NGƆNDƆ KA DIKUMI L’ƆTƆI 4, 2022
RUSSIE

ALAPƆLƆ—WAMBOFUNDƐ WADI L’OMI AMƆTSHI LOKANU | Mbetawɔ k’anto watɛkɛtama lo Bible kakaakeketsha

MPOKAMƐ LO

Lo Ngɔndɔ ka dikumi l’ɔtɔi 8, 2022, tominadi ta la Petropavlovsk-Kamtchatski lo ɛtshi ka nkɛtɛ ka Kamtchatka, wakate dia ɔnangɛso Dmitri Semionov la wadɛnde wekɔ l’onongo. Wakaasɛkɛ vɔ akɔ ahende lokanu l’ɛnɔnyi ɛnɛi. Koko, l’etena kɛnɛ vɔ watadjama lo lokanu.

Woho wakayahɔnaka akambo

Ngɔndɔ ka divwa 3, 2021

Womoto ɔmɔtshi lakasawolaka l’ɔnangɛso Dmitri nde la wadɛnde akambo wa lo Bible akatatɛ mbutɛ ase FSB awui akɔ. Lo ndjela kɛnɛ kakandawatɛ, vɔ wakatatɛ mbesana l’ɔnangɛso dia mbohindɛ onongo. Wakate ɔnɛ, vɔ wekɔ lo nkeketsha anto akina dia monga kaamɛ la wɔ l’ɔtɛmwɛlɔ wa kɔlɔ ndo dia nsala awui wa l’ɔtɛmwɛlɔ ɔkɔ.
Ngɔndɔ ka divwa 6, 2021

Wakasɛngɛ luudu lawɔ. Wakatshu la wɔ dia towaoka ambola ndo oma laasɔ, wakaashimbe di’aha mɛngɔla
Ngɔndɔ k’esambele 26, 2022

Kilombo kakatatɛ

Awui wendana la nde

Dmitri Semiovov

Ɔnɔnyi wakandotɔ: 1984 (Petropavlovsk-Kamchatski)

Ɔkɔndɔ wa lɔsɛnɔ: Akeke akumi ndo awui wendana l’ɔrdinatɛrɛ. Ekɔ lo nkamba oko osadi wa dikongelo dia l’ɔrdinatɛrɛ

Akeye Ɛmɛnyi wa Jehowa oma le owotɔ ande ɔmɔtshi. Akabatizama lo 2006. Akakambe olimu okina wa lɛɛta lo dihole dia nkamba olimu w’ɔsɔlayi

Akatshuke Nadejda lo 2010

Awui wakandate

Ɛnyɛlɔ k’onto akɔna latɛkɛtama lo Bible kakakokimanyiya dia ndeka ndjaɛkɛ le Jehowa?

Ntondo k’ɔhɛnyɔhɛnyɔ ntatɛ, lakakanaka yimba la ɛnyɛlɔ ka Jɛrɛmiya, djekoleko lam’akandadjama lo lokanu, etena kakadinge ase Babilɔna Jɛrusalɛma. Etena kakinde la ntondo k’okakatanu wakɛnamaka oko hawokoke nkandɔ, Jehowa akosukɛ lo yoho ya diambo efula. Ase Jɛrusalɛma waki la ndjala, koko Jɛrɛmiya akalongolaka mbo ya ndɛ lushi tshɛ ndo nde akake oma l’elanyelo k’osomba ɔsɔ. (Jɛrɛmiya 37:21) Jehowa mɛnaka oseka okakakatanu tshɛ lo yoho y’otshikitanyi la so ndo nde mbeyaka woho wayeta akambo. Kaanga toyanga nshisha elongamelo, Jehowa ayotatolɛ mboka paka l’etena kahombama.

Nadejda Semionova

Akotɔ lo: 1985 ekaterinbourg (l’ɛtshi ka nkɛtɛ ka la Sverdlovsk).

Ɔkɔndɔ wa lɔsɛnɔ: Etena kakinde dikɛnda, nde akalangaka memba l’olui w’amembi wakembaka ndo wakanɔka lokombe la kalasa. Ekɔ lo nkamba lo makashinyi ɔmɔtshi

Akeye akambo wa mɛtɛ lo tshimbo y’enondo ande la womoto lakatatɛ mbeka Bible. Nadejda, nyango ndo ɔnango la womoto wakayala Ɛmɛnyi wa Jehowa. Nde akabatizama lo 1997

Akatshukana la Dmitri lo 2010

Awui wakandate

Ɔkɔndɔ akɔna wa lo Bible wakakokimanyiya dia mfudia mbetawɔ kayɛ?

Taki oma la mbeka ɛnyɛlɔ ka wadi aki odo la la Zarɛfata ndo woho wakandɛnya mbetawɔ la ntondo ka nde nongola ɛtshɛkɔ. Sawo diakateke diakate ɔnɛ: “Jehowa tshɔkɔlaka wanɛ wele la mbetawɔ.” Ɛtɛkɛta ɛsɔ wakɔsama oma lo numɛlɔ kɛmɔtshi ka Tshoto y’Etangelo ya Siɔna ya lo 1898 ndo yɔ yakate nto ɔnɛ: “Lo lɔsɛnɔ laso l’Okristo, Nkumadiɔndjɔ pembaka mbetawɔ kaso lo awui amɔtshi. Naka sho nsala akambo la mbetawɔ, kete tayɔtshɔkwama ndo naka hatosadi ngasɔ kete hatotɔtshɔkwama.”

Dui sɔ diakambetsha ɔnɛ, oyadi ohemba wekɔ wolo, ekɔ ohomba efula dia dimi nsala kɛnɛ tshɛ kakokami nsala lo ntshikala la kɔlamelo le Jehowa ndo le anangɛso l’akadiyɛso. Naka dimi nsala ngasɔ, kete Jehowa ayombisha dihonga, mbetawɔ ndo wolo wele la mi ohomba dia mbikikɛ.

Oko wambotodiɛna lo dikambo dia Dmitri nde la Nadejda, Jehowa kimanyiyaka ekambi ande dia monga la dihonga ndo wolo wa ntondoya ɔlɔshamelo. Nde hawatshikaki pondjo.—Jashua 1:9.

NSANGO