Kɛnɛ kata anto amɔ: Ɛmɛnyi wa Jehowa hawosale fɛtɛ ka Pasaka nɛ dia vɔ bu Akristo.

 Kɛnɛ kele mɛtɛ: Sho mbetawɔka dia Yeso Kristo ekɔ oshimbedi aso ndo sho salaka kɛnɛ tshɛ kakokaso nsala dia “mboyela dimɛna dimɛna lo wanya ande.”​—1 Petero 2:21; Luka 2:11.

Kɛnɛ kata anto amɔ: Nyu hanyetawɔ dia Yeso akolwama oma lo nyɔi.

 Kɛnɛ kele mɛtɛ: Sho mbetawɔka dia Yeso akolwama; sho mbeyaka dia dui sɔ mbele etshina ka mbetawɔ k’Akristo ndo sho mɛnyaka ohomba wa dui sɔ etena kasambishaso.​—1 Kɔrɛtɔ 15:3, 4, 12-15.

Kɛnɛ kata anto amɔ: Nyu dimaka ananyu ɔngɛnɔngɛnɔ wonga lushi la Pasaka ndo hanyodje yimba lo dui sɔ.

 Kɛnɛ kele mɛtɛ: Sho nangaka anaso. Sho ndjashaka tshɛ dia mbalowanya ndo mbakimanyiya dia vɔ monga l’ɔngɛnɔngɛnɔ.​—Tito 2:4.

•   Fɛtɛ ka Pasaka hatombi oma lo Bible.

•   Yeso akatodjangɛ dia mbohɔka nyɔi kande, koko aha eolwelo kande. Sho salaka Eohwelo ka nyɔi ka Yeso ɔnɔnyi tshɛ lo ndjela alamanaka wa Ngɔndɔ ya walɛ wa lo nshi yakafundamaka Bible.​—Luka 22:19, 20.

•   Sho mbeyaka dia Nzambi hetawɔ fɛtɛ ka Pasaka, nɛ dia mbekelo ya fɛtɛ kɛsɔ ndja oma lo nsɛlɛmɔnyi ya mbisha nkɛtɛ ɛtɛtɔ ya lo nshi y’edjedja. Nzambi nɔmbaka dia sho ‘mbomamemaka paka ndaamɛ,’ ndo ɔtɛmwɛlɔ wele la mbekelo yahandetawɔ mbonyangiyaka.​—Etombelo 20:5; 1 Nkumi ya dikanga 18:21.

 Tekɔ l’eshikikelo dia yɛdikɔ yaso yaha nsala fɛtɛ ka Pasaka mpikama lo Bible. Tɔ tokeketshaka dia nkɛnɛmɔla “lomba l’oshika ndo dikoka di’ekanelo ka yimba” lo dihole dia ndjela mbekelo y’anto. (Tokedi 3:21; Mateo 15:3) Sho mbitɛka anto akina kanyi yaso lo dikambo dia fɛtɛ ka Pasaka etena katombolawɔ, koko sho nɛmiyaka ndo lotshungɔ lele l’onto l’onto la mbɔsa yɛdikɔ ya kɛnɛ kayondosala.—1 Petero 3:15.