Takɛnyi dia efula ka wanɛ wamboshilaka monga l’ɔtɛmwɛlɔ ɔmɔtshi ngɛnangɛnaka nkɛtshanya awui wa lo Bible. Ɔnkɔnɛ, sho nɛmiyaka lotshungɔ lele l’onto dia monga la waetawɔ wotshikitanyi la waso ndo sho hatotshutshuya onto la wolo dia mpokamɛ losango laso.

 Etena kakɛtshanyaso l’anto awui w’ɔtɛmwɛlɔ, sho salaka la wolo dia nkamba la dako dia lo Bible dia tɔlɔmba dia nsala dui sɔ “la lotutsha” ndo la “dilɛmiɛlɔ di’efula” otsha le anto akina. (1 Petero 3:15) Sho mbeyaka ɔnɛ anto amɔtshi wayotona losango latatawaɛmbɛ. (Mateo 10:14) Koko, paka tambosambisha anto mbakokaso ndjeya tokanyi tawɔ lo losango laso. Sho mbeyaka nto ɔnɛ awui wele l’anto tshikitanaka.

 Ɛnyɛlɔ, lushi lɔmɔtshi onto mbeyaka monga la wesanu efula koko lushi lokina nde ayoyɔngɛnangɛna nsawola la so. Ndo anto koka mpomana la awui akina kana akambo waalɔmba dia vɔ mbidja yimba lo losango la lo Bible. Diakɔ diele, sho salaka la wolo dia ntshɔ laka anto mbala efula.