Lande na katona Ɛmɛnyi wa Jehowa wodjelo wa dikila?
Kanyi ya kɔlɔ yele l’anto efula
Kɛnɛ kata anto amɔ: Ɛmɛnyi wa Jehowa hawetawɔ esakelo w’aseka enganga kana w’adɔkɔtɛlɛ.
Kɛnɛ kele mɛtɛ: Sho nyangaka esakelo woleki amɛna lo dikambo diaso ndo dia nkumbo yaso. Etena kongaso l’ekakatanu wendana la yoonge ya demba, sho tshɔka le adɔkɔtɛlɛ wele l’akoka wa tosakɛ kana tosala epaso aha la mbidja dikila. Sho ngɛnangɛnaka alako walongolaso lo kɛnɛ kendana l’esakelo ɛsɔ. Kɛnɛ kele mɛtɛ ele, esakelo waha la mbidja dikila wakambawɔ lawɔ dikambo di’ɛkɔnyi wele Ɛmɛnyi wa Jehowa waya la wahɔ le anto tshɛ ɛlɔ kɛnɛ. Lo wedja efula, ɔkɔnyi tshɛ aya kakianɛ la lotshungɔ la nsɔna osakelo wahakoke mbidja lɔsɛnɔ la nde lo waale wendana la wodjelo wa dikila. L’atei wa waale ɛsɔ mbele ndo hemɔ yasambemɛ lo dikila ndo nshiha akoka amɔtshi wele la demba diaso dia ndjakokɛ.
Kɛnɛ kata anto amɔ: Ɛmɛnyi wa Jehowa suyaka dia mbetawɔ kɔnɔyaka onto.
Kɛnɛ kele mɛtɛ: Sho hatɔkɔnɔla anto la ahindo.
Kɛnɛ kata anto amɔ: Esakelo waha la mbidja dikila wekɔ oshinga wolo efula.
Kɛnɛ kele mɛtɛ: Esakelo waha la mbidja dikila kimanyiyaka dia nkitshakitsha adepasɛ. a
Kɛnɛ kata anto amɔ: Ɛmɛnyi wa Jehowa efula, mbidja ndo anawɔ, wekɔ lo mvɔ ɔnɔnyi tshɛ l’ɔtɛ watonawɔ mbidja dikila.
Kɛnɛ kele mɛtɛ: Dui sɔ di’ekɔ kashi. Adɔkɔtɛlɛ salaka mbala la mbala epaso wa welo wele oko epaso wa lo doyi, epaso wa l’asɔnga wa weka ndo ɔsɛkwɛlɔ wa etenyi kɛmɔtshi ka demba otsha l’etenyi ka demba dikina aha la mbidja dikila. b Anto woka hemɔ, mbidja ndo ana wahetawɔ nkaloya dikila, kɔnɔka lo yoho yoleki wanɛ wetawɔ kaloya dikila lo alemba awɔ. c Lo weho akɔ tshɛ, ndooko onto lakoka mbuta l’eshikikelo tshɛ di’onto looka hemɔ ayovɔ l’ɔtɛ watonande nkaloya dikila kana nde ayotetemala nsɛna l’ɔtɛ wambondodikaloya.
Lande na katona Ɛmɛnyi wa Jehowa nkaloya dikila?
Ɔsɔ ekɔ dui diendana ndo l’ɔtɛmwɛlɔ koko aha l’aseka engana ato. Daka di’edjedja ndo Daka di’oyoyo tɛnyaka hwe dia hatohombe nkaloya dikila. (Etatelo 9:4; Akambo w’ase Lɛwi 17:10; Eohwelo k’Ɛlɛmbɛ 12:23; Etsha 15:28, 29) Ndo nto, lo ndjela kanyi ya Nzambi, lɔsɛnɔ l’etongami tshɛ lekɔ lo dikila. (Akambo w’ase Lɛwi 17:14) Diakɔ diele, sho tonaka okaloyelo wa dikila aha tsho dia nɛmiya Nzambi, koko sho kombolaka mbokitanyiya oko wende ombishi wa lɔsɛnɔ.
Tokanyi t’anto efula tekɔ lo tatshikitana
Epaso wa wolo koka salema dimɛna aha la nkaloya dikila
L’etena kɛmɔtshi, aseka enganga wakayotana toho tɔmɔtshi ta mbewɔ okaloyelo wa dikila takawayelɛka ɔnɛ esakelo k’aha ka dikila. Koko, wakayɛna di’ɔsɔ ekɔ esakelo ka waale kana kele bu l’elongamelo, diakɔ diakawayotshikitanyaka yoho y’esakelo shɔ l’ɛnɔnyi weke ka mbeta. Ɛnyɛlɔ lo 2004, sawo dimɔtshi diakawatondja lo jurunalɛ mɔtshi y’aseka enganga diakate ɔnɛ: “Toho efula tambotomba towokamba la tɔ le Ɛmɛnyi wa Jehowa wele la hemɔ, wayoyokamba la tɔ le anto tshɛ l’ɛnɔnyi wayela.” d Sawo dimɔtshi dia lo jurnalɛ yele l’ɔtɛ a dui ɔnɛ Lung and Circulation diakate lo 2010 ɔnɛ: “‘Osalelo w’epaso aha la nkaloya dikila’ hakoke komɛkomɛka tsho le Ɛmɛnyi wa Jehowa, koko pombaka monga epaso wasalema lushi la lushi le ɛkɔnyi tshɛ.”
Nshi nyɛ, nunu di’adɔkɔtɛlɛ wa l’andja w’otondo wokamba la toho tɔmɔtshi ta olamelo wa dikila l’oyango wa nsala epaso wa wolo efula aha la nkaloya dikila. Weho w’esakelo wa ngasɔ wahawakaloya dikila wekɔ lo salema kaanga lo wedja wambohama ndo kaanga ɛkɔnyi efula wele bu Ɛmɛnyi wa Jehowa tilɔmbaka.
a Enda Transfusion and Apheresis Science, Volume 33, No. 3, lk. 349.
b Adia The Journal of Thoracic and Cardiovascular Surgery, Vɔlimɛ 134, No. 2, lk. 287-288; Texas Heart Institute Journal, Vɔlimɛ 38, No. 5, lk. 563; Basics of Blood Management, lk. 2; ndo Continuing Education in Anaesthesia, Critical Care & Pain, Vɔlimɛ 4, No. 2, lk. 39.
c Adia The Journal of Thoracic and Cardiovascular Surgery, Vɔlimɛ 89, No. 6, lk. 918; ndo Heart, Lung and Circulation, Vɔlimɛ 19, p. 658.
d Continuing Education in Anaesthesia, Critical Care & Pain, Vɔlimɛ 4, No. 2, lɛkɛ 39.