Lo Ngɔndɔ ka divwa 1 polo 4, 2022 wakelɛ Ɛmɛnyi wa Jehowa dia ntshɔ lo salɔ ka tshutshulatshula lo São Paulo, la Brésil dia tɛnya woho wakoka anto wele la dikɔmɔ ndjaekesanyiya ndo kondja wahɔ oma lo dihomɔ sɔ. Reatech ekɔ salɔ koleki woke kele la diangɔ dia tshulatshula efula l’Amerique latine. Olekanyi anto 46 000 wakembola salɔ kɛsɔ lo diaso sɔ.

Lo salɔ kɛsɔ, anangɛso l’akadiyɛso wakakitsha ɛngɔ kɛmɔtshi kakɛnyaka sitɛ ka Jw.org ndo aplikasiɔ wa JW Library la JW Library Sign Language. Ekra wakakitshama wakɛnyaka diangɔ diotshikitanyi. Apandjudi wa toshungu ndo wahɛnyi dimɛna waki nsuke dia nembetshiya toho totshikitanyi t’okambelo wa la sitɛ kaso ndo wa w’aplikasiɔ.

Manyi mɔtshi yakimanyiya anto wele la dikɔmɔ akembola dihole diakɔ ndo akate ate: “Ekɔ dui dia diambo dia mɛna di’ekɔ ɔtɛmwɛlɔ ɔmɔtshi wayakiyanya di’anto wele la ehomba wa laande.” Onto okina lakaye ndjembola akate la diambo tshɛ ate: “Ɔnɛ ekɔ yoho yoleki dimɛna ya nkimanyiya anto anɛ dia vɔ monga lo tshunda di’anto!”

Enyimpala ɛmɔtshi w’oma l’Organisation nationale des aveugles du Brésil (ONCB) vɔ la wɔ waki lo losanganya lakasalema lo Reatech lo 2022. Lo losanganya lɔsɔ vɔ wakakongɛ ndo emisiɔ w’aradio. Oma l’etatelo polo l’ekomelo ka losanganya lɔsɔ, vɔ wakakɔnya anangɛso wakendanaka la wɛnyɛlɔ wakawasalaka. Anangɛso asɔ wakalembetshiya kɛnɛ kasala Ɛmɛnyi wa Jehowa dia nkimanyiya aha tsho akanga wa totshungu, wanɛ wahɛnyi dimɛna ndo akanga wa mpoke wa la Brésil, koko ndo wa l’andja w’otondo. Etena kakawasalaka ɛkɔnya ɛsɔ, onyipala ɔmɔtshi wa l’Organisation nationale des aveugles du Brésil akate ɔnɛ: Awui wele l’ɔtɛkɛta w’akanga wa mpoke lo sitɛ ka jw.org w’ekɔ l’atei w’awui woleki amɛna wahandatɛnaka.

Oma ko nshi y’edjejda polo ndo nshi nyɛ, Jehowa okɛnyaka woho wayakiyanyande la ngandji tshɛ dikambo dia wanɛ wele l’elelo lo demba. (Akambo w’ase lɛwi 19:14) Tekɔ l’eshikikelo dia nde ngɛnangɛnaka etena kɛnande Ɛmɛnyi ande wokoya ngandji kande. Tekɔ lo kongɛ l’asolo wa lomɔlomɔ etena kele “washo w’akanga wa totshungu wayɔsɛna, ndo atoyi w’akanga wa mpoke wayoka.”​—Isaya 35:5.