Ɛmɛnyi wa Jehowa wakakambe la dikadimwelo efula dia Bible diotshikitanyi lo wekelo awɔ wa Bible. Koko l’ɛtɛkɛta watanematɔ, sho ndekaka mbɔsa Bible​—Ekadimwelo k’andja w’oyoyo la nɛmɔ l’ɔtɛ wakambatɔ la lokombo laki Nzambi, wetɔ mɛtɛ ndo shikaa.

•   Okambelo wa la lokombo laki Nzambi. Afundji amɔtshi wa Bible kombisha ɔnɛ lele Kiɔkɔ ya Bible nɛmɔ diande. Ɛnyɛlɔ, ekadimwelo kɛmɔtshi ka Bible shilaka nkombo y’anto ndekana 70 wakasha lonya lo toho totshikitanyi dia nsukɛ otombelo atɔ. Koko, ekadimwelo kɛsɔ kakanya lokombo laki ɔnɛ lele Kiɔkɔ yatɔ, mbuta ate Jehowa Nzambi.

   Otshikitanyi la tɔ, Bible​—Ekadimwelo k’andja w’oyoyo kakayokaloya lokombo laki Nzambi lo ahole nunu wakalatanemaka lo Afundelo w’etatelo, kaanga mbele wanɛ wakatondja Bible kɛsɔ haweyama nkombo yawɔ.

•   Tɔ kekɔ mɛtɛ. Aha dikadimwelo tshɛ dia Bible mbɔtɔnɛ tshɛ lo tshɛ la losango lele lo efundelo w’etatelo. Ɛnyɛlɔ, ekadimwelo kɛmɔtshi ka Bible kadimolaka Mateo 7:13 ɔnɛ: “Nyɔtɔ lo soko dia tshitshɛ, nɛ dia soko diotsha lo ifɛrnɔ diekɔ woke ndo ndooko okakatanu mbɔtɔ lɛkɔ.” Koko, efundelo w’etatelo wakakambe la tshɛkɛta “elanyelo,” koko aha “ifɛrnɔ.” Ondo akadimodi wakadje tshɛkɛta “ifɛrnɔ” nɛ dia vɔ waketawɔka dia atshi wa kɔlɔ soyamaka lo dja ya pondjo. Koko Bible hasukɛ kanyi shɔ. Lam’ele Bible​—Ekadimwelo k’andja w’oyoyo mbutaka mɛtɛ, tɔ mbutaka ɔnɛ: “Nyɔtɔ lo soko dia tshitshɛ, nɛ dia mboka ka woke ndo k’enanɔnanɔ tɔlaka lo elanyelo.”

•   Tɔ kekɔ shikaa. Ekadimwelo ka dimɛna ka Bible hahombe tsho monga mɛtɛ, koko tɔ pombaka monga shikaa ndo wɔdu nshihodia. Ohɔsa ɛnyɛlɔ kɛnɛ. Lo Rɔmɔ 12:11, ɔpɔstɔlɔ Pɔɔlɔ laki Okristo akakambe la etelo kɛmɔtshi kalembetshiya tshɛkɛta lo tshɛkɛta ɔnɛ ‘mpɛtahɛta la nyuma.’ Kaanga mbele etelo kɛsɔ mbishaka tsho yema ya kanyi lo Angɛlɛ wa nshi nyɛ, Bible​—Ekadimwelo k’andja w’oyoyo kadimolaka divɛsa sɔ lo yoho yokɛma hwe. Tɔ mbutaka di’Akristo pombaka ‘mpɛtahɛta la nyuma.’

 Laadiko dia woho wakambatɔ la lokombo laki Nzambi, wetɔ mɛtɛ ndo shikaa, Bible​—Ekadimwelo k’andja w’oyoyo tshikitana la dikadimwelo dikina nɛ dia tɔ kahanyemaka ofele. Etombelo wambonga la dui sɔ ele, miliyɔ y’anto wokoka mbadia Bible lo ɛtɛkɛta awɔ wa lootɔ, oyadi wanɛ wele bu l’akoka wa nsomba Bible kawɔ hita.