Lo Ngɔndɔ ka divwa 7, 2022, Comité ka droits de l’homme ka Nations unies (CCPR) wakɔsɛ lɛɛta la la Tadjikistan yɛdikɔ y’ohomba efula l’ɔtɛ wakawɛngiyaka Ɛmɛnyi wa Jehowa. Lo kilombo kakasalema lo Ngɔndɔ k’esambele 7, 2022, lo dikambo dia Adyrkhayev c. Tadjikistan, ase CCPR wakɔsɛ yɛdikɔ ya dimɛna lo wahɔ w’Ɛmɛnyi wa Jehowa. Dikambo sɔ mendanaka la woho wakatone ewandji wa lɛɛta wa la Tadjikistan dia mbetawɔ Ɛmɛnyi wa Jehowa oko Ɔtɛmwɛlɔ weyama le lɛɛta ndo woho wakawashimbe elimu awɔ.

Laasɔ ko aya ɛnɔnyi ndekana 50, wele Ɛmɛnyi wa Jehowa wakatɛmɔlaka la Tadjikistan. Ɔtɛmwɛlɔ w’Ɛmɛnyi wa Jehowa (ARTJ) wakeyama le lɛɛta lo 1994. Koko, lo Ngɔndɔ ka dikumi 11, 2007, ministère de la Culture wakatola yɛdikɔ shɔ ndo wakashimbe Ɔtɛmwɛlɔ w’ɛmɛnyi wa Jehowa. Ewandji wa lɛɛta wakate ɔnɛ, olimu w’esambishelo w’Ɛmɛnyi wa Jehowa, woho watonawɔ dia nkamba olimu w’ɔsɔlayi l’ɔtɛ wa nkum’etema yawɔ ndo woho watawɔ di’Ɔtɛmwɛlɔ awɔ mbele Ɔtɛmwɛlɔ wa mɛtɛ mɛnyaka dia vɔ wekɔ ɔtɛmwɛlɔ watshutshuya anto dia nsala awui wa kɔlɔ. Ɛmɛnyi wa Jehowa wakahembe dia mbeyama le lɛɛta mbala efula, koko mbala tshɛ wakatonaka.

Lo kilombo kakasalema atete edja, ase CCPR wakate ɔnɛ, woho wakashimbe lɛɛta la la Tadjikistan Ɔtɛmwɛlɔ w’Ɛmɛnyi wa Jehowa hɔtɔnɛ l’ɛlɛmbɛ. Ndo vɔ wakate ɔnɛ, “ndooko kaanga ɔkɔkɔ ɔtɔi” wakasha lɛɛta la la Tadjikistan dia nembetshiya yɛdikɔ yakawɔsɛ ndo ntona di’Ɛmɛnyi wa Jehowa mbeyama le lɛɛta.

Ase CCPR wakate nto ɔnɛ, woho wakatone ewandji wa lɛɛta wa la Tadjikistan dia nyometawɔ di’Ɛmɛnyi wa Jehowa mbeyama le lɛɛta, akakonya dia anto amɔtshi “mindama, mbidjama lo lokanu, mbokama ambola efula, dia mvudu sɛngama, di’anto amɔtshi kɔmama, di’ekanda mbɔsama ndo wakatshanya Ɔmɛnyi wa Jehowa ɔmɔtshi oma la Tadjikistan.” L’ɔtɛ wakawosalɛ akambo lo yoho shɔ, ase CCPR wakate dia lo ndjela Pacte international relatif aux droits civils et politiques wa ONU, lotshungɔ lele l’Ɛmɛnyi wa Jehowa kɔnɛmiyama.

Ase CCPR wakalɔmbɛ ewandji wa lɛɛta wa la Tadjikistan dia vɔ nyomɔsɛdingola kɛnɛ kakalɔmbɛ Ɛmɛnyi wa Jehowa ndo mfuta wanɛ wakiwɔ kɔnɛmiya lotshungɔ la wɔ falanga. Wakatɛ ewandji wa lɛɛta wa la Tadjikistan nto dia “vɔ wakahombe mbɔsa tɛdikɔ tshɛ tahombama di’aha nyomɔnyɔla lotshungɔ lele l’anto ngasɔ lo nshi ya tsha la ntondo.”

Yɛdikɔ ya CCPR shɔ, koka monga la shɛngiya lo kilombo k’ɔnangɛso Shamil Khakimov lele l’ɛnɔnyi 71, lakadjma lo lokanu oma ko Ngɔndɔ ka hende 2019 l’ɔtɛ wa mbetawɔ kande. Ewandji wa lɛɛta wa la Tadjikistan wekɔ lo minda ndo mbidja anangɛso lo nkanu l’ɔtɛ wakawashimbe olimu w’Ɛmɛnyi wa Jehowa lo wodja awɔ.

Tekɔ l’elongamelo dia yɛdikɔ ya CCPR yayokonya di’Ɛmɛnyi wa Jehowa wa la Tadjikistan nkondja lotshungɔ la ntɛmɔla. Tekɔ lo ntetemala nɔmba Jehowa dia ntshɔkɔla welo watetemalanyu mbidja dia ‘mamɛ ndo nshikikɛ lokumu l’ɔlɔlɔ laka lɛɛta.’​—Filipɛ 1:7.