Ndooko. Ɛmɛnyi wa Jehowa wekɔ Akristo, koko sho bu ase Asɔnyi. Lande na kataso ngasɔ?

 Asɔnyi kɛdikɛdi tshunda di’ɔtɛmwɛlɔ dialɔshana l’aseka Mupɛ wa la Rɔmɔ. Lam’ele, Ɛmɛnyi wa Jehowa hawetawɔ wetshelo w’aseka Mupɛ, sho bu ase Asɔnyi l’ɔtɛ w’ɛkɔkɔ wayela ɛnɛ:

1.   Waetawɔ efula w’ase Asɔnyi ndɔshanaka la kɛnɛ ketsha Bible mɛtɛ. Ɛnyɛlɔ, Bible mbetshaka dia “Nzambi ekɔ ɔtɔi,” koko aha Losato l’osanto. (1 Timɔte 2:5; Joani 14:28) Ndo nto, tɔ mbetshaka hwe dia Nzambi hasha anto wa kɔlɔ, dilanya l’ifɛrnɔ, koko ayowalanya lo elanyelo ka pondjo.​—Osambu 37:9; 2 Tɛsalɔnika 1:9.

2.   Sho hatɔlɔshana l’ase Asɔnyi kana ntshikitanya wetshelo w’aseka Mupɛ oyadi elui ekina w’ɛtɛmwɛlɔ. Lo dihole dia nsala ngasɔ, sho sambishaka lokumu l’ɔlɔlɔ la Diolelo diaki Nzambi, ndo mbidjaka welo dia nkimanyiya anto akina dia vɔ monga la mbetawɔ lɔkɔ. (Mateo 24:14; 28:19, 20) Sho hatoyasha dia ntshikitanya atshunda akina w’ɛtɛmwɛlɔ, koko sho ndjashaka dia mbetsha anto akambo wa mɛtɛ wendana la Nzambi ndo la Ɔtɛkɛta ande Bible.​—Kɔlɔsayi 1:9, 10; 2 Timɔte 2:24, 25.