NGƆNDƆ KA HENDE 3, 2022
RUSSIE

Monga l’awui efula wa nsala kimanyiyaka ɔnangɛso Andreï Vlasov dia ntetemala mɛna akambo la sso di’ɔlɔlɔ

MPOKAMƐ LO

Keem’edja, tominadi ta lo distrikɛ dia Prokopievsk kayanga mpembola kilombo kendana l’ɔnangɛso Andreï Vlasov. Prɔkirɛrɛ atate dilanya kana kibawo kayowowosha.

Woho wakayahɔnaka akambo

Ngɔndɔ k’esambele 2, 2020

Wakafunde ɔnangɛso Andreï dia nde ekɔ lo nkongɛ elimu wendana la tshunda diele anto wa lɔkɔ mbɔsamaka oko waa extremistes
Ngɔndɔ k’esambele 12, 2020

Wanɛ wakamba lo tshunda dia FSB wakatshu tɔsɛnga lo luudu laki ɔnangɛso Andreï ndo lo dihole diande di’olimu. Vɔ wakahɔtɔla ɔnangɛso, tablɛtɛ, telefɔnɛ, ɔrdinatɛrɛ ndo Bible yande. Nde akatɔlama lo lokanu la lo tshanda mɔtshi, ndo oma laasɔ wakatɛ mboka wadɛnde Natalia ambola
Ngɔndɔ k’esambele 14, 2020

Wakatondja ɔnangɛso oma lɛnɛ ombawɔ anto, ko mbokaloya lakande, koko takandahombaka ntomba oma lo lokombo
Ngɔndɔ ka samalo 9, 2021

Wakatatɛ mbolombosha

Awui wendana l’onto

Andreï Vlasov

Datɛ dia eotwelo: 1968 la Prokopievsk, l’ɛtshi ka nkɛtɛ ka Kemerovo)

Ɔkɔndɔ wa lɔsɛnɔ: Nde ngɛnangɛnaka nsanga asango ndo mishiki. Nde akakambaka olimu wa mindaka waa foto

Kosɛnde ka pami mbakawetsha Bible. Nde akabatizama oko Ɔmɛnyi wa Jehowa lo 1991. Akatshuke Natalia, lo 2003

Kɛnɛ kakandate

Ngande watetemalayɛ mɛna akambo la sso di’ɔlɔlɔ?

Kɛnɛ kakimanyiya dia ntetemala mɛna akambo la sso di’ɔlɔlɔ, ele mongakan nshi tshɛ l’awui efula wa nsala. Dimi mbadiaka Bible, nɔngɔsɔlaka nsanganya, mendakak tovidɛo t’okongamelo, sanganaka asango, ndo pokamɛka abuku wakadjama l’eshinga. Dimi salaka nto tolimulimu ta totshitshɛ la ngelo. Dimi kɛnyaka tɔkɛnyɔ totshikitanyi ndo dimi tɛlaka.

Ngande wakakokeketsha anangɛso l’akadiyɛso?

Etena kambutɛwɔ dia vɔ wakalɔmbi dikambo diami, ndo ɔnɛ ɛnyɛlɔ kami ka mbetawɔ mbakeketshaka ndo ɔnɛ vɔ lawɔ nangaka ntshikala la kɔlamelo le Jehowa, dui sɔ keketshakami efula.

Avɛsa akɔna wa lo Bible wele la kitshimudi ya laande le yɛ ndo ngande wakakokimanyiya avɛsa akɔ?

Divɛsa dia 1 Petero 4:12-14 diakakimanyiya dimi la wadɛmi dia ndɔshana l’ehemba wendana la woho wakaye apulushi ndjɔsɛnga luudu laso, akɛtɛ wakawasale, efula ka mbala kakatatshu lo kilombo. . . . Takafunde avɛsa asɔ, ko sho mbahanɛ dihole diayotowaɛnaka. Kaanga mbahamakoke ntomba oma lo lokombo lami, dimi la wadɛmi kanaka yimba lo ɛtɛkɛta ɛsɔ ndo vɔ toholaka dia Jehowa hatokalɛki pondjo. Lam’akawambidje lo lokanu lo tshanda mɔtshi, Isaya 40:10-13 akakeketsha. Woho wakatutala wɔɔngɔ ami l’etena kɛsɔ akakimanyiya diaha dimi ndjakiyanya otamanya.

Ekɔ diɛsɛ dia sho monga anto wakamba kaamɛ la Andreï ndo l’anangɛso l’akadiyɛso akina wa la Russie ndo wa la Crimée, wele diɛsɛ la mbetawɔ kawɔ, wekɔ lo ntshikala la kɔlamelo ndo hawoshisha ɔngɛnɔngɛnɔ awɔ.—2 Kɔrɛtɔ 1:24.

NSANGO