ƐLƆNGƆLƆNGƆ WEKƆ LO NDJAMBOLA
Ayomosala naka ombutshi ami ɔmɔtshi ekɔ la hemɔ?
Ɛlɔngɔlɔngɔ efula hawodje yimba lo kɛnɛ kendana la okokelo w’ambutshi. Ɛnɔnyi efula mbeyaka mbeta la ntondo ka ambutshi awɔ ndjotata hemɔ.
Ko ayoyosala naka papa kana mama ambotata etena kayayole? Tɔsɛdingole okakatanu wakahomana l’ɛngɔngɔlɔngɔ ehende.
Ɔkɔndɔ waki Emmaline
Mama akatataka hemɔ kahankɔnɔ kelɛwɔ syndrome d’Ehlers-Danlos (SED), tɔ kakawoshaka kandji kahashile, ndo hemɔ kakɔ mindaka l’asɔnga, lo lokoho la demba ndo l’eshisha.
Hemɔ kakɔ bu l’okanga shikaa wa kisaka ndo yonge ya mama yakaleke ndana l’ɛnɔnyi dikumi weke kambeta ɛnɛ. Ndo nto, lo ntena dimɔtshi lam’ele dikila dia nde diakaleke monga l’ɛse efula, lɔsɛnɔ lande lakaleke monga lo waale ndo lo ntena dimɔtshi etena kakalekaka paa monga wolo nde akakombolaka ndo mvɔ.
Dimi l’ase nkumbo kami tekɔ Ɛmɛnyi wa Jehowa ndo ase etshumanelo kaso wakatokeketshaka ntena tshɛ! Ɛnyɛlɔ, atete edja yana ya yimato yele lami lɔlɔnga ɔtɔi akatotomɛ kartɛ kakandafunde lɔkɔ dia nde tokaka ngandji ndo etena tshɛ keso l’ohomba w’ekimanyielo, nde ekɔ nsuke dia tokimanyiya. Ekɔ dui dia dimɛna efula monga l’ɔngɛnyi wa woho ɔsɔ!
Bible kekɔ ekimanyielo kahadjama anya le mi. Ɛnyɛlɔ, divɛsa dimɔtshi l’atei w’avɛsa walangami ko Osambo 34:18, diata ɔnɛ: “Jehowa ekɔ suke la wanɛ wele l’etema wambatɛ.” Divɛsa dikina ko Hɛbɛru 13:6, diata ɔnɛ: “Jehowa kele okimanyedi ami, dimi hantoka wɔma.”
Divɛsa di’ekomelo nɛ diekɔ ohomba efula le mi. Kɛnɛ kakalekaka mbishami wɔma efula ele aha dimi nshisha mama. Dimi mbookaka ngandji efula ndo lekɔ la lowando efula lo etena tshɛ kakatetshaka kaamɛ. Divɛsa dia lo Bible sɔ kimanyiyakami dia nshihodia di’oyadi kɛnɛ tshɛ kakoka komɛmi lo nshi yayaye, layokoka kitokomɛ l’eshikikelo tshɛ.
Koko lekɔ la wɔma wa dui dikina nto. SED ekɔ hemɔ k’ohowɔ. Mama akɔshi hemɔ kakɔ oma le mama kande ndo dimi lawɔ layokiɔsa oma le nde. Ndooko nyakɛ dimi lekɔ la SED. Koko Hɛbɛru 13:6 shikikɛkami dia Jehowa ayonga “okimanyedi ami” lo dikambo nɛ.
L‘etena kɛsɔ, lakasalaka la wolo dia ngɛnangɛna la kɛnɛ kele lami kakianɛ ndo aha la lɔsɛnɔ lambetaka kana l’awui wa lo nshi yayaye. Dimi koka kaanga ndjotata hemɔ ka lo wɔɔngɔ lo mbɛdika kɛnɛ kakasalaka mama ntondo la kɛnɛ kayande bu l’akoka wa nsala. Bible mbutaka dia ehemba wele laso wekɔ “wa lo tshanda mɔtshi tsho” lo mbaɛdika la elongamelo ka lɔsɛnɔ la pondjo lele hemɔ hatonga nto.—2 Kɔrɛtɔ 4:17; Ɛnyɛlɔ 21:1-4.
Ambola wa nkana la wɔ yimba: Kakɔna kakakimanyiya Emmaline dia ntetemala monga la nkanyi y’ɔlɔlɔ? Ngande wakokayɛ ntetemala nama ɔngɛnɔngɛnɔ ayɛ kaanga etena kahomanayɛ l’ehemba?
Ɔkɔndɔ waki Emily
Lam’akimi lakɔtɔ kalasa, mbakatatɛ papa ntata hemɔ k’ɔkɔmwɛlɔ. Aki oko papa kekina kambɔsa dihole dia papa kami. Ntatɛ oma ko etena kɛsɔ, papa akayotatɛka monga ɔkɛtshikɛtshi oto, wɔma waheyama ɔtɛ l’ekolo ndo aki l’okiyanu w’efula. Kakianɛ, aya oko ɛnɔnyi 15 wamondokitata. Mboshaka paa efula lo woho wongande ɔkɛtshikɛtshi oto kaanga mbeyande dia nde ndooko l’ɛkɔkɔ wa ndjaoka ngasɔ!
Tekɔ Ɛmɛnyi wa Jehowa ndo ase etshumanelo kaso tokimanyiyaka hakoke. Asekaso ambetawudi wekɔ ɔlɔlɔ efula oya le so ndo vɔ ndjadjaka lo dihole diaso ndo ndooko onto l’atei awɔ lasala dia papa ndjaoka oko nde bu ohomba l’etshumanelo. Mɛna woho wakikɛ papa okakatanu ande, tshutshuyakami dia mbooka ngandji oleki kakamawokaka ntondo.
Papa kakameyaka aki ɔnɛ laki kodiɛnɛka la ekiyanu, la shɔkɔ ndo ɔnɛ laki l’ɔngɛnɔngɛnɔ. Mbishakami paa efula l’asolo etena kawɛnami alɔshana lushi la lushi la otunyi wahɛnama wele lo yimba yande.
Kaanga mbediɔ ngasɔ, papa salaka la wolo dia ntetemala monga la nkanyi y’ɔlɔlɔ. Atet’edja, etena kakofukutanyaka hemɔ kande ka lo tokanyi wolo, nde akasalaka la wolo dia mbadiaka Bible kaanga yema tshitshɛ lushi la lushi, kaanga mbakandadiaka paka avɛsa angana ato. Dui sɔ diakokeketsha efula. Kaanga yema ya mbekelo kɛsɔ, kakokeketsha hakoke. L’edja tshɛ k’etena ka paa kɛsɔ, papa akangɛnyangɛnya.
Dimi ngɛnangɛnaka efula divɛsa dia Nɛhɛmiya 8:10, diata ɔnɛ: “Ɔngɛnɔngɛnɔ wa Jehowa mbele longele lanyu.” Ngasɔ mbediɔ mɛtɛ. Dimi mongaka l’ɔlɔ etena kemi kaamɛ l’ase etshumanelo, etena kashami kɔmatɛrɛ, ndo etena kasambishami lokumu l’ɔlɔlɔ. Awui asɔ kimanyiyakami etena kayaokami ompoko ndo kemi l’ekiyanu. Kɛsɔ kimanyiyakami dia ndjaoka dimɛna lushi l’otondo. Ɛnyɛlɔ ka papa akambetsha di’oyadi okakatanu akɔna wayomohomana la wɔ, Jehowa ayongaka nshi tshɛ suke dia kimanyiyami.
Ambola wa kana lawɔ yimba: Ngande wakasukɛ Emily papa kande l’etena kakinde la hemɔ? Ngande wakokami nkimanyiya onto ɔmɔtshi ladiɛnɛ la ɔkɔmwɛlɔ?
