Olimu aso w’esambishelo sukamɛka ntondo la weshasha wa la lolango w’oma le Ɛmɛnyi wa Jehowa. Ndooko ɛkɔngɔ wasalema lo nsanganya yaso, anto wa lɔkɔ hawokeketshama dia nkimɔ tenyi dia dikumi. (Mateo 10:7, 8) Koko, tɔshɛshɛtɛ ta weshasha kitshamaka l’ahole aso wa nsanganya di’onto lalanga nkimɔ woshasha, mbidja woshasha ande lɔkɔ. Hawote nkombo ya wanɛ wakimɔ weshasha.

Ɔkɔkɔ ɔmɔtshi wele falanga yaso hayotshupama, ele sho bu ndooko l’owandji w’ɔtɛmwɛlɔ wafutama. Ndo nto, Ɛmɛnyi wa Jehowa hawofutama lo woho wasambishawɔ lo luudu la luudu ndo ahole aso w’ɔtɛmwɛlɔ bu wa kawotake.

Woshasha tshɛ watomama lo Bɛtɛlɛ y’Ɛmɛnyi wa Jehowa vɔ kambaka la yɔ dia nkimanyiya wanɛ wambohomana la mpokoso y’oma lo diangɔ diakatongama, dia nsukɛ waa misiɔnɛrɛ ndo ekambi wa lo tena tshɛ, dia nkimanyiya dia mbika mvudu y’ɔtɛmwɛlɔ lo wedja wele bu l’ekondjelo k’efula ndo dia mfunda ndo ntoma Bible kaamɛ l’ekanda ekina w’Akristo.

Onto tshɛ mbɔsaka yɛdikɔ ya nkimɔ woshasha ande dia vɔ nkamba la yɔ dikambo di’adepasɛ wa l’etshumanelo, di’olimu aso wakambema l’andja w’otondo ndo dikambo di’awui akina. Etshumanelo tshɛ mbishaka alapɔlɔ wendana la owadi wa falanga mbala la mbala.