Service fédéral des renseignements financiers (Rosfinmonitoring) ka la Russie kekɔ l’ɔkɛndɛ wa ndɔshana l’anto wakamba la falanga lo yoho ya kɔlɔ, ɛnyɛlɔ wanɛ wasukɛ okongamelo wa kɔlɔ. Vɔ wekɔ la listɛ leyama le anto tshɛ l’anto wafundawɔ dia wekɔ lo nsukɛ okongamelo wa kɔlɔ kana wa waa terɔristɛ. Lokombo l’onto koka kotshama lo listɛ lɔsɔ, kaanga naka tuminadi watahembola onongo ande.

Tatɛ lam’akahembola tuminadi ta laadiko ta la Russie kilombo lo 2017, olimu w’Ɛmɛnyi wa Jehowa wakashimbama ndo nkombo y’anangɛso l’akadiyɛso 525 yakakotshama lo listɛ lɔsɔ. a L’atei wa lofulo lɔsɔ mbele ndo Ɛmɛnyi wa Jehowa wele l’ɛnɔnyi ndekana 100.

Wakadjɛ wanɛ wele lo listɛ lɔsɔ elelo w’efula dia vɔ nkamba la falanga yawɔ. Ɛnyɛlɔ, wakadihe kɔtɛ yawɔ ya lo bankɛ ndo vɔ koka mbɔsa paka dɔlara 137 lo ngɔndɔ dia nkotshaka ehomba wa lo nkumbo yawɔ. Vɔ wekɔ l’elelo dia nsala awui akina efula wa lo lɔsɛnɔ la lushi la lushi ndo dui sɔ mbetɛka nsɛnɔ yawɔ edika w’edika. Ɛnyɛlɔ, vɔ wekɔ l’okakatanu dia nsomba kana nsondja ɛngɔ kele oko, luudu, lokombo, mutuka, nkondja asiransɛ, nkondja wahɔ wakondja ose olimu, etenyi k’okitɔ kana nsɔmba dikuta lo bankɛ. Ɛmɛnyi wambɔsa pasiɔ kana wanɛ wele la dikɔmɔ mboleki mɛna paa, nɛ dia vɔ wekɔ l’okakatanu dia nsomba ekanga ndo mbala efula vɔ bu la lotshungɔ la mbɔtɔ lo mituka w’anto tshɛ.

Ɔnangɛso Anton Chermnykh lele la Oussouriisk, ɔnɛ lakawakotsha lokombo lande lo listɛ Ngɔndɔ ka dikumi l’ahende 2019, mbutaka ate: “Dia nkondja difuto diami, dimi pombaka mɛnya ngɔndɔ tshɛ dia handokondjisha falanga lo yoho ya kɔlɔ. Dimi pombaka tɔlɛ ase bankɛ leemba la mikanda ko vɔ tomɛ lɛɛta la la Moscou. Ɔsɛdingwelo wa mikanda ɛsɔ mbɔsaka mingu hiende. Ko lo lushi lakatokana dimi tshɔka nto lo bankɛ ndo ose bankɛ ɔmɔtshi mbɔsɛkami falanga oma lo kɔtɛ kami. Oma laasɔ, nde ndjihaka kɔtɛ kakɔ nto. Etena keya ase bankɛ w’eyoyo dia lokombo lami lekɔ lo listɛ la waa terɔristɛ, vɔ mbokakami wɔma.”

Kaanga la ntondo k’ekakatanu ɛsɔ, anagɛso l’akadiyɛso wekɔ lo ntetemala mɛna akambo la sso di’ɔlɔlɔ. Ɔnangɛso Yuriy Belosludtsev ɔnɛ lakawakotsha lokombo lande lo listɛ ɛnɔnyi ehende l’etenyi la ntondo ka vɔ mbɔsɛkɛ lokanu l’ɛnɔnyi esamalo mbutaka ate: “Wakandjihɛ kɔtɛ kami. Anangɛso l’akadiyɛso wakatokimanyiya dimi la wadɛmi. Tekɔ la lowandjo l’efula otsha le Jehowa l’ɔtɛ w’osukɔ awɔ.”

Sho mbeyaka dia Jehowa ekɔ lo mɛna woho wɛngiyawɔ anangɛso l’akadiyɛso wa la Russie. Tekɔ lo mbɔlɔmba tele l’eshikikelo tshɛ lo tshɛ dia nde ayotetemala mbakimanyiya l’etena kewɔ l’ohemba watatetemala ɔsɔ.—Mateo 6:33.