Dɔkɔlɔkɔ diendana l’emuma ekɔ daka dia lofunda kana mbuta l’onyɔ diaha nsala awui wa dieyanelo la ntondo ka diwala.

 Alɔkɔlɔkɔ wendana la emuma wakadianga l’ɛnɔnyi wa 1990 etena kakatondja tshunda di’ɔtɛmwɛlɔ dielɛwɔ Convention baptiste du Sud dia l’États-Unis prɔgramɛ kaki l’ɔtɛ a dui ɔnɛ: “Ngandji ka mɛtɛ kongaka.” Lo ekongelo kɛsɔ nde akasanganya atɔndɔ wa lo Bible la shɛngiya ya dimɛna y’anto akina dia nkeketsha ɛlɔngɔlɔngɔ l’esekaseka dia ntona alapɔlɔ wa la ntondo ka diwala.

 Kombeta edja, ekongelo ka woho akɔ waamɛ kakatondjama, tɔ kaki la nsanganya yele wanɛ wakayiɔtɔka wakatshikaka dɔkɔlɔkɔ wakalongola pɛtɛ ka fɛsa dia mbaoholaka dɔkɔlɔkɔ diawɔ di’ɔnɛ hawotosala dieyanelo dia la ntondo ka diwala.

 Ekadimwelo wa dimbola sɔ nemanɛka l’onto lokiyɛ dimbola.

•   Lo ndjela Christine Kim nde la Robert Rector, wele anyanginyangi, vɔ mbutaka ɔnɛ: “Lo ndjela eyangelo efula wakasalema mɛnyaka alɔkɔlɔkɔ wendana l’emuma kimanyiyaka dia tshindjatshindja kana kitshakitsha awui wa dieyanelo le ɛlɔngɔlɔngɔ.”

•   Eyangelo wakatombe sɛkɛ wakasalema oma l’ambeki wa lo kalasa yelɛwɔ Guttmacher mɛnyaka ɔnɛ: “Ɛlɔngɔlɔngɔ watshika ‘alɔkɔlɔkɔ wendana l’emuma’ mbaleka pembaka dia nsala awui wa dieyanelo oleki wanɛ wele hawotshike alɔkɔlɔkɔ wendana la emuma.”

 Lande na ngasɔ?

•   Eyangelo ɛmɔtshi mbɛdikaka ɛlɔngɔlɔngɔ watshika alɔkɔlɔkɔ wendana l’emuma la wanɛ wahatshike alɔkɔlɔkɔ wendana la emuma wele vɔ bu kanyi tshɔi lawɔ lo kɛnɛ kendana l’awui wa dieyanelo.

•   Eyangelo ekina mbɛdikaka wanɛ watshika alɔkɔlɔkɔ wendana l’emuma la wanɛ wahatshike alɔkɔlɔkɔ akɔ wele wekɔ la kanyi ɔtɔi lo dikambo di’awui wa dieyanelo.

 Kakɔna kɛnya eyangelo wa komelo ɛsɔ? Dr. Janet Rosenbaum, lele manyi l’awui wendana la yoonge ya dimɛna mbutaka ate: “L’ɔkɔngɔ w’ɛnɔnyi etanu, wanɛ wakatshike alɔkɔlɔkɔ la wanɛ waki kotshika alɔkɔlɔkɔ wendana l’emuma, vɔ tshɛ wekɔ la dionga diakɔ diaamɛ lo kɛnɛ kendana l’awui wa dieyanelo.”

 Dikongelo diendana l’alɔkɔlɔkɔ wendana l’emuma, diekɔ l’eyango w’amɛna. Koko diɔ hadiɔkɔkɔmiya lo wɛngɔ awɔ ohomba wa nɛnya dɔkɔlɔkɔ sɔ. Lo ndjela ombetsha ɔmɔtshi welɛwɔ Rosenbaum, nde mbutaka di’efula ka wanɛ watshika alaka wa nama emuma kawɔ “hawotshike alɔkɔlɔkɔ awɔ l’otema ɔtɔi.” Onto ndamɛ mbahomba mbɔsa yɛdikɔ ya ndjalama lo dihole dia anto akina kana dikongelo dimɔtshi nsala dui sɔ.”

 Bible keketshaka dia onto tshɛ ndjaɔsɛ yɛdikɔ ndamɛ, aha tsho lo ntshika dɔkɔlɔkɔ dia lofunda kana dia l’onyɔ, koko lo tokimanyiya dia “ntshikitanya ɔlɔlɔ la kɔlɔ.” (Hɛbɛru 5:14, Parole de Vie). Tolembete dia emuma bu yoho tshɔi yakokaso ndjakokɛ oma lo wa hemɔ kana diemi, koko ekɔ yoho mɔtshi yakokaso mbisha Otungi wa diwala nɛmɔ.​—Mateo 5:19; 19:4-6.

 Atɔndɔ wele lo Bible wakashama lo wahɔ aso. (Isaya 48:17) Ɔnkɔnɛ, onto tshɛ oyadi ɛnɔnyi wele lande koka nkondja wolo wele lande ohomba dia nkitanyiya Ɛlɛmbɛ waki Nzambi wata dia “ndawɔ awui wa mindo wa dieyanelo.” (1 Kɔrɛtɔ 6:18) Etena katshukaso kana katshukamaso, sho mongaka la lotshungɔ la nsala awui wa dieyanelo aha l’ekiyanu kana l’etombelo wa kɔlɔ waya lo nsala awui wa dieyanelo la ntondo ka ntshuka kana ka ntshukama.