NGƆNDƆ KA HENDE 3, 2022
RUSSIE

Mbadiaka Bible ndo kanaka la tɔ yimba lushi la lushi kimanyiyaka ɔnangɛso Alekseï Oukhov dia ndjaɛkɛ le Jehowa

MPOKAMƐ LO

Keem’edja, tominadi ta la Sovetskaïa Gavan, l’ɛtshi ka nkɛtɛ ka Khabarovsk tayohembola onongo waki ɔnangɛso Alekseï Oukhov. Prɔkirɛrɛ atawofundɛ dilanya diayondolongola.

Woho wakayahɔnaka akambo

Ngɔndɔ ka dikumi 22, 2020

Apulushi wakamba lo FSB wakatshu tɔsɛnga lo luudu laki Alekseï Oukhov. Vɔ wakɔshi tablɛtɛ, telefɔnɛ, ɔrdinatɛrɛ, flashɛ diskɛ, kartɛ SIM, kartɛ yatondjawɔ akuta lo bankɛ, akɔkima ande hita ndo ekanda. Wanɛ wakasalaka akɛtɛ lo lokanu la lo tshanda mɔtshi.
Ngɔndɔ ka dikumi 23, 2020

Tominadi takadjanga dia nde tokodjama lo lokanu lo tshanda mɔtshi.
Ngɔndɔ k’esambele 9, 2021

Wakotondja oma lo lokanu ndo wakawodjangɛ diaha mimɔ oma l’ɛtshi ka nkɛtɛ ka Komsomolsk-sur-l’Amour, lɛnɛ akinde lo lokanu.
Ngɔndɔ ka divwa 6, 2021

Kilombo kakatatɛ.

Awui wendana la nde

Alekseï Oukhov

Ɔnɔnyi wa lootɔ: 1980 (Lososina)

Ɔkɔndɔ wa lɔsɛnɔ: Lakinde eke ɔlɔngɔlɔngɔ nda akayakimɔ l’awui w’ɛdiɛngɛ. L’ɔkɔngɔ wa nde mbeka Bible l’Ɛmɛnyi wa Jehowa etena kakinde l’ɛnɔnyi dikumi l’ɛmɔtshi, nde akasale etshikitanu wa diambo. Nde akabatizama lo 1996. Nde akatshuke Liliya lo 2003.

Awui watande ndamɛ

Kakɔna kakakokimanyiya diaha nshisha ɔngɛnɔngɛnɔ ayɛ etena kakiyɛ lo lokanu?

Wadielo wa Bible wa mbala la mbala ndo woho wakamakanaka yimba la kɛnɛ kakamadiaka mbakakimanyiya. Kam’akamakondja kidiyɔ ndo akatshi, lakasale kalupɛ lɛnɛ akamafundaka tokanyi t’ohomba ta tshapita tshɛ. . . . Lam’akami lo lokanu, lakadia Bible k’otondo ndo lakakikalolɛ oma k’etatelo polo l’etenyi kelɛwɔ “amvutshi wa totshitshɛ.” Mbadia ndo nkana yimba la kɛnɛ kakamadiaka akakimanyiya dia ndjaoka oko laya l’andja wa lokanu.

Ngande wele lokanu lakayɔtɔ akakeketsha wɛkamu ayɛ le Jehowa?

L’etena kɛmɔtshi, lakɛnyi hwe dia la ntondo ka dimi mbidjama lo lokanu, lakayaɛkɛka le mi dimɛ ndo lo wolo ami hita lo akambo efula. . . . Lo lɔsɛnɔ lami la lushi tshɛ, laki l’eshikikelo dia dimi koka ndjasalɛ akambo dimɛ. Naka ɛngɔ kɛmɔtshi kambolana, lakakilɔngɔsɔlaka dimɛ. Naka lekɔ l’ohomba w’ɛngɔ kɛmɔtshi, lakakisombaka. . . . Koko wony’ɔnɛ, ndooko dui ɔtɔi diakamakokaka nsala dia nkandola ekakatanu waki lami. Lakashihodia dia ndjaɛkɛ le Jehowa, nembetshiyaka nkitsha awui tshɛ l’anya ande.

Sho mbeyaka dia Jehowa ayotetemala ntshɔkɔla ɔnangɛso Alekseï Oukhov nɛ dia nde “akayakimɔ le Ɔnɛ lalombosha la losembwe.”—1 Petero 2:23.

NSANGO