɔ lonya ndo vɔ waketawɔ ndjela wadjango waki Ɔmɛnyi wakalɔmbɔlaka olimu ɔsɔ.

Luudu la pami kɛmɔtshi lakalana heyama, ndo garajɛ kande kakalole la lɔtɛkɛ. Nde akambe dia mɛna woho wakokimanyiya Ɛmɛnyi wa Jehowa enanɛi dia mbotodjɛ mindo yaki lo garajɛ, vɔ wakakambe wenya ɛnɛi aha la momuya. Dia mɛnya lowando lande, nde akakumbatɛ amɔtshi l’atei awɔ ndo akadje mesajɛ ɔmɔtshi l’Ɛtɛrnɛtɛ dia mbasha losaka l’ɔtɛ “w’ekimanyielo ka mamba” kakandalongola.

Ɔmɛnyi ɔmɔtshi mbutaka ate: “Takakimanyiya asukanyi aso efula waki komonga Ɛmɛnyi wa Jehowa, ndo efula l’atei waki waya l’ɛnɔnyi 80 l’ɛmɔtshi. Amɔtshi l’atei wakalelaka ndo ndela etana kakawatoshaka losaka l’ɔtɛ w’ekimanyielo kakatawasha.” Osukanyi aso ɔmɔtshi wa pami wayasha efula l’ɔtɛmwɛlɔ w’aseka Mupɛ akatɛ Ɛmɛnyi wa Jehowa woho wakandangɛnangɛna ekimanyielo kawɔ ndo akakotsha ate: “Aki dui dia dambo dia mɛna dia kaanga mbeso la tokanyi totshikitanyi l’awui w’ɔtɛmwɛlɔ, sho takakimanyiyana.” Pami kekina akate ate: “Lambonyanga nɛ dia anto nyeyaka tsho paka l’ɔtɛ watanyembola anto lawakawɔ Lushi la lomingu la pindju, koko aha l’ɔtɛ w’ekimanyielo kashanyu anto.”