Ndooko. Ɛmɛnyi wa Jehowa hawotone wokelo wa malanga. Sho mbɔsaka wokelo wa malanga oko yɛdikɔ yahomba Okristo ndamɛ mbɔsa. Ɛmɛnyi wa Jehowa sɔnaka dia mbika malanga.

 Sho nyangaka esakelo w’amɛna ndo sho ngɛnangɛnaka ehamelo wambosalema l’awu w’aseka enganga dia nkitshakitsha waale wa mbɔsa hemɔ ya wolo. Sho tekɔ la lowando l’olimu wa wolo wakamba aseka enganga, djekoleko lo ntena nɛ dia paa.

 Ɛmɛnyi wa Jehowa kambaka dimɛna l’ewandji wendana l’awui w’aseka enganga. Ɛnyɛlɔ, ntatɛ oma lam’akatombe hemɔ ka COVID-19, Ɛmɛnyi wa Jehowa wekɔ lo ntetemala ntondja waohwelo l’ɛtɛkɛta nkama lo sitɛ k’Ɛtɛrnɛtɛ kɛnɛ, lo nkeketsha anto dia nɛnya ɛlɛmbɛ wa lo ngelo wendana la okokelo wa yoonge. L’atei w’ɛlɛmbɛ ɛsɔ mbele ndo wɔnɛ wendana la manganaka tshalola l’anto ndo ndjela kɛnɛ kalɔmbama lo kɛnɛ kendana nsangana l’ahole w’anto tshɛ, manganyema l’anto, osolelo w’anya, ɔlɔtɛlɔ wa maskɛ ndo tɛdikɔ tokina takɔshi ewandji wa lɛɛta.—Rɔmɔ 13:1, 2.

 Aya ɛnɔnyi akumi wele ekanda w’Ɛmɛnyi wa Jehowa wekɔ lo ntɔtɔmiya ohomba w’atɔndɔ wayela anɛ:

•   Tɛdikɔ tendana la okokelo wa yoonge mendanaka l’onto ndamɛ.—Ngalatiya 6:5.

   “[Periodikɛ kɛnɛ] hadjangɛ anto woho ɔmɔtshi w’ekanga kana w’osakelo kana mbisha alako lo kɛnɛ kendana la woho ɔmɔtshi w’osakelo. Oyango atɔ ekɔ tsho wa mɛnya kɛnɛ kele ohomba ko ombadi ndamɛ mbɔsa tɛdikɔ tande hita.”—Emɔ!, Ngɔndɔ ka hende 8, 1987 lo Falase.

   “Dimbola di’ɔnɛ wɛ naka anayɛ pombaka kɔtshama malanga ekɔ yɛdikɔ y’onto ndamɛ.”—Emɔ!, Ngɔndɔ k’enanɛi 8, 1993 lo Falase.

•   Sho nyangaka esakelo w’aseka enganga nɛ dia sho mbɔsaka lɔsɛnɔ la nɛmɔ di’efula.—Etsha 17:28.

   “Ɛmɛnyi wa Jehowa tshɔka le enganga dia sakemɛ lo hemɔ yawɔ. Vɔ nangaka lɔsɛnɔ ndo vɔ nangaka nsala kɛnɛ tshɛ kakokawɔ nsala ndo kɔtɔnɛ l’Afundelo dia litaloya.”—Tshoto y’Etangelo, Ngɔndɔ ka dikumi 1, 1975 lo Falase.

   “Ɛmɛnyi wa Jehowa mbetawɔ esakelo la lolango lawɔ. Vɔ nangaka ntetemala monga la yoonge ya dimɛna ndo ntaloya lɔsɛnɔ. Lo mɛtɛ, l’ɛnyɛlɔ ka Luka, Okristo ɔmɔtshi wa lo ntambe ka ntondo, Ɛmɛnyi wa Jehowa ɛmɔtshi wekɔ enganga. . . . Ɛmɛnyi wa Jehowa ngɛnangɛnaka olimu wa wolo ndo wa wanɛ wayakimɔ dia sakɛ anto. Vɔ wekɔ nto la lowando lo ɛkɔnwɛlɔ walongolawɔ oma le anto asɔ.”—Tshoto y’Etangelo, Ngɔndɔ ka hende 1, 2011 lo Falase.