Tatɛ lo Ngɔndɔ ka dikumi l’ahende 26, 2022, ambatshi mboka wa laande ndo ambatshi mboka wa pondjo wayokoka ndjela kasala k’olimu w’ombatshi mboka l’ahole wakokawɔ nsala dui sɔ. Lo ndjela akambo weta lo dihole diodjashiwɔ, ombatshi mboka koka ndjela lo luudu ndaamɛ kana lo Zoom. Lo ndjela ekakatanu wele oko weteto w’aviyɔ w’ata, ohembwelo wa kura, ekakatanu wendana l’ekondjelo, ohembwelo w’ɛtɛrnɛtɛ, ndo kɔnɛksiɔ ka dimɛna bu, anangɛso l’akadiyɛso wakasale la wolo tshɛ dia ndjela ekongelo kɛsɔ. Etombelo waki la welo wakawadje ele, ngandji kokawɔ Jehowa kakafule ndo mbetawɔ kawɔ otsha le nde kakakeketala.

Natalia lakaye oma lo Kryvyi Rih mbutaka ate: “Kalasa kɛsɔ kakakimanyiya dia monga l’ekanelo ka yimba ka dimɛna. Tɔ kakakimanyiya dia aha dimi ndeka mboka wɔma ndo ndeka ndjakiyanya.” Anastasia lakaye oma la Chernivtsi kotshaka ate: “Kalasa kɛsɔ akashikikɛ dia Jehowa nangakami efula. Ɔnɔnyi wetshi ɔnɛ tambodiɛnɛ l’akambo wa kɔlɔ efula, koko kalasa kɛnɛ kaki ohombe leemi. Layosala la wolo tshɛ dia dimi nkondja ɛtshɔkɔ wa Jehowa.”

Svitlana, ombatshi mboka ɔmɔtshi wakaye oma la Kitsman, aki l’ekiyanu efula lo kɛnɛ kendana la mbɔtɔ lo kalasa kɛsɔ. Nde mbutaka ate: “Lakatɛ Jehowa ekiyanu ami tshɛ mbidja w’ekondjelo. Lakayaɛkɛ le nde ndo dimi kondjakiyanya lo dikambo diakɔ nto. Lakashihodia ngandji ndo ekokelo k’oma le Jehowa.” L’ɔkɔngɔ wa nde keketshama la dihonga dia Svitlana, omɛnde lele bu Ɔmɛnyi wa Jehowa akatatɛ ntshɔ la nde lo nsanganya ya l’etshumanelo.

Lo waaso ahende w’etondo, ambeki wa la Zhytomyr wakonɔ oma l’ɛtshi ka nkɛtɛ kakawadjasɛka l’ɔtɛ w’aviyɔ w’ata waketetaka. Wakahɛtshaka dja ya kunyi di’aha luudu monga tshitshi la oyango wa vɔ mbɔtɔka Kalasa. L’ɔkɔngɔ w’ekakatanu ɛsɔ, Valentyna lekekamonɔ la Zhytomyr, mbutaka ate: “Hambohɛki kalasa kɛsɔ pondjo. Lakayaoke oko lekɔ l’ahafu wa wolo efula wa Jehowa.”

L’ɛnyɛlɔ ka wedja efula, ambatshi mboka wa l’Ukraine wakangɛnangɛna efula etena kakawoke dia wambokitshakitsha wenya aso w’esambishelo. L’ɔkɔngɔ wa vɔ mboka diewoyelo diakɔ, Yulia akate ate: “Otema ami wakalole la ngandji otsha le Jehowa. La pindju kakɔ, lakalɔmbɛ Jehowa ndo lakɔsɛngasɛnga dia dimi ntshikala l’olimu w’ombatshi mboka. Dimi haleye woho wakandahombe kadimolami, koko lakeyaka dia nde ayokadimola. L’ɔkɔngɔ wa mboka dia wombokitshakitsha wenya w’esambishelo, lakaleke mbeya woho wayaoka Jehowa lo dikambo diami. Ɔsɔ mbaki diewoyelo dia dimɛna efula diakayokumiyaka Kalasa.”

Lo Ngɔndɔ ka ntondo 24, 2023, diewoyelo sɔ diakayoshamaka l’Ukraine. Diewoyelo sɔ diakangɛnyangɛnya anangɛso l’akadiyɛso wa lɛkɔ. Koko, lofulo lɔsɔ koka monga efula lam’ele eke okakatanu dia nsawola l’anto wa l’ɛtshi ka nkɛtɛ tshɛ ka lo wodja akɔ.

• Apandjudi 47 wakavu

• Apandjudi 97 wakahomɔ wolo

• Apandjudi 8,953 weke lo dawo

• Mvudu 590 yakalana

• Mvudu 645 yakalana vwa

• Mvudu 1,722 yakalana yema efula

• Mbalasa ya Diolelo 8 yakalanyema

• Mbalasa ya Diolelo 17 yakalana vwa

• Mbalasa ya Diolelo 76 yema y’efula

• Kɔmite yasha ekimanyielo etena katomba mpokoso 26 yekɔ lo nsala olimu wa dimɛna l’Ukraine

• Mvudu 46 yakalɔngɔsɔma

• Mbalasa ya Diolelo 5 yakalɔngɔsɔma

• Mvudu 54,445 y’anto akina yakakama ome le DRCs dia vɔ monga la mvudu y’amɛna

• Apandjudi 27,655 wakalawɔ otsha lo wedja ekina ndo wakalongɔma dimɛna le asekawɔ apandjudi