Lo Ngɔndɔ ka dikumi l’ɔtɔi 30, 2022, Ɔnangɛso Sergey Polyakov akatondjama oma lo lokanu l’ɔkɔngɔ w’ɛnɔnyi esato wakawofundɛ. Ntatɛ l’etena kakawawonde lo Ngɔndɔ k’esambele 4, 2018, nde akadjama lo nkanu yotshikitanyi ndo wakawodje lo dihole dianganyi l’anto akina l’edja ka ngɔndɔ tshanu.

Lo Ngɔndɔ 16 y’ekomelo ya lokanu lande, Sergey akatɔlama lɛnɛ akandjɛwɔ ase lokanu elimu wa wolo la Valday, osomba wanganyi la lakande kilɔmɛtrɛ 3000. Nde akeyamaka oko ose lokanu laki la mbetawɔ ka wolo ndo ewandji wa lokanu l’ase lokanu akina wakɔlɛmiyaka. Lo nshi yakinde lo lokanu, Sergey akakeketshama diɛsɛ la mikanda efula wakotomɛka nkumbo kande ndo anangɛso l’akadiyɛso. Mbala efula nde akalongolaka mikanda efula lo lushi ndeka mikanda wakalongolaka ase lokanu 250.

L’ɔkɔngɔ wa vɔ mbotondja oma lo lokanu, Sergey akayongaka kaamɛ la wadɛnde, Anastasia. Anastasia nde la wɔ akadjama lo dihole di’anganyi l’anto akina l’edja ka Ngɔndɔ tshanu. Oma laasɔ, wakate dia nde aki l’onongo ndo wakofundɛ lokanu l’ɔtɛ wa mbetawɔ kande, koko nde kɔtɔlama lo lokanu l’etena kɛsɔ. Polyakov nde la Anastasia mbaki wadi l’omi wa ntondo wakadjama lo lokanu l’ɔkɔngɔ wa tominadi ta laadiko nshimba olimu w’Ɛmɛnyi wa Jehowa lo 2017.

Anangɛso l’akadiyɛso ndekana 100 weke lo lokanu la Russie ndo la Crimée. Tekɔ l’eshikikelo dia Jehowa ayotetemala nsukɛ wanɛ ‘wakikɛ ehemba ndo wasowa aha l’onongo dia nama nkum’otema ka dimɛna la ntondo ka Nzambi.’​—1 Petero 2:19.