•  “Angɛnyi w’amɛna koko lo tena dimɔtshi vɔ mbishaka yɛnyi”

•  Ɛkɔkɔ ehende wahombaso mbidja wɔladi

•  Kɛnɛ kata asekayɛ

 Sho koka mbita ɔnɛ “analengo wekɔ angɛnyi w’amɛna koko lo tena dimɔtshi vɔ mbishaka yɛnyi.” Wɛ mbalangaka ndo vɔ lawɔ kolangaka, koko lo tena dimɔtshi hanyokana. Helene lele l’ɛnɔnyi 18 mbutaka ate: “Kosɛmi ka pami mbishakami nkɛlɛ nde mbeyaka dimɛna kɛnɛ kakokande nsala kana mbita dia mbishami nkɛlɛ!”

 Ekakatanu ɛmɔtshi koka nshila naka nyu sawola dimɛna ndo mbokana. Ɛnyɛlɔ:

•   Enondo la kose amɔtshi walala lo shambrɛ tshɔi koka mana l’ɔtɛ wa ɔmɔtshi halange di’okina mbeya akambo ande. Ngande wayokandɔma dui sɔ? Onga nsuke dia mbetawɔ tokanyi t’onto okina ndo onto l’onto atshike osekande kɛnɛ kakombolande. Nyokambe la tɔndɔ dia lo Bible diele lo Luka 6:​31.

•   Akadiyɔ ahende kokaka “mengɔnya ahɔndɔ” aha la nɔmbana dikimɔ. Ngande wayokandɔma dui sɔ? Nyosawole dia dikambo diakɔ ndo onto l’onto eye elelo ande. Nyokambe la tɔndɔ dia lo Bible diele lo 2 Timɔte 2:​24.

 Lo tena dimɔtshi ekakatanu wa wolo koka ntomba lam’asa onto la ɔngangɔ ndo dui sɔ koka monga l’etombelo wa kɔlɔ efula. Nyɛsɔ tɔsɛdingole mbɛnyɛlɔ dihende dia lo Bible:

•   Miriyama nde la Arɔna wakoke Mɔsɛ k’ɔnangɛwɔ kandjema ndo dui sɔ diaki l’etombelo wa kɔlɔ efula. Nyadia ɔkɔndɔ akɔ lo Walelo 12:​1-​15. Ndo yambola ɔnɛ: ‘Ahombami nsala diaha dimi monga la kandjema otsha l’analengo?’

•   Kɛna aki la nkɛlɛ k’efula ndo kɛsɔ akayokonya dia ndjaka Aabɛlɛ w’ɔnango. Nyadia ɔkɔndɔ akɔ lo Etatelo 4:​1-​12. Oma laasɔ yambola wate: ‘Kakɔna kakokami nsala dia mbahemɛ nkɛlɛ kami etena katomba okakatanu lam’asami l’analengo?’

 Kaanga mbakokadiɔ monga wolo dia mbokana l’anyinyɔ, ekɔ ɛkɔkɔ ehende walɔmba dia mbidja welo dia wɔladi monga.

1.   Ɔsɔ ekɔ djembetelo yɛnya di’onto ambotshunda. Ɔlɔngɔlɔngɔ ɔmɔtshi welɛwɔ Alex mbutaka ate: “Lakomalɛka esadi akosɛmi ahende wa wamato, koko kakianɛ handjosala dui sɔ ndo laya la solo dia lotutsha otsha le wɔ, kɛsɔ ambɛnya dia mɛtɛ lamboola.”

    Bible mbutaka ate: “Onto lahoke nkɛlɛ esadi ekɔ la shɛnɔdi y’efula, koko onto lele bu la solo dia lotutsha kɛnɛmɔlaka enginya kande.”​—Tokedi 14:29.

2.   Dui sɔ diayokokimanyiya lo nshi yayaye. Naka wɛ hakoke mbikikɛ munga w’anyiyɔ, ko ngande wayoyo nsala la munga y’olonganyi ayɛ, y’osekayɛ la l’olimu, y’owandji ayɛ kana y’anto akina?

    Dui diohomba dia lo lɔsɛnɔ: Mbeya nsawola ndo nkandola ekakatanu ekɔ dikoka dia nkimanyiya dia nyu monga la diɔtɔnganelo dia dimɛna l’anto akina ndo nkumbo mbele dihole dia dimɛna diakokayɛ nkɛnɛmɔla dikoka sɔ.

    Bible mbutaka ɔnɛ: “Lo edja tshɛ kaakadialemanɛ la nyu, nyodjasɛ l’anto tshɛ ki.”​—Rɔmɔ 12:18.

 Onde wɛ ayɔngɛnangɛna dia vɔ kokimanyiya dia nkandola okakatanu ɔmɔtshi wasayɛ l’anyinyɔ? Adia “kɛnɛ kata asekayɛ,” ndo enda asawo wakalɔngɔsɔma dikambo d’ɛlɔngɔlɔngɔ “woho wambokana l’anyinyɔ.”