Lo Ngɔndɔ ka nɛi 21, 2024, Ɔnangɛso Dean Jacek, lele ose Kɔmite ka filialɛ ka Philipines, akewoya otombelo wa dibuku dia lo Bible dia Mateo l’ɔtɛkɛta w’akanga wa mpoke wa la Philipines lo losanganya la laande lakasalema l’osomba wa Quezon. Anangɛso l’akadiyɛso 413 mbakɔtɔ lo losanganya lɔsɔ okoko l’okoko. Anto akina 3 998 wakakɔhama lo w’aparɛyi awɔ dia ndjela losanganya lɔsɔ lo vidɛo kɔfɛransɛ. Dibuku dia lo Bible diakatombe sɔ diakakoke monga telesharje mbala kakɔ ɔtɔi lo jw.org ndo lo aplikasiɔ wa JW Library Sign Language.

Mɛnamaka dia oko anto 500 000 mbatɛkɛta ɔtɛkɛta w’akanga wa mpoke wa la Philipines. Etshumanelo ka ntondo ka l’ɔtɛkɛta w’akanga wa mpoke, kakakengama l’osomba wa Quezon lo 1999 ndo abuku wakayokadimɔma l’ɔtɛkɛta ɔnɛ l’ɔnɔnyi wa 2011. Ɛlɔ kɛnɛ, anangɛso l’akadiyɛso ndekana 3 000 wekɔ lo tshumanelo 72 ndo lo toloyi toloyi tokina ta lo wodja wa Philipines.

Ɔnɛ mbele dibuku dia ntondo di’otondo diambokadimɔma l’ɔtɛkɛta w’akanga wa mpoke wa la Philipines. Ɔnangɛso ɔmɔtshi lele lohoke mbutaka ate: “La ntondo ka dibuku nɛ ntomba, takikɔ paka l’avɛsa angana wa lo dibuku dia Mateo l’ɔtɛkɛta aso w’akanga wa mpoke. Akɛnamaka dia taki paka la yɛtshi ya dibuku. Koko kakiyanɛ, taya l’avɛsa tshɛ wa lo dibuku nɛ!” Ekumanyi kɛmɔtshi ka l’etshumanelo ka l’ɔtɛkɛta w’akanga wa mpoke wa la philipines mbutaka ate: “Dibuku dia Mateo di’ekɔ l’atɔndɔ efula wakoka tokimanyiya etena kembolaso ɛkɔkɔ ndo kalangaso nkeketsha etshumanelo. Ɛnyɛlɔ, Mateo 5:23, 24 tokeketshaka dia mbidja wɔladi l’anangɛso ndo l’akadiyɛso etena katomba ewanu. Dimi kaloyaka Jehowa losaka woho wele anangɛso ndo akadiyɛso wele mpoke, waya l’akoka wa mboka wetshelo wa ngasɔ.”

Sho tshɛ tekɔ lo ngɛnangɛna woho wambotomba dibuku dia lo Bible dia Mateo l’ɔtɛkɛta w’akanga wa mpoke wa la Philipines. Dibuku nɛ, diayokimanyiya anto efula weke l’etema w’ɛlɔlɔ dia nkondja wahɔ oma l’ɔtɛkɛta wa Nzambi.​​—Mateo 7:24, 25.