Olui-walɔmbɔla ekɔ djui ya tshitshɛ y’Akristo wambotshunda washa Ɛmɛnyi wa Jehowa wa l’andja w’otondo ɛlɔmbwɛlɔ. Olimu awɔ wekɔ la eyango ehende:

•   Menda ɔlɔngɔswɛlɔ wa wetshelo wotumbi oma lo Bible lo tshimbo y’ekanda, nsanganya ndo kalasa y’Ɛmɛnyi wa Jehowa.​​​—Luka 12:42.

•   Vɔ mendaka olimu w’Ɛmɛnyi wa Jehowa wakambema l’andja w’otondo lo nɔmbɔla olimu w’esambishelo ndo lo menda woho wa nkamba la weshasha wakimɔma.

 Olui-walɔmbɔla ndjelaka ɛnyɛlɔ kakatshike “apɔstɔlɔ la dikumanyi la Jɛrusalɛma” lo ntambe ka ntondo, vɔ wanɛ wakɔsaka tɛdikɔ t’ohomba lo wahɔ w’etshumanelo k’otondo k’Akristo. (Etsha 15:2) L’ɛnyɛlɔ k’apami wa kɔlamelo asɔ, ase Olui-walɔmbɔla keema ɛnɔmbɔdi w’okongamelo asɔ. Vɔ nyangaka ɛlɔmbwɛlɔ lo Bible, lo mbetawɔ dia Jehowa Nzambi akasɔnɛ Yeso Kristo oko Ɔtɛ w’etshumanelo.​—1 Kɔrɛtɔ 11:3; Ɛfɛsɔ 5:23.

 Wanɛ wakenga Olui-walɔmbɔla vɔ anɛ: Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane ndo Jeffrey Winder. Vɔ wekɔ lo nkamba lo mbalasa kaso kalɔmbɔla olimu wa l’andja w’otondo kele la Warwick, New York, l’États-Unis.

 Olui-walɔmbɔla wakakenge kɔmite shamalo dia mendanaka awui wotshikitanyi wendana l’olimu aso, ndo ɔmɔmɔ l’atei w’ase Olui-walɔmbɔla kambaka lo kɔmite ɔtɔi kana ndekana lo kɔmite shɔ.

•   Kɔmite k’ɛnɔmbɔdi: Tɔ mendaka awui wendana l’aseka lɛɛta ndo mbɔsa tɛdikɔ etena katomba mpokoso kana awui wendana l’anangɛso wahɛnyahɛnyama l’ɔtɛ wa mbetawɔ kawɔ ndo awui akina wa wanyandja wendana l’Ɛmɛnyi wa Jehowa.

•   Kɔmite kenda ase Bɛtɛlɛ: Tɔ mendaka tɛdikɔ tendana l’ase nkumbo ka Bɛtɛlɛ.

•   Kɔmite k’otondjelo w’ekanda: Tɔ mendaka otondjelo ndo otomelo w’ekanda walembetshiya Bible ndo wokelo w’ahole w’ɔtɛmwɛlɔ, biro y’okadimwelo ndo mvudu ya Bɛtɛlɛ.

•   Kɔmite k’olimu: Tɔ mendaka olimu aso w’esambishelo ka “lokumu l’ɔlɔlɔ la Diolelo.”​—Mateo 24:14.

•   Kɔmite ka wetshelo: Tɔ mendanaka l’ɔlɔngɔswɛlɔ wa wetshelo wa lo nyuma washama lo tshimbo ya nsanganya, ya waa kalasa ndo ya diangɔ diakadjama l’eshinga.

•   Kɔmɔte k’ofundelo: Tɔ mendanaka l’ɔlɔngɔswɛlɔ wa wetshelo wa lo nyuma washama lo tshimbo ya diangɔ diatondjama l’akatshi ndo lo sitɛ yaso y’Ɛtɛrnɛtɛ ndo tɔ menda olimu w’okadimwelo.

 Laadiko w’olimu awɔ lo kɔmite nyɛ, Olui-walɔmbɔla sanganaka lomingu tshɛ dia nsɛdingola ehomba w’okongamelo. Lo nsanganya shɔ, vɔ kɛtshanyaka kɛnɛ kata Afundelo ndo vɔ tshikaka dia nyuma k’ekila ka Nzambi mbalɔmbɔla lo nsala la wolo dia vɔ nsanga lolimi lo tɛdikɔ tɔsawɔ.​—Etsha 15:25.

 Vɔ wekɔ Akristo wakokaso mbɛkɛ otema wakimanyiya kɔmite y’Olui-walɔmbɔla. (1 Kɔrɛtɔ 4:2) Vɔ wekɔ l’akoka ndo la diewo l’olimu wenda kɔmite kakambawɔ lɔkɔ ndo vɔ mbɔtɔka lo losanganya lasala kɔmite kɛsɔ lomingu la lomingu. Kaanga mbele aha vɔ mbɔsa tɛdikɔ, akimanyedi asɔ mbishaka tokanyi t’amɛna, kambaka la tɛdikɔ tɔsama ndo mendaka etombelo ndo ehamelo wonga la tɛdikɔ takɔ. Olui-walɔmbɔla mbeyaka nto mbasha ɔkɛndɔ wa membola anangɛso l’akadiyɛso wa l’ahole wotshikitanyi kana mbisha asawo amɔtshi lo nsanganya yasalema ɔnɔnyi l’ɔnɔnyi kana lo woshelo w’apɔlɔmɛ wa lo Ngiliyadɛ.