Okongamelo wa nshi nyɛ w’Ɛmɛnyi wa Jehowa wakatatɛ oya l’ekomelo ka ntambe ka 19. L’etena kɛsɔ djui ya tshitshɛ y’ambeki wa Bible wakadjasɛka suke la Pittsburgh, Pennsylvanie, l’États-Unis, wakatatɛ nsɛdingola Bible la yambalo tshɛ. Vɔ wakɛdikaka wetshelo waketshaka ɛtɛmwɛlɔ la kɛnɛ ketsha Bible mɛtɛ. Vɔ wakamɛ ntondja awui wakawekaka lo abuku, lo akatshi ndo lo jurnalɛ yelamɛ nshi nyɛ ɔnɛ Tshoto y’Etangelo​—Mbewoyaka Diolelo diaki Jehowa.

 Lo olui w’anto wakekaka Bible l’otema ɔtɔi asɔ, mbaki ndo Charles Taze Russell. Kaanga mbakatatɛ Russell nɔmbɔla wekelo wa Bible lo etena kɛsɔ ndo mbakandatondja Tshoto y’Etangelo ya ntondo, nde komonga onto lakamɛ la ɔtɛmwɛlɔ w’oyoyo. Oyango waki Russell ndo w’Ambeki wa Bible akina, aki wa mbetsha wetshelo wa Yeso Kristo ndo ndjela kɛnɛ kakasalemaka lo etshumanelo k’Akristo ka lo ntambe ka ntondo. Lam’ele Yeso mbele Ɔnɛ lakakenge Lokristo la mɛtɛ, sho mbɔsaka dia nde mbele Ɔnɛ lakakenge okongamelo aso.​—Kɔlɔsayi 1:18-20.