Onde kanyi ya ndjakimɔ le Jehowa ndo batizama kokiyanyaka? Naka ngasɔ mbediɔ, kete sawo nɛ diayokokimanyiya dia minya wɔma.

Lo sawo nɛ

•  Kakɔna kayotomba naka lambosala munga kɛmɔtshi ka woke l’ɔkɔngɔ wa batisimu?

•  Ko ayomosala naka dimi mbokaka ɔkɛndɛ waya lo batizama wɔma?

•  Ko ayomosala naka dimi mbokaka dia halosungana kambɛ Jehowa?

•  Kɛnɛ kata asekayɛ

 Ɔkɔkɔ w’okiyanu: Ondo wɛ mbeyaka onto ɔmɔtshi lakasale munga kɛmɔtshi ka woke ndo lakatshanyema oma l’etshumanelo. (1 Kɔrɛtɔ 5:11-13) Wɛ koka monga l’okiyanu w’ɔnɛ dui sɔ koka ndjokokomɛ.

 “Etena kakamakanyiyaka lo kɛnɛ kendana la batizama, mbala ka ntondo kanyi ya ndjosala munga yakandjɛ. Lakakanyiya lɔkɔnyɔ layonga l’ambutshi ami naka dui dia ngasɔ komɛmi.”​—Rebekah.

 Divɛsa di’ohomba: “Kanga kɔlɔ atshike mboka kande ndo onto a kɔlɔ atshike tokanyi tande; akalole le Jehowa, ko nde ayowoka kɛtshi, ɛɛ, le Nzambi kaso, nɛ dia nde ayowodimanyiya tshɛ lo tshɛ.”​—Isaya 55:7.

 Kana yimba: Kaanga mbatshanyema atshi wa pɛkato oma l’atei wa etshumanelo, Jehowa mbokaka wanɛ wayatshumoya l’okitshakitsha ndo wetawɔ engwelo kɛtshi.​—Osambo 103:13, 14; 2 Kɔrɛtɔ 7:11.

 Kɛnɛ kele mɛtɛ ele: Kaanga keyɛ onto lele keema kokele, wɛ koka nshika tanga l’ehemba l’ekimanyielo ka Nzambi. (1 Kɔrɛtɔ 10:13) Laadiko dia laasɔ, onto akɔna ahomba nsɔna kɛnɛ kahombayɛ nsala? Onde wɛ? Kana onto okina?

 “Lakokaka wɔma wa ndjosala munga l’ɔkɔngɔ wa batisimu, koko oma laasɔ lakayɛna dia layosala munga naka lekɔ lo ntetemala tshimbatshimba dia batizama. Lakayoshihodia dia halohombe ntetemala tatalolaka batisimu kami l’ɔtɛ wa wɔma w’akambo wakoka ntomba lo nshi yayaye.”​—Karen.

 Lo tshena pe: Naka wɛ nsɔna dui sɔ, kete wɛ koka mbewɔ pɛkato ya weke oko wasala efula k’ekambi wa Jehowa.​—Filipɛ 2:12.

 Ohomba w’ekimanyielo kekina? Enda sawo diele l’ɔtɛ a dui ɔnɛ: “Ngande wakokami nshika tanga la ntondo k’ehemba?”

 Ɔkɔkɔ w’okiyanu: Ɛnyɛlɔ, ondo wɛ mbeyaka ɛlɔngɔlɔngɔ l’esekaseka ɛmɔtshi wakangana etale la nkumbo ndo l’angɛnyi awɔ dia mpamia olimu wakambɛwɔ Jehowa. Wɛ mbokaka wɔma di’anto wayolongamɛ dia wɛ nsala woho akɔ waamɛ.

 “Okristo wambobatizama koka nkondja waɛsɛ wa weke efula, koko anto amɔtshi bu suke kana vɔ watakondja diaaso dia nsala dui sɔ.”​—Marie ɛnɔnyi 16.

 Divɛsa di’ohomba: “Onto l’onto asɛdingole etsha ande hita, ko nde ayoyonga la ɔkɔkɔ wa ngɛnangɛna lo kɛnɛ kasalande ndamɛ, koko aha lo ndjaɛdika l’onto okina.”​—Ngalatiya 6:4.

 Kana yimba: Lo dihole dia ndjaɛdika l’anto akina, sɛdingola la yambalo tshɛ ɛtɛkɛta wa lo Makɔ 12:30 wata ɔnɛ: “Langa Jehowa Nzambi kayɛ l’otema ayɛ tshɛ.”

 Eya dia wɛ pombaka kambɛ Jehowa l’otema ayɛ tshɛ, koko aha onto okina. Naka mɛtɛ wɛ nangaka Jehowa, kete wɛ ayosala tshɛ kakokayɛ nsala dia mbokambɛ lo yoho yoleki dimɛna, mbuta ate lo yɛdikɔ yɛdimi l’akoka ayɛ.

 “Kaanga mbele batisimu ekɔ nna di’ohomba efula, dui sɔ hetsha lɔsɛnɔ layɛ wolo. Naka wɛ monga l’angɛnyi w’amɛna, kete vɔ wayokokimanyiya. Lam’atayaleke monga l’ɛkɛndɛ mbayotalekaka ɔngɛnɔngɛnɔ ayɛ fula. Lo ntona batizama, wɛmɛ ekɔ lo ndjasalɛ kɔlɔ.”​—Julia.

 Lo tshena pe: Tetemala monga la lowando lo ngandji kakakoke Jehowa. Kɛsɔ ayokotshutshuya dia wɛ mbosha kɛnɛ koleki dimɛna le yɛ.​—1 Joani 4:19.

 Ohomba w’ekimanyielo kekina? Enda sawo diele l’ɔtɛ a dui ɔnɛ: “Onde dimi lambokoka mɛmba ɛkɛndɛ?”

 Ɔkɔkɔ w’okiyanu: Jehowa ekɔ Nkum’Olongo, lo mbɛdika la nde, ndooko kele ɔna onto la ntondo kande! Wɛ koka ndjambola dia kana Jehowa mbeyaka dia wɛ ekɔ.

 “Lam’ele ambutshi ami wekɔ Ɛmɛnyi wa Jehowa, lakayakiyanyaka ‘dia lakahowɔ’ lɔngɛnyi lasami la Jehowa oma le wɔ nɛ dia Jehowa kokotolami dimi mɛ oya le nde.”​—Natalie.

 Divɛsa di’ohomba: “Ndooko onto lakoka ndja le mi paka Papa lakantome kookotodi.”​—Joani 6:44.

 Kana yimba: Etena kabatizamayɛ, kɛsɔ mɛnyaka dia Jehowa mbokokotudi dia wɛ mbɔtɔ lɔngɛnyi la nde. Onde wɛ nangaka mbetawɔ leeta lɔsɔ?

 Ohɔ nto dia, aha onto okina mbeeya, koko Jehowa ndamɛ mbeeya wanɛ wakotolande. Ndo Ɔtɛkɛta ande toshikikɛka dia naka wɛ ‘ndjasukanya la Nzamb’. . . ko nde ayoyasukanya la yɛ.’​—Jakɔba 4:8.

 “Woho weyayɛ Jehowa ndo wayasukanyayɛ la nde, mɛnyaka dia nde kolangaka. Laasɔ, naka wɛ fɔnyaka dia wɛ hakoke mbokambɛ, kete ohɔ dia nde hetawɔ dui sɔ. Ndo nde okongaka la shadiya nshi tshɛ.”​—Selina.

 Lo tshena pe: Naka wɛ nkotsha kɛnɛ kalɔmbama lo Bible dia batizama, kete wayɛnya dia wɛ sunganaka ntɛmɔla Jehowa. Kɛnɛ koleki ele, eya dia nde mbetawɔka ɔtɛmwɛlɔ ɔyɛ.​—Ɛnyɛlɔ 4:11.

 Ohomba w’ekimanyelo kekina? Enda sawo diele l’ɔtɛ a dui ɔnɛ: “Lande na kahombami nɔmba?”