Commission américaine kendana la lotshungɔ lele l’anto wa l’andja w’otondo la ntɛmɔla (USCIRF) kakate dia vɔ wekɔ la lonyangu lo dikambo di’ɔnangɛso Tesfazion Gebremichael, lele lo lokanu la Érythrée ambolekana ɛnɔnyi 11. Sitɛ k’Ɛtɛrnɛtɛ ka USCIRF mbutaka ɔnɛ: “L’etena kɛnɛ, Gebremichael aya l’ɛnɔnyi ndekana 80 ndo l’ɔtɛ wa dui sɔ nde ekɔ l’ekakatanu wendana la yoonge lo menda dihole diende lo lokanu.” Lo Ngɔndɔ ka dikumi 7, 2022, Frederick Davie lele ɔlɔhɛ wa USCIRF akalɔmbɛ dia vɔ ntondja ɔnangɛso Gebremichael oma lo lokanu.

Lo Ngɔndɔ k’esambele 20, 2011, apulushi wakande ɔnangɛso Gebremichael etena kakandatɛka anto akina awui wendana la dietawɔ diande. Kaanga mbakandotɔ la Érythrée, hawowɔsɛ oko ose wodja ɔsɔ, nɛ dia ntatɛ lo 1994, lɛɛta la lɛkɔ akatone di’Ɛmɛnyi wa Jehowa mbelamɛ ase wodja ɔsɔ.

Ɔnangɛso Gebremichael akayala Ɔmɛnyi wa Jehowa lo Ngɔndɔ ka ntondo 1971. Nde mbeyamaka oko onto lokana ngandji, onto ɔlɔlɔ, papa ka nkumbo kadja wɔladi ndo onto lakimanyiya asukanyi ande. Lo 1974, nde akatshuke wadɛnde Lemlem. Nde la wɔ ekɔ Ɔmɛnyi wa Jehowa. Vɔ wekɔ l’ana anɛi ndo ekana etanu.

Kadiyɛso Gebremichael mbutaka ɔnɛ: “Kaanga mbayakiyanyami dikambo dia yoonge ya demba y’omɛmi etena kende lo lokanu ndo mbemi l’ohomba wa ngandji ndo osukɔ ande, dimi mbeyaka dia Jehowa ayowokokɛ. Dimi ngɛnangɛnaka kɔlamelo y’omɛmi ndo eshikikelo kele la nde ka nama olowanyi ande. Nkana yimba la Ondaki 10:4 kimanyiyakami dia ntshikala ki, kaanga la ntondo k’okakatanu wambohomana la nkumbo kaso.”

Ntatɛ lo 1991, Ɛmɛnyi wa Jehowa wa la Érythrée wekɔ lo pɛnyahɛnyama woho w’anyanya. Kaanga mbele Ɛmɛnyi wa Jehowa 32 wakatshungwama oma lo lokanu l’ɔtɛ w’ɛkɔkɔkɔ ɛmɔtshi ntatɛ lo Ngɔndɔ ka dikumi l’ahende 2020 polo lo Ngɔndɔ ka hende 2021, anangɛso l’akadiyɛso akina 20 weke lo lokanu. Vɔ tshɛ wekɔ lo lokanu ndo haweye etena kayowotondjama. Lam’ele vɔ hawokoke nsamba la ntondo ka tominadi kana nyanga dia vɔ nyomenda dikambo diawɔ, ekɔ oko wakawadje lo lokanu lɔsɛnɔ lawɔ l’otondo.

Atshunda wa weke wa l’andja w’ontondo wendana la lotshungɔ lele l’onto wakaanya ase Érythrée mbala efula l’ɔtɛ wahawalɛmiya lotshungɔ lɔsɔ ndo wakalɔmbɛ lɛɛta la lɛkɔ dia nkandola dui sɔ. Lo 2016, Commission d’enquête ka ONU kendana la lotshungɔ lele l’onto la Érythrée, wakate di’ewandji wa lɛɛta wekɔ lo “nsala akambo oko andjakanyi,” l’ɔtɛ wahɛnyahɛnyawɔ Ɛmɛnyi wa Jehowa ndo anto akina.

Woho wahawatondja ɔnangɛso Gebremichael kaanga mbayande l’ɛnɔnyi efula, ekɔ ɛnyɛlɔ kɛmɔtshi ka woho wasalɛ ewandji wa lɛɛta Ɛmɛnyi wa Jehowa akambo la epetenge. Ntatɛ lo 2011, Ɛmɛnyi wa Jehowa ɛnɛi wakavu lo lokanu ndo Ɛmɛnyi wa Jehowa ekina esato w’esombe wakayovɔ l’ɔkɔngɔ wa vɔ tshungwama l’ɔtɛ wakawaasoyaka lo lokanu.

Ɛmɛnyi wa Jehowa wakalɔmbɛ dia nsawola l’ewandji wa lɛɛta wa la Érythrée dia dikambo sɔ, koko vɔ konanga.

Tekɔ lo nɔmba lo dikambo di’anangɛso l’akadiyɛso wakadjama lo nkanu kaanga mbakiwɔ kosala ndooko dikambo. Tekɔ l’eshikikelo dia Jehowa ayotetemala mbasukɛ.​—Hɛbɛru 13:3.