Lo Ngɔndɔ ka dikumi l’ahende 14, 2021, Comité des droits de l’homme des Nations unies akate dia wodja wa Tajikistan wakɔnyɔla tshungɔ yele l’onto yaki ɔnangɛso Tierri Amedzro lo monda ndo lo mbɔtɔla la Kazakhstan.

Tshunda sɔ diakate dia wakawonde wonanda ndo wakɔnyɔla Sheke yakadje wedja efula lo kɛnɛ kendana la lotshungɔ l’anto k’anto ndo l’awui wa pɔlitikɛ ya ONU (Pacte international relatif aux droits civils et politiques). Tshunda sɔ diakate ɔnɛ ewandji wa lɛɛta takawahombe nshimba Tierri dia nde nkalola la Tadjikistan naka nde alanga. Wony’ɔnɛ, ewandji wa lɛɛta wa la Tadjikistan “pombaka nsala kɛnɛ tshɛ kahombama diaha weho wa wɔnywɛlɔ wa ngasɔ wa lotshungɔ l’onto salema nto lo nshi yayaye.”

Ewandji w’apulushi wa la Tadjikistan wakɔtɔ lo luudu lakasalaka Ɛmɛnyi wa Jehowa losanganya lɔmɔtshi lo Ngɔndɔ ka dikumi 4, 2018 dia nsɛngɔla luudu lɔsɔ. Vɔ wakande ɔnangɛso Tierri ndo wakawoke ambola lo biro ka Comite de l’État du Tadjikistan kendana la wɔladi wa wodja. Lo Ngɔndɔ ka dikumi 16, 2018, shushi mɔtshi akate dia Tierri aki l’onongo lo woho wakandonɔ aha la lotshungɔ. Tierri ekɔ ose Russie lakakambaka olimu la Tadjikistan.

Shushi akadje Tierri kibawo ka wolo ndo akadjanga dia vɔ mbotondja oma lo wodja.

Tierri akate ate: “Lekɔ l’elongamelo dia yɛdikɔ ya Comité des Nations unies ayokimanyiya lo yɛdikɔ mɔtshi dia lotshungɔ l’ɔtɛmwɛlɔ nyomoleka monga lo wodja wa Tadjikistan, ndo anangɛso wayonga l’akoka wa ntɛmɔla Jehowa wele la ki ka lo yimba.”

Nshi nyɛ, ɔnangɛso ɔmɔtshi ekɔ lo lokanu la Tadjikistan l’ɔtɛ wa mbetawɔ kande.

Tekɔ l’eshikikelo dia Jehowa ayotetemala mbisha anangɛso wakikɛ ehemba wɔladi.​—Isaya 26:3.