Etshumanelo k’Ɛmɛnyi wa Jehowa ka la Iqaluit, Nunavut, Canada, wombokodja Mbalasa ka Diolelo kawɔ ka ntondo. Lo Ngɔndɔ ka dikumi 14, 2022. Wanɛ wakayakimɔ la lolango lo wokelo wakashidiya mbika Mbalasa ka Diolelo kele la ahole 50 wa mbidjasɛ. Dihole di’oyoyo dia salaka nsanganya sɔ, ekɔ Mbalasa ka Diolelo katanema lo Nɔrdɛ ka Canada. Etshumanelo ka Iqaluit kakakengama lo 2010 ndo wakasalaka nsanganya lo luudu la tɔkɛnyɔ la kalasa mɔtshi.

Olimu wa wokelo ɔsɔ waki l’ekakatanu efula ndo vɔ wakayemala l’edja k’ɛnɔnyi ehende l’ɔtɛ wa COVID-19. Iqaluit, nembetshiyaka “dihole diele nse efula,” diɔ tanemaka lo dɛɛngɔ dia Frobisher lo disɛnga dia Baffin. Paka I’Aviyɔ kana lo Masuwa mbakoka onto ntshɔ lekɔ. Ndo nto, diangɔ dia wokelo hadiotanema lɛkɔ. Kɛsɔ nangaka nembetshiya dia paka lo Masuwa mbakoka dihomɔ dia wokelo nkoma lo dihole dia wokelo. Laadiko dia laasɔ, l’ɔtɛ wa deko dia lekɔ, paka l’asa Ngɔndɔ k’enanei la ka dikumi mbakoka olimu wa wokelo salema.

Tɔnɛ 127 ya dihomɔ dia wokelo yakatshumanyema ndo yakalɔngɔswama lo Mbalasa ka nsanganya ya weke ka la Ontario. Wakadje diangɔ sɔ tshɛ lo kɔtɛnɛrɛ 12 ndo lo diangɔ 3 dia weke ko wakatshu la diɔ lo dibongo diele suke la Montreal, Quebec. Oma laasɔ, wakɔtɔ lo masuwa ko mbeta oma la St. Lawrence Seaway, ko tomba lo Ocean Atlantique, ko tokoma lo dɛɛngɔ dia Frobisher. Lam’ele ndooko dibongo diakawakoke ntondja kɔtɛnɛrɛ, vɔ wakayidje lo barjɛ ya Masuwa wa weke. Wakasale la wolo dia mbeta la Masuwa ɛsɔ l’ashi waki komonga dingunda. Ko etena kakiwɔ suke la omamu wa ndjale, mituka wanyiya diangɔ ko wakɛmbɛ kɔtɛnɛrɛ polo lo omamu.

Mbalasa kɛsɔ kakakama lo woho wahatakoke ndana kaanga nshi ya amvula wa la Iqaluit, etena kayokomaka djungudungu ya l’ɛse ka degrés Celsius 30.

Wanɛ wakayakimɔ la lolango lo olimu wa wokelo oko 40 wakaye oma lo Prɔvɛnsɛ shamalo yotshikitanyi ndo wakande kɛndɔ y’etale dia djosha lonya. Ɔnangɛso Jason McGregor ɔmɔtshi lakayakimɔ la lolango akate ate: “Kaanga mbakinde ta dia ta dia dihomɔ dia wokelo nkoma l’etale lo Nɔrdɛ ndo kandola ekekatanu efula wakiso konongamɛka, l’ekomelo akɛnama dia ndooko dikambo diakoka shimba dia lolango la Nzambi kotshama. Mbetawɔ kaso kakakeketala lo mɛna woho wakatatshɔka olimu otsha la ntondo lushi la lushi.”

Tekɔ lo ngɛnangɛna kaamɛ l’anangɛso wa la Canada lo woho wayawɔ la Mbalasa ka Diolelo k’oyoyo lo “dihole diele nse efula,” etena katetemalawɔ l’olimu awɔ w’ohomba wa “amundji w’anto.”​—Mateo 4:19.