Lo Ngɔndɔ k’esambele 29, 2022, tuminadi ta laadiko ta la Zimbabwe la Mutare takate di’ɔnangɛso Tobias Gabaza, Wonder Muposheri ndo Jabulani Sithole, wanɛ wakawasalɛka akambo aha la losembwe wakɔsɛ yɛdikɔ yakahikama oma lo nkum’etema yawɔ yakekiyama l’awui wa lo Bible diaha nsala sɛlɛmɔnyi yendana l’ɔtɛmwɛlɔ yasalema lɛkɔ.

Lo Ngɔndɔ ka dikumi 2020, ɔlɔhɛ ɔmɔtshi wa lo ngielongelo shɔ akate di’anangɛso asato asɔ pombaka nsala sɛlɛmɔnyi y’ɔtɛmwɛlɔ w’ashidi. Sɛlɛmɔnyi shɔ yakendanaka la nɔmba nyuma ya wanɛ wakavu dia yɔ ndɔsha mvula ndo onto tshɛ la lo ngielongelo shɔ akahombe yisala. Anangɛso wakɔshi yɛdikɔ yakahikama oma lo nkum’etema yawɔ yakekiyama l’awui wa lo Bible diaha nsala sɛlɛmɔnyi shɔ. Ko owandji wa lo ngielongelo shɔ akawaelɛ dia towalombosha.

Owandji ɔsɔ akate di’anangɛso waki l’onongo ndo akaatshutshuya dia nsala sɛlɛmɔnyi shɔ. Anangɛso wakɔsɛ yɛdikɔ ya ntshɔ lo tuminadi ta laadiko ta la Chipinge dia tolomboshama.

Lo Ngɔndɔ ka ntondo 5, 2021, tuminadi ta laadiko takate dia anangɛso mbaki la shadiya. Koko kaanga mbakidiɔ ngasɔ, ɛlɔhɛ wa lo ngielongelo shɔ wakatone dui sɔ ndo wakatetemala nsɛngiya anangɛso. Ndo nto, anto akina wa lo ngielongelo shɔ wakatatɛ mbewewɔ anangɛso ndo wakahɛnyahɛnyaka.

Lam’ele wakatetemala mpɛnyahɛnya anangɛso, vɔ wakɛmbɛ kilombo lo tuminadi ta laadiko. Tuminadi ta laadiko takate dia ɛlɔhɛ wa lo ngielongelo shɔ kɔnɛmiya lotshungɔ lele l’anangɛso. Tuminadi takɔ takadjangɛ ɛlɔhɛ wa lo ngielongelo shɔ diaha ntshutshuya anangɛso dia nsala kaanga sɛlɛmɔnyi ɔtɔi kahɔtɔnɛ la nkum’etema yawɔ ndo vɔ wakahombe mbafuta.

Sɛlɛmɔnyi ya ngasɔ yekɔ lo salema lo Zimbabwe k’otondo. Koko aha la taamu, ndo anangɛso l’akadiyɛso wa l’ahole akina wayokondja wahɔ oma lo yɛdikɔ ya tuminadi ta laadiko shɔ. Tekɔ lo nkaloya Jehowa losaka l’ɔtɛ w’otshumba ɔsɔ.—Tokedi 2:8.