Lo wodja wa Tabasco la Mexique, lofulo l’anto wayadiaka lekɔ lo tadɛ. Diakɔ diele, Ɛmɛnyi wa Jehowa wakayakongɛ dia nsala kapanyɛ ka laande ka ngɔndɔ hiende lo 2017 dia nyomokaha Emɔ! ka Ngɔndɔ ka nɛi 2014 (lo Angɛlɛ) kaki l’ɔtɛ a dui ɔnɛ: “Ɛkɔkɔ esato wa ntetemala nsɛna.” Kapanyɛ kɛsɔ kaki l’etombelo w’amɛna efula.

Faustino, pami kɛmɔtshi kele Ɔmɛnyi wa Jehowa akasawola la womoto ɔmɔtshi lakayakiyanyaka efula dikambo di’ɔnande la pami lele l’ɛnɔnyi 22. Ɔna ɔsɔ akadiɛnɛka l’ɔkɔmwɛlɔ ndo akasalaka la wolo dia ndjadiaka. Nyango ɔna ɔsɔ kombeya woho wa mbokimanyiya. Lam’akawosha Faustino periodikɛ, nde akate ate: “Ɔnɛ mɛtɛ kele dui diele ɔnami l’ohomba.” La wedi a pindju, Faustino akatshu tenda ɔnaki womoto ɔsɔ, ndo vɔ wakasawola dia alako wa lo Bible wɔtɔtɔmiyami lo periodikɛ kakɔ. L’ɔkɔngɔ wa vɔ meembola mbala efula, lɔkɛwɔ l’ɔna ɔsɔ lakatshikitana. Faustino mbutaka ate: “Mɛnamaka dia nde aya ki ndo aya l’ɔngɛnɔngɛnɔ.” Laadiko dia laasɔ, nde akayotatɛ mbitɛ ɔnango lakadiɛnɛka ndo nde la wɔ l’ɔkɔmwɛlɔ awui wakandekaka.

Kadiyɛso kɛmɔtshi kelɛwɔ Karla ladjasɛ l’osomba wa Huimanguillo, akakambe la periodikɛ dia nkimanyiya osekande la la kalasa. Karla mbutaka ɔnɛ: “Lakɛnyi dia ɔna womoto ɔmɔtshi l’ɛnɔnyi 14 lakɔtɔka la mi kalasa aki l’ekiyanu. “Lakasawola la nde, ko nde akambutɛ awui waketaka lo nkumbo kande. Etena kakatasawolaka, Iakɛnyi dia nde aki la lofuu lo lonya lande la lɔmɔsɔ.” Lakashihodia dia nde aki la mbekelo ka ndjahomuya l’anya ndo l’ekolo. Nde akayaokaka dia nde bu l’ɔngɛnɔngɛnɔ ndo akataka dia lɔsɛnɔ lande bu l’oyango. Karla akawosha Emɔ! L’ɔkɔngɔ wa nde kiada, ɔna womoto ɔsɔ akatɛ Karla ate mɛnamaka dia periodikɛ kɛnɛ kakafundama dikambo diami. La tɔɔla tshɛ, nde akate ate wonya ɔnɛ lambetawɔ dia lɔsɛnɔ lekɔ l’oyango.

L’osomba wa Villahermosa, pami kɛmɔtshi akashisha elongamelo. Nde akashisha olimu ndo wadɛnde akoolawɔ, ko akootshike nde la anawɔ ato. Nde akalɔmbɛ Nzambi ekimanyielo koko nde akatetemala nshisha elongamelo. Etena kakinde suke la ndjadiaka Martín nde la Miguel, Ɛmɛnyi ehende wa Jehowa wakakɔkɔla lo lokuke lande. Pami kakɔ akadihola lokuke ko vɔ wakɔtɔ ndo wakotshikɛ Emɔ! Lam’akɛnyi pami kɛsɔ ɔtɛ a dui wa periodikɛ kakɔ, nde akayaoke dia ɔsɔ aki mɛtɛ ekadimwelo wambowosha Nzambi lo dɔmbɛlɔ diande. Martín nde la Miguel wakookeketsha lo nkamba la Bible ndo nshi ngana oma laasɔ, vɔ wakakalola ndjowenda, ndo wakayootana aya la wɔlamu ndo ki. Wonya ɔnɛ, vɔ wekɔ lo mbeka Bible kaamɛ la pami kɛsɔ mbala hiende lo lomingu.

Etena kakasalemaka kapanyɛ kɛsɔ, Ɛmɛnyi wa Jehowa wakatshu tosambisha lo nkanu efula ya lo wodja wa Tabasco dia tokahana l’ase lokanu alako amɔtshi w’oma lo Bible wakoka mbakimanyiya dia vɔ monga l’oyango lo lɔsɛnɔ. Ɛmɛnyi wa Jehowa wakalɔngɔsɔla mbɔtwɛlɔ kɛmɔtshi kaki ndo la tovidɛo, sawo di’oma lo Bible, ndo ɔkɛtshanyelo wa ɛkɔkɔ wa ntetemala nsɛna waki lo periodikɛ kakɔ. Ase lokanu ndo ewandji awɔ wakangɛnangɛna wembwelo ɛsɔ. Ɛnyɛlɔ, ose lokanu ɔmɔtshi mbutaka ate: “Lakahande ndjadiaka mbala shato. Anto amɔ wakambutɛ dia Nzambi ndjakiyanyaka dikambo diami, vɔ kokamba la Bible dia mɛnyami dia kɛnɛ kakawataka kaki mɛtɛ. Ɛtɛkɛta anyu wambokeketsha mɛtɛ.”

Anto efula wakangɛnangɛna kapanyɛ kɛsɔ. Sekeletɛlɛ ka lo wodja akɔ kendana la awui wa yoonge ya demba akandola Ɛmɛnyi wa Jehowa lo welo wakawadje dia nkimanyiya anto wa lo wodja awɔ, ndo jurnalɛ ya lo wodja ɔsɔ yakatondja sawo dimɔtshi diendana la kapanyɛ kɛsɔ diaki l’ɔtɛ a dui ɔnɛ: “Vɔ wekɔ lo ndɔsha diaha anto ndjadiakaka.”